Ai Vola I Amosi Na Parofita 4
4
Era sa vunauci na Isireli e na vuku ni nodrai valavala kaukauwa, 1-3, kei na nodra dauqarava na kalou lasu, 4, 5, kei na nodra bese ni vakavulici, 6-13.
1DOU rogoca na vosa o qo, oi kemudou na karavau alewa ni Pasani, sa tiko e na ulu-ni-vanua ni Samaria, oi kemudou sa dauvakasaurarataki ira na kaisi, ka butuqaqi ira na dravudravua, ka kaya vei ira na nomudou turaga, Kauta mai, me da mai gunu.
2Sa vosavavakini na Turaga ko Jiova, a sa cavuta na nona yalododonu, Ena yaco, raica, na gauna vei kemudou, ena kauti kemudou tani kina ko koya, ni sa nauta, kei na nomudou kawa, ni sa siwata. 3Ia na cila ni bai dou na dui cilava, yadua na cila e donuya, mo dou dui laʼki biu vakai kemudou ki na koro kaukauwa, sa kaya ko Jiova.
4Dou lako mai ki Peceli, me ia na talaidredre; ia mai Kilikali, dou vakalevutaka na talaidredre, io, dou kauta mai e na veimataka na nomudoui soro, e na veiyabaki e tolu talega nai katini ni nomudou ka kece: 5dou cabora talega nai madrali ni vakavinavinaka e vakalevenitaki, ia dou kacivaka ka tukuna nai madrali e cabori wale: ni dou sa vinakata me vakaoqo, na luve i Isireli, sa kaya na Turaga ko Jiova.
6Ia koi au talega, kaʼu a soli kemudou me vakabatina savasava e na nomudou Veikoro kecega, io, mo dou viakana mai e na nomudou veiyasana kecega: ia dou a sega ga ni lesu vei au, sa kaya ko Jiova.
7Ia koi au talega, kaʼu a bureitaka vei kemudou na uca, ni sa tolu mada na vula me qai cava na yabaki: ia kaʼu a vakatauca na uca ki na dua na koro, ka tawa vakatauca ki na dua tale na koro: e dua na tikina sa tauci uca, ia na tikina e tawa tauci uca sa malai: 8a sa se e rua na koro se tolu ki na dua na koro, me gunu wai; a ra sa tawa cegu kina: ia dou a sega ga ni lesu vei au, sa kaya ko Jiova.
9Au a yaviti kemudou e na cagi todra kei na bokata: a nomudou veiwere e vuqa, kei na nomudou veivainivaini, kei na nomudou veilolo, kei na nomudou veiolive, sa kania ga na vodre dauquru: ia dou a sega ga ni lesu vei au, sa kaya ko Jiova.
10Au a tala vei kemudou na mate dauveitauvi vaka-Ijipita; au a vakamatei ira na nomudou cauravou e nai seleiwau, o ira vata kei na nomudou ose ka bobulataki; io, kaʼu a vakuvuca cake na boi ca ni nomudoui tikotiko vakaivalu ki na ucumudou: ia dou a sega ga ni lesu vei au, sa kaya ko Jiova.
11Au a vukica e so vei kemudou, me vaka ka vukici Sotoma kei Komora na Kalou, ia dou a vaka na qilaiso sa kaliraki mai na buka waqa: ia dou a sega ga ni lesu vei au, sa kaya ko Jiova.
12O koya o qo kaʼu na cakacaka vakaoqo kina vei iko, Isireli, ia niʼu na cakava na ka o qo vei iko, mo vakarau mo laʼki tavaki koya na nomu Kalou, Isireli. 13Ni sai koya, raica, ka bulia na veiulu-ni-vanua, ka vakatubura na cagi, a sa tukuna ki na tamata na ka e vakananuma kina, o koya sa cakava na sabogibogi me butobuto, a sa butuka na veiyasana cecere kei vuravura, o Jiova, na Kalou ni lewe vuqa na yacana.
Currently Selected:
Ai Vola I Amosi Na Parofita 4: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
