2 Crónicas 35
35
La spas q'uin Coltael li Josiase
(2 R 23.21-23)
1Li Josiase la spas q'uin Coltael#Ex 12.1-13,21-27; Lv 23.5-8; Nm 28.16; Dt 16.1-8. yu'un Muc'ul Dios te ta Jerusalén. Ta xchanlajunebal c'ac'al yochel li sliquebal ue la smilic li ch'ium chij sventa q'uin Coltaele. 2Laj yac'be spas yabtelic noxtoc li paleetique; laj yalbe ti junuc yo'nton ac'o tunicuc o te ta ch'ulna yu'un Muc'ul Diose. 3Jech laj yalbe noxtoc li levietique, ja' li jchanubtasvanejetic sventa scotol israeletic ti voc'bilic o ta stojol Muc'ul Dios sventa abtele: “Li ch'ul caxa li'i bat aq'uic ta ch'ulna ti pasbil yu'un Salomón xnich'on David, ja' li anima ajvalil yu'un jchi'iltactique, yu'un jech mu xa persauc chaq'uechilanic ta anecubic. Li' ta orae ac'o abaic o ta spasbel yabtel li Muc'ul Dios cu'untique xchi'uc ta sventa scotol li jchi'iltactique, ja' li steclumal Muc'ul Diose. 4Chapano abaic lec ta jujuchop abiic, xchi'uc ta jujuvoc' c'u x'elan chajelilan abaic ta abtel jech chac c'u cha'al laj ono'ox xchapan comel li David ajvalil ta Israele xchi'uc li xnich'one ja' li Salomone.#2 Cr 8.14. 5Comanic te ta ch'ulna vo'oxuc li levioxuque; jujutsob xapas abaic ta sventa li jujuchop sbiic jchi'iltactic ta israelale. 6Milic li chij ta sventa q'uin Coltaele; ac'o abaic ta lecubtasel. Chapanic c'usitic chtun, yu'un jech ac'o spasic c'usi yaloj Muc'ul Dios ta sventa Moisés li jchi'iltactique”, xut.
7Li ajvalil Josiase xchij stuc laj yac'be ti c'u yepal israeletic te oyique, yu'un jech ac'o spasic li q'uin Coltaele. Ja' laj yac' lajuneb xcha'vinic ta mil (30,000) ch'ium chijetic c'alal ta bic'tal tentsunetic, xchi'uc oxmil (3,000) ch'ium tot vacaxetic. 8Jech ec li j'abteletic yu'un ajvalile oy c'usi laj yac'beic ta yutsil yo'ntonic ec li xchi'iltaquique, xchi'uc ta sventa li paleetique, xchi'uc li levietique. Jech ec li Hilquías, Zacarías, xchi'uc Jehiel, j'abteletic ta ch'ulna yu'un Diose, laj yaq'uic cha'mil xchi'uc vaquib ciento (2,600) ta cot chijetic xchi'uc oxib ciento (300) vacaxetic sventa ac'o smilic ta q'uin Coltael ec li paleetique. 9Jech ec li Conanías xchi'uc xchi'iltac ta abtel, ja' li Semaías xchi'uc Natanaele, xchi'uc li banquilaletic yu'un levietic, ja' li Hasabías, Jehiel, xchi'uc Josabade, laj yaq'uic vo'mil (5,000) chijetic xchi'uc vo'ob ciento (500) vacaxetic sventa ac'o stunesic ta q'uin coltael ec li levietique.
10C'alal chapal yu'unique, lic stsac yabtelic li paleetique, xchi'uc lic xchol sbaic ta jujutsob li levietique, ja' ti c'u x'elan c'otem ta stojolic li abtel jech chac c'u cha'al yaloj mantal li ajvalile. 11Lic smilic ta sventa q'uin Coltael scotol li sts'unub yovolique. Li levietique ja' la xcho'ic. C'alal ja'o sbats'ilic xcho'ele, li paleetique ja' tsvijbeic ta scajleb smoton Dios li xch'ich'al ch-ac'batic yu'un levietique. 12La sloq'uesic scotol li xepu ti c'u yepal tsc'an chiq'uel sventa chaq'uic ta stojol Muc'ul Diose, ja' ti c'u yepal oy ta jujuchop sbiic scotol li israeletique, yu'un jech ts'ibabil ta svun li Moisese. Ja' jech la spasic noxtoc ta sventa li vacaxetique. 13Ts'acal lic svoic li chijetic sventa q'uin Coltael jech chac c'u cha'al sc'oplal ono'ox tspasique.#Ex 12.8-9. Li yantic matanaletic ti voc'bil xa ta stojol Diose la spanic ta binetic, ta calteraetic, xchi'uc ta xaltemetic. La spucbeic ta ora scotol li israeletique. 14Ja'o lic smeltsanic lec li c'usi sc'oplal ja' chich'ic xchi'uc li paleetique. Yu'un li paleetique mu xocobic o ta xchiq'uel li matanaletique xchi'uc li xepuetique; te oyic o c'alal to i'och ac'ubal. Ja' yu'un ja' lic smeltsanic li levietic smomnich'nab Aarone.
