A Cakacaka 23

Ni sa tukuni koya tiko ko Paula, sa kaya na bete levu me ra tavia na gusuna, 1-5. Sa veiletitaki koya ko ira na nona meca, 6-11. Sa buki kena vere ko ira na Jiu, me ra vakamatea, a sa vakabulai koya ko na turaga ni valu, a sa tala nai valu me ra kauta ki Sisaria vei Filikisa, 12-35.

1A SA vakaraici ira matua na mataveilewai ko Paula, ka kaya, Oi kemudou na veiwekani, au sa muria tiko ka yacova na siga o qo na ka kaʼu a nanuma ni sa dodonu e na mata ni Kalou. 2A sa kaya ko Anania na bete levu vei ira sa tu voleka vua me ra tavia na gusuna. 3Sa qai kaya vua ko Paula, Ena tavi iko ko na Kalou, o iko na lalaga sa boro vulavula: o sa tiko beka me lewai au me vaka na vunau, ka sa kaya meʼu tavi, ia ka sa sega ni vaka na vunau? 4Sa qai taroga ko ira sa tu voleka, 0sa vosavakacacataka na bete levu ni Kalou, nei 5Sa qai kaya ko Paula, Au sa sega ni kila, oi kemudou na veiwekani, ni sa bete levu ko koya: ni sa volai, Mo kakua ni vosavakacacataki koya sa lewai ira na kai nomu.

6Ia ni sa kunea ko Paula ni sai tokani i Satoki e so vei ira, ka so tale era sa Farisi, sa kaci ko koya e na matadra na mataveilewai, Oi kemudou na veiwekani, oi au na Farisi, a luve ni Farisi: e na vuku niʼu sa dinata ni na tu cake tale na mate kaʼu sa tarogi kina. 7Ia ni sa vosa oti vakaoqo ko koya, sa tubu na veileti vei ira na Farisi, kei ira nai tokani i Satoki; a sa tawase rua kina na lewe vuqa. 8Ni sa daukaya ko ira nai tokani i Satoki ni sa sega na tu cake tale, se agilose, se yalo; a sa daukaya ko ira na Farisi ni sa dina ruarua. 9A sa levu na qoqolou, a sa qai tu cake ko ira na vu-ni-vola era nodrai tokani na Farisi; a ra sa gumatua, ka kaya, Keitou sa sega ni kunea e dua na ka ca vua na tamata o qo; ia kevaka sa dua na agilose se na yalo sa vosa vua, me da kakua ni veivala kei na Kalou. 10Ni sa qai tubu na veileti levu, sa rere na turaga levu ni valu, de ra basuraki Paula, a sa vosa vei ira nai valu, me ra lako sobu me kaliraka vakaivalu maivei ira, me ra kauta ki na bure ni valu.

11Ia e na bogi sa muri sa tu voleka vua ko na Turaga, ka kaya, Mo vakacegu ga, Paula: ni sa kilikili me vaka na nomu tukuni au e Jerusalemi na nomu tukuni au mai Roma talega.

12Ia ni sa siga mai, sa buki vere ko ira na Jiu e so, a ra sa veivakadreti vakai ira e na bubului, a ra sa kaya me ra kakua ni kana se gunu me rawa mada na nodra vakamatei Paula. 13A ra sa lewe vasagavulu ka mani vakacaca era sa bukia na vere o qo. 14A ra sa lako mai vei ira na bete levu kei ira na qase, ka kaya, Keitou sa veivakadreti vakai keitou e na bubului levu, me keitou kakua ni kania e dua na ka, me sa rawa mada na neitou vakamatei Paula: 15ia koi kemudou kei ira talega na mataveilewai, dou tukuna vua na turaga levu ni valu me kauti koya sobu mai vei kemudou e na sobogibogi, me vaka dou sa via taroga vakadodonu e na vukuna: ia koi keitou, ni sa bera ni yaco ko koya, keitou sa vakararau tu me vakamatea.

