2 Crónicas 36
36
I'och ta ajvalilal Joacaz
(2 R 23.31-35)
1Li israeletique ja' lic stiq'uic ta ajvalilal te ta Jerusalén li Joacaz xnich'on anima Josiase; ja' xq'uexol stot icom. 2Oxib xcha'vinic (23) jabil yich'oj ti c'alal i'och ta ajvalilale. Oxib no'ox u i'abtej ta Jerusalén. 3Yu'un li ajvalil Necao ta Egiptoe ital sloq'ues ta ajvalilal ta Jerusalén. La suj ti ac'o yaq'uic oxmil xchi'uc vo'lajunvinic (3,300) kilo saquil taq'uin scotol li judaetique xchi'uc oxlajuneb xcha'vinic (33) kilo c'anal taq'uin. 4Ja' la stic' comel ta ajvalilal sventa Judá xchi'uc Jerusalén li Eliaquim sbanquil Joacaze. La sjelbe sbi li Eliaquime; Joaquim laj yac'be. Yan li Joacaze laj yic' batel ta Egipto.#Jer 22.11-12.
Sc'oplal yabtel ajvalil Joaquim
(2 R 23.36—24.7)
5C'alal i'och ta ajvalilal li Joaquime,#Jer 22.18-19; 26.1-6; 35.1-19. yich'oj vo'ob xcha'vinic (25) jabil. Buluchib (11) jabil i'abtej ta Jerusalén. Puru chopolic yabtel ta stojol li Muc'ul Dios yu'une. 6Jech ital contrainatuc yu'un li Nabucodonosor ajvalil ta Babiloniae.#Jer 25.1-38; 36.1-32; 45.1-5; Dn 1.1-2. Chucbil lec ta cadena laj yic' batel ta Babilonia. 7Li Nabucodonosore laj yich' batel noxtoc li c'usitic chtun te ta xch'ulna Muc'ul Diose; te c'ot stic' ta ch'ulna yu'un ta Babilonia.
8Li yantic sc'oplal Joaquime, xchi'uc li sbol abtel la spase, xchi'uc li c'usitic ic'ot ta pasel yu'une te ts'ibabil ta svun ajvaliletic ta Israel xchi'uc ta Judá. Ts'acal ja' i'och ta xq'uexol xnich'on, Joaquín sbi.
Chucbil ibat ta Babilonia li Joaquine
(2 R 24.8-17)
9Vaxquib#36.9 Vaxquib - Ta versión Septuaginta chal vaxaclajuneb (18), yu'un jech xco'laj xchi'uc li 2 R 24.8. Ja' van ich'ay yu'unic li número 1. jabil yich'oj c'alal i'och ta ajvalilal li Joaquine. Oxib u xchi'uc lajuneb c'ac'al i'abtej ta Jerusalén. Puru chopolic c'usi la spas ta stojol li Muc'ul Diose.
10C'alal yorail q'uepelaltic ta jabil le'e, li ajvalil Nabucodonosore laj yal mantal ti ac'o yiq'uic batel ta Babilonia#Jer 22.24-30; 24.1-10; 29.1-2; Ez 17.12. li Joaquine xchi'uc scotol li c'usitic chtun te ta ch'ulna yu'un Muc'ul Dios ti toyolic stojole. Ja' la stic' ta ajvalilal ta Judá xchi'uc ta Jerusalén li Sedequías yuts' yalal Joaquine.#Jer 37.1; Ez 17.13.
I'och ta ajvalilal Sedequías
(2 R 24.18-20; Jer 52.1-3)
11Yich'oj jun xcha'vinic (21) jabil c'alal lic stsac yabtel li Sedequiase.#Jer 27.1-22; 28.1-17. Buluchib (11) jabil i'abtej ta Jerusalén. 12Puru chopolic c'usi la spas ta stojol li Muc'ul Dios yu'une. Muc sbic'tajes sba ta stojol li j'alc'op Jeremías ti ic'opoj ta sventa Muc'ul Diose.#Jer 37—39. 13Xchi'uc la stoy sba ta stojol li Nabucodonosor#Ez 17.15. ti ja' isujat ta yalel ta jamal ta stojol Dios ti tsco'lajes yo'nton xchi'uque. Solel la spas ta tsots yo'nton; mu xa sc'an sut o tal ta stojol li Muc'ul Dios yu'un Israele.