15Jech noxtoc li jq'uejimoletic, ja' li smomnich'nab Asafe, te tspas o yabtelic ec jech chac c'u cha'al yaloj ono'ox li David, Asaf, Hemán, xchi'uc li Jedutún j'alc'op yu'une.#1 Cr 25.1. Jech noxtoc li jchabi ti'naetique te oyic ta jujuch'oj ti'na muc scomtsan li yabtelique, yu'un ja' te tsmeltsanbat yu'un levietic li c'usi chtun yu'unique.
16Ja' jech yorail ichapaj yu'unic scotol li yabtel Muc'ul Dios sventa tspasic li q'uin Coltaele xchi'uc chchiq'uic li matanaletic jech chac c'u cha'al laj yal mantal li ajvalil Josiase. 17Scotol li israeletic te oyique la spasic li q'uin Coltaele, xchi'uc la spasic li vucub c'ac'al q'uin sventa tsve'ic pan ti mu'yuc yich'oj svolesubil xch'ute.#Ex 12.1-20. 18Yu'un ja' no'ox ta yorail c'alal cuxul j'alc'op Samuel la spasic q'uin Coltael te ta Israel jech chac c'u cha'al le'e. Xchi'uc mu'yuc yan ajvalil yu'un Israel la spas q'uin Coltael jech chac c'u cha'al la spas li ajvalil Josiase, xchi'uc li paleetique, li levietique, li israeletic te oyique, xchi'uc li yajvaltac lum Jerusalene. 19Li q'uin Coltael le'e ja' laj yich' pasel ta xvaxaclajunebal jabil yochel ta ajvalilal li Josiase.
Icham Josías
(2 R 23.28-30)
20Ts'acal to, c'alal chapajem xa'ox lec yu'un ch'ulna li Josiase, li Necao ajvalil ta Egiptoe tal stsac ta pleito li lum Carquemis ta nopol uc'um Eufratese. Li Josiase ibat smac ta be. 21Li Necaoe la stac batel mantal ta stojol li Josiase, jech laj yalbe batel: “Ajvalil ta Judá, ¿c'u yu'un ti tal acontrainune? Yu'un muc vo'ocot tal jtsacot ta pleito; yan lum tal jcontrain. Yu'un yalojbun Dios ti ac'o cac' persa scontrainele. Me chac'an lec oyote, mu me xamac ta be li Dios ti ja' chiscoltaune, yu'un naca me vo'ot chc'ot ta atojol chasmilot”, xut batel.
22Pero li Josiase muc sut batel; lic ono'ox spas pleito xchi'uc. Muc xch'un ti i'albat yu'un Necao ti jech yaloj Diose. Jech lic spasic pleito te ta stenlejaltic Meguido. 23Li j'ac'flechaetique lic yac'beic tal li ajvalil Josiase. Li ajvalile jech lic yalbe li yaj'abteltaque: “Iq'uicun loq'uel li'i, yu'un toj tsots xa t'abenun chca'ay”, xut. 24Li j'abteletique laj yiq'uic loq'uel ta scareta sventa pleito, te laj yaq'uic ta xchibal scareta. Laj yiq'uic batel ta Jerusalén, te ic'ot chamuc. Te bat smuquic yo' bu mucul li smoltotac ta vo'onee. Scotol li judaetic xchi'uc yajvaltac Jerusalene laj yoc'taic li Josiase. 25Li Jeremiase#Jer 1.1-2; 3.6; 22.10-15. la xchapan jun q'ueoj sventa at-o'nton, yu'un jech tsna'ilanic o li Josiase. C'alal chq'uejinic scotol li vinic antsetique, te tsna'ilanic o li Josiase. Ja' jech tsna'ilanic o c'alal to tana. Li q'ueojetic le'e ja' sq'ueojic icom o li israeletique; la spasic ta jun vun sventa sq'ueojal at-o'nton.
26Li yantic sc'oplal Josiase xchi'uc li lequil abteletic la spas jech chac c'u cha'al chal ta svunal mantaletic yu'un Muc'ul Diose, 27xchi'uc li c'usitic la spas ta sliqueb c'alal ta slajebe, te ts'ibabil ta svun ajvaliletic ta Israel xchi'uc ta Judá.
Currently Selected:
2 Crónicas 35: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.