16Ia ni sa rogoca nai lawaki na gonetagane na vugo i Paula, sa lako ka curu ki na bure ni valu, ka tukuna vei Paula. 17Sa qai kaciva e dua vei ira na turaga ni valu ko Paula, ka kaya, Kauta na cauravou o qo vua na turaga levu ni valu; ni sa dua na ka sa tu vua me tukuna vei koya. 18Sa qai kauta me rau lako vua na turaga levu ni valu, a sa kaya, Sa kacivi au ko Paula na tamata ka vesu tu, ka masu meʼu kauta mai vei iko na cauravou o qo, ni sa dua na ka sa tu vua me tukuna vei iko. 19Sa qai taura na ligana ko na turaga levu ni valu, a rau sa lako vakatikitiki vakai rau; a sa taroga. A cava beka na ka sa tu vei iko ko sa mai via tukuna vei au? 20Sa qai kaya ko koya, Sa lomavata ko ira na Jiu me ra masuti iko mo kauti Paula sobu e na sabogibogi vei ira na mataveilewai, me vaka era sa via taroga vakadodonu e so na ka e na vukuna: 21ia mo kakua ni vakarogoca na nodra vakamamasu; ni ra sa le vasagavulu ka mani vakacaca era sa lawavaka, a ra sa veivakadreti vakai ira e na bubului, me ra kakua ni kana se gunu me ra vakamatei koya mada eliu: a ra sa qai vakararau tu, a ra sa waraka ga mo yalata vei ira. 22Sa qai vakalaiva na cauravou na turaga levu ni valu me lako yani, a sa vakarota, Mo kakua ni tukuna vua e dua na nomu vakatakila mai vei au na ka o qo.

23A sa kacivi rau o lewe rua na turaga ni valu ko koya, ka kaya, Vakarautaka na tamatai valu e lewe rua na drau, kei na tamata e le vitusagavulu era vodo e na ose, kei na tamata e rua na drau sa vakaiyaragi e na moto, me ra lako ki Sisaria e nai katolu ni tiki ni bogi; 24ka vakarautaka talega e so na ose, me vodo kina ko Paula, me kau vinaka ki Sisaria vei Filikisa na turaga. 25Ia ka sa vola nai vola ko koya ka vakaoqo:

26O Kilotiu Lisia vei koya na turaga vinaka sara ko Filikisa, sa loloma! 27A tamata o qo era a taura na Jiu, a sa voleka ni ra vakamatea; au sa qai kauti ira nai valu, ka vakabulai koya, ni kaʼu sa kila e kai Roma ko koya. 28Ia niʼu sa via kila se na vuku ni cava era sa beitaki koya kina, au sa kauta ki na nodra mataveilewai: 29ia kaʼu sa kunea ni sa beitaki ko koya e na ka e so e veiletitaki e na nodra vunau, ia ka sega na ka sa beitaki kina ko koya sa dodonu kina me mate se vesu. 30Ia ni sa tukuni mai vei au ni ra sa lawavaki koya ko ira na Jiu, au sa vakariri meʼu vakatala yani vei iko, au sa vosa talega vei ira era beitaka me ra tukuna e matamu na veika sa bili kina ko koya. Sa loloma.

31Sa qai kauti Paula ko ira nai valu, me vaka sa vakaroti vei ira, a ra sa kauta e na bogi ki Adipatiri. 32Ia e na sabogibogi era sa vakalaivi ira sa vodo e na ose me ra lako vata kaya, a ra sa lesu tale ki na bure ni valu. 33Ia ni sa yaco ki Sisaria ko ira o qori, era sa solia nai vola vua na turaga, ka vakaraitaki Paula talega e matana: 34ia ni sa wiliki oti ko na turaga, sa taroga se ko cei na nona vanua. Ni sa qai kila ni sa kai Silisia, 35sa kaya, Au na rogoci iko, ni ra sa yaco mai ko ira talega era sa beitaki iko. A sa kaya me vakatawai e na vale ni veilewai nei Eroti.

Currently Selected:

A Cakacaka 23: FIJ1864

Highlight

Copy