Lamentaciones 4
4
Toj tsots vocol laj yich' li lum Jerusalene
1¿C'uxi isoc li c'anal taq'uine?
¿C'uxi ich'ay xojobal li lequil c'anal taq'uine?
Li xch'ul tanaltac ch'ulnae jatsa xa
bu bejajtic batel ta chiquin xoraltic.
2Li yajvaltac Sione lec to'ox ich'bilic ta muc';
xjelov to'ox slequil ch-ilatic jech chac c'u cha'al bats'i lequil c'anal taq'uin.
Pero tana ja' xa jech ch-ilatic jech chac c'u cha'al jbej bin ti patbil ta lum yu'un jpatbine.
3Li me' oq'uiletique ta stuc'ulanic, ta xchu'untasic lec li yolique,
pero li jchi'iltac ta jlumale toj ven chopolic ta jyalel;
co'ol xa stalelic jech chac c'u cha'al avestruz mutetic xch'i ta xocol banamil.
4Li jchu'unom ololetique ipac'tsaj ta spac'oic li yoq'uic ta scoj taqui o'nale;
li bic'tal ololetique ta sc'an sve'elic, pero mu'yuc boch'o chac'.
5Li boch'otic lec to'ox noj xch'utique chchamic xa ta vi'nal ta xoraltic;#2 R 25.3; Jer 52.6.
li boch'otic toj jun yutsil to'ox bu ich'iic tale ta c'a'eptic xa nacalic batel.
6Li jchi'iltac ta jlumale ijelov to smulic
jech chac c'u cha'al smulic li cristianoetic ta Sodoma ta vo'onee,
ja' li lum ti ta anil no'ox i'ulesate,
ti ma'uc to uts oy boch'o ay scontraine.#Gn 19.24.
7Li banquilaletic yu'unic ta Jerusalene lec to'ox saquic jech chac c'u cha'al tayo;
mu to'ox sna' xatinic ic'ubal, jech chac c'u cha'al saquil ya'lel chu' vacax.
Lec to'ox chac ch'oxan sbec'talic, yu'un lec sololic;
toj to'ox lec c'upil sbaic jech chac c'u cha'al lequil ton.
8Pero li' ta orae i'ic'um satic jech chac c'u cha'al si'bac;
mu xa x'otquinatic ti c'alal chloq'uic ta xoraltique.
Ibacubic ta jyalel, jeche' xa pac'ajtic ta bac li snuculilique.
Solel itaquij xa sbec'talic jech chac c'u cha'al te'.
9Ja' jutuc no'ox svocolic li boch'otic chchamic ta espadae;
ja' toj tsots svocolic li boch'otic chchamic ta vi'nale,
yu'un li stuquique ta c'unc'un ch-ochbajic batel ta be
ta scoj ti mu'yuc bu sta c'usitic tstunique.
10Li lequil antsetic to'oxe, stuquic lic stsac li yolique;
yol stuquic lic span sti'ic ti c'alal ja'o tsots svocol li jlumale.#Dt 28.56-57; Lm 2.20; Ez 5.10.
11Yu'un tsots i'ilin li Muc'ul Diose, la sloq'ues tal scotol li sc'ac'al yo'ntone;
jech la stsanbe tal sc'ac'al li Sione; la xchic'be o c'alal ta snacleb.
12Li ajvaliletic ta banamil xchi'uc scotol li cristianoetic nacalic ta sbejel banamile,
xch'unojic ti mu xu' ch-ochentaat o yu'un yajcontra li lum Jerusalene.
13Ja' ta smul j'alc'opetic xchi'uc paleetic yu'unic,
yu'un la smalbeic xch'ich'al te ta lum li boch'otic mu'yuc smulique.
14Ja' yu'un jeche' xmachlajet chanovic ta xoraltic jech chac c'u cha'al ma'sat;
pixilic ta ch'ich', me jutuc mu stac' picbel li sc'u'ique.#Nm 19.11-16.
15Jech ch-albatic: “¡Loc'anic batel li'i! ¡Voc'o abaic ta jtojolcutic!”, x'utatic.
“Mu xa x'iq'uinic ta jyalel, mu xapiquic”, xi ch-albat sc'oplalic.
Jech ijatovic batel, la spuc sbaic batel ta yantic banamil.
“Mu xu' chcomic li'i”, xi sc'oplalic yu'un li yanlum cristianoetique.
16Li Muc'ul Diose stuc la sjip loq'uel ta sc'ac'al yo'nton;
mu xa sc'an sq'uel batel.
Muc xa x'ich'eic o ta muc' li paleetique;
mu'yuc bu abul sba i'ilatic li moletique.
17Altic ilub jsatcutic ta smala-malael li coltaele;
te jmala-mala chtal scoltauncutic li jun lume, pero mu xu' yu'un chcoltavan.#Jer 37.5-10.
18Solel pamuc'tabiluncutic bu chixanovcutic, jech mu xu' chiloc'cutic ta xoraltic.
Icomaj xa corailcutic, ic'ot xa jc'ac'alilcutic; ja' xa jlajebcutic o.
19Li jnutsvanejetic cu'uncutique ta vilel no'ox chtalic ta anil jech chac c'u cha'al xiquetic;
snutsojuncutic batel ta vitsetic, la smacuncutic ta be te ta xocol banamil.
20Laj xa yich' chuquel li st'ujbil ajvalil Muc'ul Diose#2 R 25.4-6; Jer 39.4-6.
ti la jnoptic ja' chispojutic yu'un jech mu xijchame;
ja' li boch'o jech laj caltic ta stojole:
“Ja' ta xyaxinal xu' chijcuxiutic te ta stojol li yantic lumetique”, ti xijchiutique.
21Edom, vo'ot ti te nacalot ta yosilal Uze, tse'inan, cuxetuc no'ox avo'nton,
yu'un te chtal ta atojol ec li sbel bis ti toj ch'a ta uch'ele;
yacuben chacomic, solel t'anal chacomic yu'un.
22Lum Sión, its'aqui xa li stojol amul c'u yepal sc'oplal chavich'e;#Is 40.2.
mu'yuc xa chabat o ta chuquel yan velta.
Pero li vo'ote Edom, ta xavich' avocol ec ta scoj li amule;
ta xavich' vinajesbel scotol li c'usi chopol apasoje.#Abd 1-12.
Currently Selected:
Lamentaciones 4: TZE97
Highlight
Copy
Compare
Share
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
