A Cakacaka 22

Sa vakatusa ko Paula na vu ni nona lotu; sa tukuna talega ni sa lesia ko na Turaga mei talatala, 1-21. Ai ra sa rogoci koya ni sa tukuna na nona lako vei ira na veimatanitu kisau, era sa cudru vakalevu, ka kitaka me ra vakacacani koya, a sa vakabulai koya ko na turaga ni valu, 22-30.

1OI kemudou na veiwekani, kei na qase, dou vakarorogo mai ni kaʼu sa tukuni au vei kemudou:

[ 2ia ni ra sa rogoca ni sa vosa ko koya vei ira e na vosa vaka-Iperiu, era sa tiko lo sara, a sa kaya ko koya:] 3Oi au dina na Jiu, au a sucu mai Tarisu mai Silisia, ia kaʼu a susugi e na koro o qo, ka sa vakatavulici au vakadodonu ko Kamalieli me vaka na nodra vunau na qase, ia kaʼu a gumatua e na vuku ni Kalou, me vakataki kemudou kecega e na siga o qo: 4ia kaʼu a vakacacana na lotu o qo ki na mate, ia kaʼu a vesuka ka biuta ki na vale ni veivesu na tagane e so ka so na yalewa. 5A sa tukuni au rawa ko na bete levu, kei ira kecega na qase: ni kaʼu a taura na nodrai vola vei ira na veiwekani, ka lako ki Tamasiko, meʼu kauti ira era sa tiko kina ki Jerusalemi ni ra sa vesuki, me ra cudruvi. 6Ia ka sa yaco, ni kaʼu sa lako yani, ka toro voleka ki Tamasiko e na siga levu tutu, sa dua na rarama levu sa cila vakasauri mai lomalagi ka vakavolivoliti au. 7Au sa qai bale ki na soso, ka rogoca e dua na vosa ni sa kaya vei au, I Saula, i Saula, o sa vakacacani au e na vuku ni cava? 8Au sa qai taroga, O cei beka ko iko, Turaga? A sa kaya ko koya vei au, Oi au ko Jisu na kai Nasareci, o koya ko sa vakacacana. 9A ra sa raica dina na rarama ko ira sa lako vata kei au, a ra sa rere; a ra sa sega ni rogoca na vosa i koya sa vosa mai vei au. 10Au sa qai taroga, A cava meʼu kitaka, Turaga? A sa kaya mai vei au ko na Turaga, Tu cake, ka lako ki Tamasiko; ia ena tukuni kina vei iko na ka kecega sa lesi vei iko mo kitaka. 11Ia ni kaʼu sa sega ni rai rawa e na vuku ni kena remoremo na rarama ko ya, era sa tuberi au ko ira sa lako vata kei au, kaʼu sa yaco kina ki Tamasiko.

12A sa dua, ko Anania, a tamata lotu dina me vaka na vunau, a sa rogorogo vinaka vei ira kecega na Jiu era sa tiko maikina, 13sa lako mai vei au, a sa tu, ka kaya vei au, Na wekaqu Saula, mo rai vinaka mai. Ia, e na tiki-ni-siga ko ya, kaʼu sa rai cake vua. 14A sa kaya ko koya, Sa digitaki iko na nodra Kalou na noda qase, mo kila na lomana, ka raici koya na Yalododonu, ka rogoca na vosa ni gusuna: 15ni ko na yaco mo dautukuni koya vei ira na tamata kecega e na ka ko sa raica ka rogoca. 16O sa qai vakaberabera tale e na vuku ni cava? tu cake, mo papitaisotaki, ka vuya laivi na nomui valavala ca, ni ko sa masuta na yaca ni Turaga.

17Ia ka yaco, ni kaʼu sa lesu tale mai ki Jerusalemi: ni kaʼu sa masu tiko e na vale ni soro, au sa raica na raivotu: 18ia kaʼu sa riaci koya ni sa kaya vei au, Kusarawa tani e Jerusalemi: ni ra na sega ni vakabauta na nomui tukutuku e na vukuqu. 19Au sa qai kaya, Turaga, era sa kila ni kaʼu a biuti ira ki na vale ni veivesu era sa vakabauti iko, ka vakanakuitataki ira e na vale ni lotu kecega: 20ia ni sa vakadavei na dra kei Sitifeni ko koya ka dautukuni iko, au a tu voleka talega kina, ka vinakata na nona mate, ka maroroya na nodrai sulu era sa vakamatea. 21Sa qai kaya vei au ko koya, Lako tani yani: ni kaʼu na talai iko vakayawa vei ira na veimatanitu tani.

22Ia era sa rogoci koya ka yacova mada na vosa o qo, era sa qai tabalaka cake na domodra, ka kaya, Me kau tani yani e vuravura na tamata e vakaoqo: ni sa sega ni dodonu me bula. 23Ia ni ra sa qoqolou, ka veibiuyaka na nodrai sulu, ka biuta na kuvu-ni-soso ki na cagi, 24sa kaya na turaga levu ni valu me ra kauti koya ki na bure ni valu, a sa kaya me tarogi ni sa vakanakuitataki, me kila ko koya se e na vuku ni cava era sa qolouvaki koya kina vakaoqo. 25Ia ni ra sa vauca tiko e na wa, sa taroga ko Paula vua na turaga sa tu kina, E tara beka vei kemudou mo dou vakanakuitataka na kai Roma, ka sega ni tarogi? 26Ia ni sa rogoca ko na turaga ko ya, sa laʼki tukuna vua na turaga levu ni valu, ka kaya, Mo nanuma na ka ko na kitaka: ni sa kai Roma na tamata o qo. 27Sa qai lako mai na turaga levu ni valu, ka kaya vua, Tukuna mai vei au, se ko sa kai Roma se segai. Sa kaya ko koya, Io. 28Sa qai kaya na turaga levu ni valu, E nai yau levu kaʼu sa volia kina meʼu lewe ni koro ko ya. A sa kaya ko Paula, Ia koi au, niʼu a sucu. 29Era sa qai lako tani sara vua ko ira sa lesi me ra taroga; a sa rere talega na turaga levu, ni sa kila e kai Roma ko koya, e na vuku talega ni nona vesuki koya.

30Ia e na sabogibogi ni sa via kila ko koya na kena dina ni ka era sa beitaki koya kina ko ira na Jiu, sa sereka na kenai vesu, a sa kaya vei ira na bete levu kei na nodra mataveilewai kecega me ra lako mai; a sa qai kauti Paula sobu mai, ka vakatura e matadra.

Currently Selected:

A Cakacaka 22: FIJ1864

Highlight

Copy