A Cakacaka 26

Sa tukuna na vu ni nona lotu ko Paula, sa qai tukuna tale ni sa digitaki mei talatala, 1-23. Sa vakarogoci koya ko Fesito, ka kaya e sa lialia. Sa qai voleka ni vakabauta ko Akiripa, 24-29. Era sa qai kaya kecega ni sa sega ni ca ko Paula, 30-32.

1SA qai kaya vei Paula ko Akiripa, Sa qai tara mo vakatusai iko mai. Sa qai dodoka na ligana ko Paula, ka tukuni koya:

2Au sa nanuma kaʼu sa kalougata, i Akiripa na tui, niʼu na tukuni au edaidai e matamu e na vuku ni ka kecega era sa beitaki au kina na Jiu: 3io, ni ko sa kila kecega na nodrai valavala na Jiu kei na veika era sa dauveileti taka: o koya o qo kaʼu sa masuti iko kina mo vosota mada ga mo rogoci au. 4A noqui valavala niʼu a gone ka yacova na siga o qo, niʼu a tiko kei ira na kai noqu mai Jerusalemi, era sa kila kecega na Jiu; 5o ira era sa kilai au eliu, kevaka era sa via tukuna mai, niʼu sa valavala vaka-Farisi me vakai ira na mataqali sa muria vakamatailalai sara na noda lotu. 6Au sa qai tu talega meʼu lewai e na vuku ni kaʼu sa vakanuinuitaka na vosa ni yalayala ka cakava ko na Kalou kivei ira na neimami qase: 7ia sai koya na ka o qo era sa vakasama me ra rawata ko ira na neimami yavusa e tinikarua, era dausoro gumatua e na siga kei na bogi. Ia e na vuku ni nuinui o qo, i Akiripa na tui, era sa beitaki au kina ko ira na Jiu. 8E vakaevei, dou sa nanuma beka ni sa ka e dauveivakatiti-qataki, me vakaturi ira cake tale na mate ko na Kalou? 9Oi au talega, kaʼu a nanuma e lomaqu ni sa dodonu meʼu veimecaki e na ka e vuqa kei na yaca i Jisu na kai Nasareci. 10Ia na ka talega o qori kaʼu a kitaka mai Jerusalemi; a ra lewe vuqa era sa lotu kaʼu a sogolati ira e na veivale ni veivesu, ni ra sa lesi au kina na bete levu; ia ni ra sa vakamatei kaʼu sa kaya me vakakina. 11Ia kaʼu a cudruvi ira vakavuqa e na veivale kecega ni lotu, ka vakasaurarataka me ra biuta na lotu, niʼu sa cudru vakalevu sara vei ira, au a vakacacana talega ki na Veikoro kisau.

12Ia ni kaʼu a lako tu ki Tamasiko ni ra a lesi au ka talai au na bete levu, 13ni sa siga levu toka ga, na tui, au a raica e na sala na rarama e dua mai lomalagi, a ya sa uasivia na kena remoremo na mata-ni-siga, a sa cila vakavolivoliti au kei ira talega era lako vata kei au. 14Ia ni keitou sa bale kecega ki na soso, au sa rogoca e dua na domo ni sa vosa vei au e na vosa vaka-Iperiu, ka kaya, I Saula, i Saula, o sa vakacacani au e na vuku ni cava? e ca vei iko mo caqeta na mata ni moto. 15Au sa qai kaya, O cei ko iko, Turaga? A sa kaya ko koya, Oi au ko Jisu, o koya ko sa vakacacana: 16ia mo tu cake ga, ka tu e yavamu: niʼu sa rairai vei iko e na vuku ni ka o qo, meʼu lesi iko moi talatala kei na dautukutuku talega e na veika ko sa raica, kei na veika kaʼu na rairai kina vei iko: 17niʼu na vakabulai iko maivei ira na tamata na Isireli, kei ira na veimatanitu kisau, o ira kaʼu sa qai vakatalai iko kina, 18mo laʼki basuka na matadra, mo saumaki ira mai na butobuto ki na rarama, mai na kaukauwa talega nei Satani ki vua na Kalou, me ra kakua ni cudruvi e nai valavala ca, me rai taukei vata talega emuri kei ira era yalosavasava, ni ra sa vakabauti au.

19Ia ni sa oti o qo, i Akiripa na tui, au sa sega ni talaidredre ki na raivotu vakalomalagi: 20ia kaʼu sa tukuna mada eliu vei ira mai Tamasiko, kei Jerusalemi, kei na yasayasa kece vaka-Jutia, vei ira talega na veimatanitu kisau, me ra veivutuni ka saumaki mai ki na Kalou, ka kitaka nai valavala e kilikili kei na veivutuni. 21O koya o qo era sa tauri au kina na Jiu e na vale ni soro, ka vakatovolea me ra vakamatei au. 22Ia ni sa vukei au na Kalou, au sa bula kina ka yacova na siga o qo, ia kaʼu sa tukuna tiko vei ira e lalai kei ira talega e lelevu, a sa sega na ka tani kaʼu sa kaya, a ya ga era a tukuna na parofita kei Mosese ni na yaco mai: 23ni na mate na Karisito, ni na kedrai matai era na tu cake tale mai na mate, ka na vakatakila na rarama vei ira na tamata na Isireli, vei ira talega na veimatanitu kisau.

24Ia ni sa tukuni koya tiko vakaoqo ko koya, sa vosa e na domo levu ko Fesito, I Paula, o sa lialia; sa vakalialiai iko na vuku levu. 25A sa kaya ko koya, I Fesito vakaturaga sara, au sa sega ni lialia; au sa cavuta ga na vosa sa dina ka vuku: 26ni sa kila na veika o qo na tui, ia e matana kaʼu sa vosa doudou kina; niʼu sa kila e sega ni vuni e dua na ka o qo vei koya, ni sa sega ni caka na ka o qori e na dua na yasana vuni. 27I Akiripa na tui, o sa vakadinati ira na parofita, se segai? Au sa kila ni ko sa vakadinata ga. 28Sa qai kaya ko Akiripa vei Paula, Sa vo e lailai mo rawai au meʼu mai tokani i Karisito. 29Sa qai kaya ko Paula, Au sa masu vua na Kalou, e sega e na vukumu duaduaga, e na vukudra kece talega era sa rogoci au edaidai, me vo e lailai, se me kakua ga ni vo, mo dou vakataki au; ia e na sinucodo ga o qo, e segai.

30Ia ni sa vosa oti vakaoqo ko koya, sa tu cake na tui, kei na matanivanua, kei Periniki, kei ira era sa tiko vata kei iratou: 31ia ni ra sa lako vakatikitiki tani, era sa veivosaki vakai ira, ka kaya, A tamata o qo sa sega ni kitaka e dua na ka sa dodonu me mate se vesu kina. 32Sa qai kaya vei Fesito ko Akiripa, Na tamata o qo, kevaka sa sega ni cavuti Sisari me lewai koya, e dodonu ga me sereki.

Currently Selected:

A Cakacaka 26: FIJ1864

Highlight

Copy