A Cakacaka 24

Sa qai muri Paula ko ira na Jiu ki Sisaria, me ra beitaki koya, a sa tukuna ko koya na nonai valavala kei na nonai vakavuvuli, 1-21. Sa qai vunau ko Paula, a sa sautaninini kina ko Filikisa, a sa sega ga ni vakabauta, 22-27.

1SA bogi lima sa qai lako sobu ko Anania na bete levu kei ira na qase, kei na dua na tamata e vuku e na vosa, ko Teritulu, era sa beitaki Paula vua na turaga. 2Ia ni sa kacivi mai ko koya, sa vakatekivu ko Teritulu me beitaka, ka kaya, Ni da sa vakacegu vakalevu e na vukumu, a sa yaco me vinaka na matanitu o qo e na nomu lewa vakavuku, 3keitou sa vakavinavinaka kina e na veisiga kecega kei na veiyasana kecega, Filikisa vakaturaga sara, ni keitou sa rekitaka. 4Ia de balavu walega vei iko na noqu vosa, au masuti iko ni ko sa yalovinaka mo rogoci keitou vakalailai mada. 5Ni keitou sa kunea na tamata o qo e dauveivakacalai, a sa dauvakatubura ko koya na ca vei ira kecega na Jiu e vuravura, a sa liu vei ira nai tokani ni kai Nasareci: 6o koya ka ia me vakacacana talega na vale ni soro; a keitou a taura, ka via lewa me vaka na neitou vunau. 7Ia ko Lisia na turaga levu ni valu sa lako vakaivalu mai, ka kaliraka mai na liga i keitou, 8a sa vosa vei ira era sa beitaki koya me ra lako mai vei iko: ia ni ko sa tarogi koya, ko na kila rawa na ka kecega keitou sa beitaka vua. 9A ra sa vakadinadina ko ira na Jiu, ka kaya ni sa dina na veika o qo.

10Ia ni sa deguvacu na turaga vei Paula me vosa, sa qai kaya ko koya, E na vuku niʼu sa kila ni sa vuqa na yabaki ko sa turaga ni lewa e na vanua o qo, au sa vinakata vakalevu kina meʼu tukuni au: 11ni ko sa kila rawa, ni sa qai oti walega e tinikarua na bogi ni kaʼu a lako cake kina ki Jerusalemi me masu. 12A ra sa sega ni kunei au ni keirau sa veileti kaya e dua e na vale ni soro, se niʼu sa vakatubura na ca vei ira na lewe vuqa, sa sega ga e na veivale ni lotu, se e na koro; 13a ra sa sega talega ni vakatakila rawa ni sa dina na veika era sa beitaki au kina. 14Ia na ka o qo kaʼu sa vakatusa vei iko, ai valavala era sa vakatoka mei vakavuvuli vakatani, au sa lotu vakakina vua na nodra Kalou na noqu qase, ka vakadinata na ka kecega sa volai e na vunau kei ira na parofita: 15ia kaʼu sa vakanuinui vua na Kalou, ni na tu cake tale mai ko ira na mate, ko ira na yalododonu kei ira na tawa yalododonu, a ya era sa vakadinadinataka ko ira talega. 16Ia na ka o qo kaʼu sa gumatua kina, me kakua e dua na siga e cala kina na lewa-ni-lomaqu vua na Kalou, se vei ira na tamata. 17Ia ni sa oti e vuqa na yabaki, kaʼu a lako mai me kauta na ka-ni-loloma ki na noqu vanua, kei nai madrali e so. 18Ia ka so na Jiu mai Esia era sa kunei au niʼu sa vakasavasavataki e na vale ni soro, ia keitou sa sega ni lewe vuqa, se keitou ue. 19E dodonu talega me ra mai tu e matamu eke, ka tukuna, kevaka era sa kila e dua na ka ca vei au. 20Se me ra mai tukuna ko ira o qo, kevaka era sa kunea e dua na ka ca vei au, niʼu sa tu e na matadra na mataveilewai, 21e na vuku ga ni vosa e dua bauga sa vakaoqo, niʼu sa tu e na kedra maliwa, ka kaci, E na vuku ni nodra tu cake tale na mate dou sa qai tarogi au kina e na siga o qo.

22Ia ni sa rogoca na veika o qo ko Filikisa, a sa kila vinaka na lotu, sa vakadaroi ira, a sa kaya, Ni sa lako sobu mai ko Lisia na turaga levu ni valu, kaʼu na qai lewa na ka dou sa veiletitaka. 23A sa vosa ko koya vua e dua na turaga ni valu me vakatawai Paula, me vakalaiva ga me lako voli, me kakua ni vakatatabuya e dua na wekana sa qaravi koya, se lako mai vua.

24Ia ni sa oti na bogi e so, ni sa lako mai ko Filikisa kei na watina ko Tirusila, na yalewa ni Jutia, sa talaki me lakovi ko Paula, ka sa vakarogoci koya ni sa vosataka na vakabauti Karisito. 25Ia ni sa vosataka tiko ko koya nai valavala dodonu, nai valavala malua, kei na lewa emuri, sa sautaninini ko Filikisa, ka kaya, Lako tani mada edaidai; ia niʼu sa lalaga e na dua na gauna, kaʼu na kacivi iko mai. 26Sa nakita talega ni na solia vua nai lavo ko Paula, me kenai sere: o koya o qo sa talaki vakavuqa kina me lakovi, ka veivosaki kaya. 27Ia ni sa oti e rua na yabaki, sa lako mai ko Porisiu Fesito mei sosomi kei Filikisa; ia ni sa vinakata ko Filikisa me vakamarautaki ira na Jiu, sa vakalaivi Paula me vesu tu ga.

Currently Selected:

A Cakacaka 24: FIJ1864

Highlight

Copy