Lamentaciones 3
3
Ta slequil yo'nton Dios laj to yich'ic coltael li israeletique
1Vu'un laj quil lec li vocoletic ital ta scoj sc'ac'al yo'nton Muc'ul Diose.
2Laj yic'un batel ta ic'al osil, laj yac' xanovcun batel ti bu mu'yuc sac osile.#Job 19.8.
3Solel scotol ora, scotol c'ac'al te cajal o ta jba yalal sc'ob li Diose.#Job 7.16-19; Sal 88.7,15-16.
4Laj yuts'inta li jbec'tale, tuch'ultic sba yu'un li jnuculile;
solel la slilinbun scotol li jbaquiltaque.#Job 7.5; 30.30.
5Solel la setuun lec ta tsots at-o'nton, ta tsots vocolajel;#Job 19.12.
6laj yac'un ta ic' osil jech chac c'u cha'al li boch'otic vo'one xa yochelic ta ch'ene.#Sal 88.5-6; 143.3.
7La smacun ta jujujot, mu xa bu xu' xijelov o;#Job 3.23; 19.8.
la xchucun ta alal cadena.
8Ac'o me tsots xi'avet ta sc'anel vocol ta stojol,
pero muc stuc'ulanbun li jc'ope.#Job 30.20.
9La smacbun ta muc'tic ton li jbee;
la soquesun o ta be ta xanubal.
10Ja' jech la spas sba ta jtojol jech chac c'u cha'al jcot león ti lec xa snac'oj sbae,#Job 10.16; 16.9.
xchi'uc jech chac c'u cha'al jcot oso ti tsc'an xa chvoch'ivane.
11Laj yac' ch'aycun o ta be, biq'uitic la slilinun;
toj ven abul jba, jtuc licom yu'un.
12La st'ilesbun tal li sflechae;
la scuyun jech chac c'u cha'al xchanubil sc'ob.
13Li flechaetic yu'un Diose mats'ajtic ic'ot ta yut jbec'tal.#Job 16.12-13.
14Solel na'lebilun yu'unic li jchi'iltaque;
scotol c'ac'al tslabanicun ta q'ueoj.#Dt 28.37; Job 30.9; Sal 69.10-12; Jer 20.7.
15Li Diose toj tsots jvocol laj yac'bun;
toj ch'a ta jyalel li c'usi laj yac'bun cuch'e.#Job 9.18.
16Toj jtsiq'uel ic'ot stanal que ta tontic yu'un;
la sbalilanun ta pucuctic.
17Laj xa sc'oplal ti jun to'ox co'ntone;
ich'ay o ta co'nton ti lec to'ox oyune.
18Laj nop ti ich'ay xa o stsatsal li co'nton,
ti jmalaoj chiscoltaun li Muc'ul Diose.#Job 17.15-16; 19.9-10; 30.19.
19C'alal ta jnop ti toj c'ux jvocole, ti yalemun o ta lume,
mu xa xcuch cu'un chca'ay li yipale.
20Mu xch'ay o ta co'nton,
yu'un snet'ojun o yalel chca'ay.
21Pero oy c'usi yan ti mu xch'ay o ta co'ntone,
ja' yu'un ja' cochel smalael:
22Li c'uxubinel yu'un Muc'ul Diose mu'yuc slajeb;
mu sna' xlaj o li slequil yo'ntone.
23Ta jujun sob ta ach'um yan velta;
solel mu sna' xjel o li yo'ntone.#Ex 34.6-7; Sal 136.
24Ja' yu'un jech chcal:
ja' no'ox te ta jta o coltael ta stojol li Muc'ul Diose,
ja' yu'un ja' no'ox jpatoj o co'nton ta stojol.#Sal 16.5; 119.57.
25Li Muc'ul Diose toj lec c'usi tspas ta stojol li boch'otic ja' no'ox tspat yo'ntonic ta stojole,
ti ja' no'ox ta sa'ic coltael yu'une.#Is 30.18.
26Ja' lec ti ac'o no'ox jmala ca'itic
chiscoltautic stuc li Muc'ul Diose.
27Toj lec li boch'o ta sbic'tal ono'ox ta xcuch yu'un tsots taq'uiele.
28Te no'ox ac'o ch'anxiuc,
yu'un ja' Dios chac' tal li c'usi chtal ta stojole.
29Ac'o no'ox spatan sba ta banamil,
yu'un jech xu' to tsta li coltaele.
30Ac'o no'ox yac' ta majel xocon sat me oy boch'o tsc'an tsmaje;
ac'o sts'ic li tsots na'leel ch-ac'bate.#Mt 5.39.
31Yu'un mu j'ech'eluc chiscomtsanutic o li Cajvaltique.
32Ac'o me chijyac'butic jvocoltic,
pero chixc'uxubinutic noxtoc,
yu'un toj ep li slequil yo'ntone.#Sal 30.5; Is 54.7-8; 60.10.