14Jech ec li banquilaletic ta Judae, xchi'uc li paleetique, xchi'uc scotol li jteclume ech'em ibat yu'unic li c'usi chopole; ja' la xchanbeic scotol sbol talelic li yantic lume. La sbolibtasbeic o li ch'ulna yu'un Muc'ul Diose, ja' li yavil bu ch-ich'at ta muc' te ta Jerusalene. 15Pero li Muc'ul Dios yu'un smoltot syame'ic ta vo'onee mu xnatilaj tstac tal yaj'alc'optac yu'un ac'o to sutes yo'ntonic, yu'un toj c'ux ta yo'nton li jteclum yu'une xchi'uc li yavil st'ujoj bu ch-ich'at ta muq'ue. 16Pero ja' no'ox la stse'intaic c'usi i'albatic yu'un li boch'o tacbilic tal yu'un Diose. Mu'yuc stu laj ya'yic; la sna'leic li j'alc'opetic yu'unique. Ja' yu'un li Muc'ul Diose la sloq'ues sc'ac'al yo'nton ta stojol li steclumale; mu xa stac' poxtael o.
Ichucatic batel scotol li judaetique
(2 R 25.8-21; Jer 39.8-10; 52.12-30)
17Ja' yu'un li Muc'ul Diose la stac tal ajvalil yu'un caldeaetic,#Jer 21.1-10; 34.1-5. vul smilic ta espada scotol li ch'ium queremetic yu'unic te oyic ta ch'ulnae. Me jutuc mu'yuc xa ts'icumal; c'alal ta querem ta tseb, ta moletic, ta syojoviltac vul smilic, yu'un i'ac'bat ta sc'obic scotol yu'un li Diose. 18Jech noxtoc scotol li c'usitic chtun te ta ch'ulna yu'un Muc'ul Diose, me muc', me biq'uit, xchi'uc li sc'ulejal ch'ulnae xchi'uc li sc'ulejal spasubmantaltac ajvalile, xchi'uc li banquilaletic yu'une, laj yich' batel ta Babilonia scotol. 19Jech noxtoc la xchiq'uic comel li ch'ulnae;#1 R 9.8. la sjinesic comel li coralton yu'un Jerusalene. Laj yac'beic comel sc'ac'al li pasubmantaletic yu'unique, xchi'uc laj yulesic o comel li c'usitic toyolic stojole.
20Li boch'o icolic to ta milel ta espadae laj yiq'uic batel ta Babilonia. Te la smozoinic o c'alal ta yalab xnich'nabic ja' to ti c'alal laj yich' lec stsatsal li ajvalil ta Persiae. 21Yu'un jech ac'o c'otuc ta pasel c'usi laj yal Muc'ul Dios ta sventa li j'alc'op Jeremiase, jech xu' chcux lec li banamile. Ti jayib jabil xocol icom li banamile la xcux lec, ja' to ti c'alal its'aqui lajuneb xchanvinic (70) jabile.#Jer 25.11; 29.10; Zac 1.12.
Smantal ajvalil Ciro
(Esd 1.1-4)
22C'alal sba to jabil i'och ta ajvalilal ta Persia li Ciroe, li Muc'ul Diose la stijbe yo'nton yu'un ac'o c'otuc ta pasel c'usi yaloj ta sventa li j'alc'op Jeremiase. Ja' yu'un li ajvalile lic spuc batel mantal ta scotol ti c'u smuc'ul sventainoje; la stacan batel cartaetic, jech laj yal batel: 23“Vu'un Ciroun, ajvalilun li' ta Persia, jech ta xcalboxuc tal mantal: Li Muc'ul Dios yu'un vinajele laj yac'bun jventain scotol li ajvaliletic li' ta banamile, xchi'uc laj yalbun ti ac'o yich' pasel jun ch'ulna ta Jerusalén#Is 44.28; 45.1-4. te ta yosilal Judae. Ja' yu'un vo'oxuc li steclumaloxuc Muc'ul Diose, bat me abtejanic. Ja' chascoltaoxuc li Muc'ul Dios avu'unique”, xi laj yal batel.
Currently Selected:
2 Crónicas 36: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.