A Cakacaka 25

Sa beitaki Paula ko ira na Jiu e na matai Fesito, a sa tukuni koya vua ko Paula; a sa vosataka ko Fesito na nona laʼki lewai mai Jerusalemi, a sa kaya ko Paula me lewai koya ko Sisari, 1-12. Sa qai lewai koya ko Akiripa kei Fesito, 13-27.

1NI sa tadu mai ki na vanua ko Fesito, a sa oti e tolu na bogi, sa qai cavu tu e Sisaria me lako cake ki Jerusalemi. 2Sa qai beitaki Paula vua ko ira na bete levu kei ira na nodra turaga na Jiu, a ra sa vakamasuta, 3a ra sa kerea vua me lomani ira e na vukuna, me talaki me lako mai ki Jerusalemi ko koya, a ra sa lawavaka me ra vakamatea e na sala. 4A sa kaya ko Fesito, ni sa vakatawai tu mai Sisaria ko Paula, a sa voleka na nona lako yani. 5A sa kaya, O ira vei kemudou sa turaga, me da lako vata sobu, mo dou beitaka na tamata o qo, ke dua na ca sa tu vua.

6A sa tiko vata ga kei ira ko koya ka oti e tini ka vakacaca na bogi, sa qai lako sobu ki Sisaria; e na sabogibogi cake sa tiko ko koya e nai tikotiko ni veilewai, a Sa kaya me kau mai ko Paula. 7Ia ni sa yaco mai ko koya, era sa tu vakavolivolita ko ira na Jiu era a lako sobu mai Jerusalemi, a ra sa beitaki Paula e na ka ca sara e vuqa, a ya era sa sega ni vakatakila rawa ni sa dina. 8A sa tukuni koya ko koya, Au sa sega ni kitaka e dua na ka ca, ki na nodra vunau na Jiu, se ki na vale ni soro, se kivei Sisari. 9Ia e na vuku ni sa vinakata ko Fesito me vakareki ira na Jiu, sa vosa vei Paula, ka kaya, O sa vinakata mo lako cake ki Jerusalemi, mo lewai kina e mataqu e na veika o qo, se segai? 10Sa qai kaya ko Paula, Au sa tu e na mata ni tikotiko ni veilewai nei Sisari, a tikina e dodonu meʼu lewai kina: au a sega ni kitaka e dua na ka ca vei ira na Jiu, o qori ko sa kila vinaka sara. 11Kevaka kaʼu sa tamatai valavala ca, seʼu kitaka e dua na ka e dodonu meʼu mate kina, au sa sega ni bese ni mate: ia kevaka e sega na veika o qo era sa beitaki au kina, sa sega e dua e rawata me soli au vei ira. Au sa cavuti Sisari me lewai au. 12Ia ko Fesito, ni sa veivosaki oti kei ira na mataveilewai, sa kaya, O sa cavuti Sisari, ne? o na lako vei Sisari.

13Ia ni sa oti na bogi e so, erau sa qai lako mai ko Akiripa na tui kei Periniki ki Sisaria, me rau veikidavaki kei Fesito. 14Ia ni rau sa tiko kina ka bogi vuqa, sa tukuni Paula ko Fesito vei koya na tui, ka kaya, Sa dua na tamata sa vesu tu, o koya ka vakalaiva ko Filikisa: 15ia niʼu a tiko mai Jerusalemi, era sa beitaki koya ko ira na bete levu kei ira na nodra qase na Jiu, a ra sa masu meʼu lewai koya me cudruvi. 16Au sa qai kaya vei ira, E sega ni nodrai valavala na kai Roma me solia walega na tamata e dua me vakamatei, ka malua me veirai mada kei ira sa beitaka, me sa rawa talega mada na nona tukuni koya e na vuku ni ka ca sa beitaki vua. 17Ia ni ra sa yaco mai kike, au sa sega ni caka bera, e na sabogibogi cake kaʼu sa tiko e nai tikotiko ni veilewai, ka kaya me kau mai na tamata o qo. 18Ia ni ra sa tu cake ko ira era sa beitaka, era sa sega ni kauta mai na ka ca me beitaka vua, me vaka na ka kaʼu a nanuma: 19ia ka so ga na ka sa veiletitaki kaya e na nodra lotu, kei na dua na tamata ko Jisu, o koya sa mate, ia ka kaya ko Paula ni sa bula tu ko koya. 20Ia e na vuku ni kaʼu sa sega ni kila vinaka me lewa na veika vaka, au sa taroga se via lako cake ki Jerusalemi ko koya, me lewai kina e na veika o qori, se segai. 21Ia ni sa vaka ko Paula, me tiko mada me lewai koya ko Akusito, au sa qai kaya me vakatawai ka malua meʼu vakatalai koya yani vei Sisari. 22Sa qai kaya ko Akiripa vei Fesito, Oi au talega, kaʼu sa via rogoca na tamata o qo. Sa kaya ko koya, E na sabogibogi o na rogoca.

23E na sabogibogi, ni rau sa lako mai ko Akiripa, kei Periniki, erau ukucavu mai, a rau curu ki na yasana ni vakarorogo, kei ira vata kei rau na turaga levu ni valu, kei ira na turaga ni koro, ia ni sa vakarota ko Fesito, sa kau mai ko Paula. 24A sa kaya ko Fesito, I Akiripa na tui, kei kemudou kecega na tamata sa tiko kei keitou eke, dou sa raica na tamata o qo, e na vuku i koya era sa cikevi au ko ira na lewe vuqa na Jiu, mai Jerusalemi, eke talega, a ra sa kaya e sega ni dodonu me bula ko koya. 25Ia ni kaʼu sa kunea ni sa sega ni cakava ko koya e dua na ka ca sa dodonu me mate kina, a sa cavuti Akusito ko koya me lewai koya, au sa qai lewa meʼu vakatala yani. 26Ia ka sega na ka e matata meʼu volai koya kina vua na noqu turaga. O koya ga o qo kaʼu sa kauta mai kina ki na matamudou, ia vakaidina ki na matamu, i Akiripa na tui, me so kina na ka meʼu vola, ni sa tarogi oti ko koya. 27Ni sa vaka na ka lialia vei au me vakatala e dua sa vesu, ka sega ni vakatakila talega na ka ca sa beitaki vua.

Currently Selected:

A Cakacaka 25: FIJ1864

Highlight

Copy