33Yu'un mu xcuxetuc xa yo'nton c'alal chac'be svocol,
c'alal chac'be yat yo'nton li cristianoetique.
34Me chich' pech'el ta teq'uel li jchuqueletic li' ta banamile,
35me chmacbat c'usi tsc'an jun cristiano ta stojol li Boch'o oy ta toyole,
36me mu'yuc tuc' chapanel chich' jun cristianoe,
le'e mu sc'an jech li Cajvaltique.
37¿Boch'o xu' yu'un oy c'usi chac' c'otuc ta pasel
me mu'yuc chal mantal stuc li Diose?
38Me lec, me chopol c'usi chtale,
yu'un ja' jech chloc' ta ye stuc li Boch'o oy ta toyole.#Job 2.10; Is 45.7.
39Me cuxul li jun jpasmulil cristianoe,
¿c'u yu'un xbic'tal vulvun c'alal oy c'usi chc'ot ta pasel ta stojole?
40Jnoptic lec c'u x'elan li be jtamojtique;
sutcutic batel yan velta ta stojol li Muc'ul Diose.
41Ja' te ac'o cac' jol co'ntontic ta stojol li Dios te oy ta vinajele;
ac'o jtoy jc'obtic ta stojol, ac'o jc'opantic Dios jech chac li'i:
42“Li vu'uncutique ep jtaoj jmulcutic ta atojol;
ep la jtoy jbacutic ta atojol, muc xats'icbuncutic.#Is 55.7.
43“Laj apixuncutic ta sc'ac'al avo'nton, laj anutsuncutic batel;
laj amiluncutic, mu'yuc laj ats'icbuncutic.
44Laj apix aba lec ta toc,
yu'un jech mu xava'ay ti xivocoletcutic to ta atojole.
45Laj acomtsanuncutic jech chac c'u cha'al c'a'ep
ta stojol li yantic cristianoetique.
46“Scotol li cajcontracutique la sloq'uesic scotol li c'usi tsc'an yo'nton chalic ta jtojolcutique;
47puru xi'el, milel, tubesel, vocolajel xa no'ox oy ta jtojolcutic.
48Xco'laj xa xchi'uc uc'um chloc' ya'lel jsat
c'alal chquilbe xc'uxul svocolic li jchi'iltaque.#Jer 9.1; Lm 2.11.
49“Scotol c'ac'al xmalmun o ya'lel jsat;
me jutuc mu xcux ta oq'uel ta sventa ti mu'yuc coltael chquile,
50ja' to me la sq'uelun yalel tal ta vinajel stuc li Muc'ul Diose.
51Isol xa ta scotol jbec'tal ta scoj ti toj ep chi'oc'
c'alal chquil c'usi c'otem ta pasel ta stojolic li antsetic ta jlumale.
52“Li cajcontrataque ta jech no'ox la stsaquicun
jech chac c'u cha'al jcot mut.
53Cuxul la stiq'uicun ta jun natil joc';
la smaquic ta ton li sti'e.
54Solel limuc ta vo' jcotlijil;
laj nop ti te xa licham oe.#Jon 2.3-6.
55“Muc'ul Dios, la jc'anbot tal vocol ta atojol
ti c'alal te tiq'uilun ta yut natil joq'ue.#Sal 130.1-2.
56Laj ava'ibun li jc'ope;
muc xamac achiquin ti c'alal xivocolet ta atojole.
57C'alal la jc'opanote, lanopaj tal ta jtojol,
jech laj avalbun: ‘Mu xaxi'’, xavutun.
58“Cajval, vo'ot laj ava'an aba ta jcoltael ti c'alal laj quich' tsots vocole;
vo'ot laj apojun ti jech muc xichame.
59Muc'ul Dios, vo'ot aviloj lec scotol ti toj c'ux jvocole,
ja' yu'un pojun me.
60Aviloj scotol li c'usi chopol tsc'an chispasbicune,
xchi'uc li c'usi xchapanojic ta jtojole.
61“Muc'ul Dios, ana'oj scotol li c'usitic chopol chalbicune,
li c'usi chchapanic ta mucul ta jtojole.
62Ava'yoj scotol li c'usitic chloc' ta yeique;
scotol ora puru ta jcontra chc'opojic.
63Q'uelavil, c'alal chchotiic, c'alal chva'iique,
chislabanicun, sq'uejimolicun cha'yic o.
64“Muc'ul Dios, ac'bo stojol li yabtelique;
ja' jech xavac'be ti c'u x'elan lec xtojolin chavile.
65Pasbo ta tsots yo'ntonic,
yu'un jech ac'o c'otuc ta stojolic li c'usi chopole.
66Muc'ul Dios, nutso ta sc'ac'al avo'nton,
ac'o ch'ayuc o sts'unubalic li' ta banamil”, xi chcaltic.
Currently Selected:
Lamentaciones 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.