Ai Vola I Amosi Na Parofita 3
3
Ni ra tawa muri koya na Kalou, sa dodonu me ra cudruvi, 1-8. Sa qai tukuni vata na nodra cudruvi kei na vuna, 9-15.
1DOU rogoca na vosa o qo sa vosataka ko Jiova na kemudou, na luve i Isireli, na kedra na mataqali kecega kaʼu a kauta cake mai na vanua ko Ijipita, ka vaka,
2Sai kemudou ga kaʼu a kila vei ira na veimataqali kece e vuravura: o koya o qo kaʼu na cudruvi kemudou kina e na vuku ni nomudou caka cala kecega.
3Me na lako vata li e lewe rua, kevaka erau sa sega ni yalovata? 4Me na tagi li na laioni mai veikau, ni sa sega na kena e kune mai? me na tabalaka li na domona na luve ni laioni mai na nonai kotokoto, kevaka sa tawa cova rawata? 5Me na tudaitaki li na manumanu vuka e na dai e na qele, ni sa sega na kena dai? me na riba li na dai mai na qele, ni sa sega sara na ka e tudaitaki? 6Me na uvuci li na davui e na koro, ka tawa sautaninini mai na tamata? me dua li na ca e na koro, me na sega ni vakayacora ko Jiova? 7E dina, ni sa tawa vakayacora e dua na ka na Turaga ko Jiova, ena vakaraitaka mada ga na nona ka vuni vei ira na nonai talatala na parofita. 8Sa tagi na laioni, o cei me na tawa rere? sa vosa na Turaga ko Jiova, o cei me na tawa parofisai?
9Dou vakarogotaka e na veivale vakaturaga mai Esitoti, kei na veivale vakaturaga e na vanua ko Ijipita, ka kaya, Dou vakasoqoni kemudou e na veiulu-ni-vanua mai Samaria, ka raica na masa levu e tikina, kei ira sa vakasaurarataki e tikina. 10Ni ra tawa kila na caka ka dodonu, sa kaya ko Jiova, era binia na ka e kovei ka butakoci ki na nodra veivale vakaturaga. 11O koya o qo sa vosa vakaoqo kina na Turaga ko Jiova; Sa dua mai na meca, io, sa vakavolivolita na vanua; ia ena kauta sobu tani talega vei iko na nomu kaukauwa, ena vakayanaki talega na nomu veivale vakaturaga. 12Sa vosa vakaoqo ko Jiova; Me vaka nai vakatawa sa kaliraka mai na gusu ni laioni e rua na yava, se na tiki ni daliga; ena kaliraki vakakina na luve i Isireli era tiko mai Samaria e nai tutu ni mocemoce, kei ira mai Tamasiko e nai davodavo.
13Dou rogoca, ka vakadinadina ki na mataqali i Jekope, sa kaya na Turaga ko Jiova, na Kalou ni lewe vuqa, 14E na siga kaʼu na cudruvi ira kina na Isireli, e na vuku ni nodra talaidredre, kaʼu na qai cudruva dina na veicabocabo-ni-soro mai Peceli: io, nai tautauri ni cabocabo-ni-soro ena qai tamusuki, ka lutu ki na qele. 15Au na yavita talega na vale ni vula i liliwa, kei na vale ni vula i katakata; ena rusa talega na veivale tabua, ka vakaoti laivi na vale lelevu, sa kaya ko Jiova.
Currently Selected:
Ai Vola I Amosi Na Parofita 3: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
