2 Crónicas 34
34
I'och ta ajvalilal Josías
(2 R 22.1-2)
1C'alal i'och ta ajvalilal li Josiase,#Jer 3.6. yich'oj vaxquib jabil. Buluchib xcha'vinic (31) jabil i'abtej ta Jerusalén. 2Le'e lec tuc' c'usi la spas ta stojol li Muc'ul Diose; ja' la xchan c'usi la spas li smoltot David ta vo'onee. Me jutuc mu'yuc bu la stam yan be stuc.
Li Josiase la stuq'uibtas c'u x'elan ta ich'el ta muc' li Diose
(2 R 23.4-20)
3Ta xvaxquibal jabil yabtel li Josiase, lec laj yich' ta muc' li Dios yu'un smoltot David ta vo'onee. Li Josiase naca to'ox lec ch'ium querem. Ta xlajchabal jabil yabtele, lic smes loq'uel li c'usi mu xtun te ta yosilal Judá xchi'uc ta Jerusalene. La sloq'ues scotol li toyol c'opojebaletique, li sloc'obaltac Aserae xchi'uc li c'usitic yan spasojique, xchi'uc li c'usitic sloc'taojic ta unijesbil taq'uine. 4Te ta sat laj yac' ta lilinel scotol li scajlebtac smoton baaletique;#2 R 21.3; 2 Cr 33.3. biq'uitic la sc'an lilinbel li xchic'ubiltac pom te oy ta sba scajlebe. Laj yac' ta lilinel noxtoc li sloc'obal Aserae xchi'uc li c'usitic yantic sloc'taojique, xchi'uc li c'usitic loc'tabil ta unijesbil taq'uine. La spasic ta pucuc; te bat svijbe ta sba smuquinalic li boch'otic laj ono'ox smilbeic smotone. 5Jech noxtoc te ta sba scajleb matanaletic la xchic'be sbaquilic li paleetic yu'unique.#1 R 13.2. Ja' jech la smes loq'uel c'usi chopol ta yosilal li Judá xchi'uc ta Jerusalene. 6Ja' jech la spas noxtoc te ta lumetic yu'un Manasés, Efraín, Simeón, xchi'uc c'alal ta Neftalí. Lec xquechet la sa' scotol. 7C'alal ilaj yo'nton ta slilinel scotol li scajleb matanaletique, li sloc'obaltac Aserae, xchi'uc scotol li sloc'obal sdiosic ta scotol yosilal israeletique, isut batel ta Jerusalén.
La stabeic svunal li mantaletique
(2 R 22.3—23.3)
8C'alal laj xa'ox xch'uba scotol yosilal xchi'uc ch'ulna li Josiase, ta xvaxaclajunebal jabil yochel ta ajvalilale la stacbe batel yajval xchapanel lec li ch'ulna yu'un Muc'ul Dios yu'une. Ja' la stac batel Safán xnich'on Azalía, Maasías jpasmantal te ta lum, xchi'uc yajts'ibajom Joa xnich'on Joacaz. 9Te ibatic ta stojol banquilal pale Hilquías, c'ot yac'beic li taq'uin ti ich'bil loq'uel ta ch'ulna yu'un Muc'ul Diose. Ja' li taq'uin ti laj yaq'uic li smomnich'nabtac Manasés, xchi'uc Efraine, xchi'uc li boch'otic te to comenic ta Israele, xchi'uc li judaetique, li benjaminetique, xchi'uc scotol li jnaclumetic ta Jerusalene; ja' ti la stsobic li levietic ti chchabiic ti'naetique. 10Ja' xa laj yac'beic ta sc'ob li boch'otic ch-abtejique, ti chchabiic li ch'ulna yu'un Muc'ul Diose, yu'un ja' xa tstojic ec li boch'otic chcha'meltsanic li ch'ulnae. 11Ts'acal ja' laj yich' ta sc'obic li carpinteroetic, li jchanubtasvanejetic sventa abtele yu'un ac'o smanic li anbil tonetique, li xchucaltaque, li ts'amte'etic sventa chich' cha'meltsanel li naetic ti sjinesojic li ajvaliletic ta Judae.
12-13Li viniquetic le'e jun yo'nton la spasic li abtele. Ja' iventainatic yu'un li levietique, ja' li Jahat xchi'uc Abdías smomnich'nab Merarie, xchi'uc li Zacarías, Mesulam smomnich'nab Coate; ja' banquilal ic'otic. Ja' la sventainic noxtoc li j'icatsnometique, xchi'uc ja' laj yalic scotol li c'usitic abtelal tsc'an pasele. Scotol li levietique ja' yabtel tstijic sonetic, xchi'uc oy jayibuc ja' yabtel tsts'ibaic c'usi chc'ot ta pasel; oy jts'ibajometic xchi'uc jchabi ti'naetic.
14C'alal la sloq'uesic li taq'uin ti laj yich'ic batel te ta ch'ulnae, li pale Hilciase te la sta li svunal mantaletic yu'un Muc'ul Dios laj yal comel ta sventa Moisese. 15Ta ora laj yalbe Safán, ja' li boch'o tsts'iba c'usi chc'ot ta pasele, ti laj xa stabe svunal li mantaletic te ta ch'ulnae; te laj yac'be comel ta sc'ob. 16Li Safane ja' xa bat yac'be ec li ajvalile, c'ot xcholbe ya'ay scotol, jech laj yalbe:
—Ajvalil, li j'abteletic avu'une yochelic xa spasel scotol li c'usi laj avale. 17Laj xa yunijesic li saquil taq'uin te oy ta ch'ulnae. Laj xa yac'beic ta sc'ob li boch'otic chalic mantale xchi'uc li boch'otic sventainojic abtele —xut.
18Te lic yalbe noxtoc ti i'ac'bat jun vun yu'un li pale Hilciase; te laj yaptabe ya'ay. 19C'alal laj ya'ay ajvalil c'usi chal li svunal mantaletique, la sli' sc'u'. 20Ta ora laj yic' li Hilciase, li Ahicam xnich'on Safane, li Abdón xnich'on Micaiase, li Safán ja' li jts'ibajome, xchi'uc li Asaías yaj'abtel ajvalile, jech laj yalbe:
21—Bat jac'beic Muc'ul Dios c'u x'elan yo'nton cu'un xchi'uc li jchi'iltactic ti li' to comenic ta Israel xchi'uc ta Judae. Yu'un ti c'u x'elan chal li vun li' laj yich' taele, oy yic'al tsots ilinem ta jtojoltic li Muc'ul Diose. Yu'un li jtotic jme'tic ta vo'onee muc xch'unic c'usi i'albatic yu'un li Muc'ul Diose; muc spasic li c'usi ts'ibabil ta vun li'i —xut.
22Li Hilquías xchi'uc li xchi'iltac ti it'ujbat yu'un ajvalile ibatic ta stojol j'alc'op ants, Hulda sbi; ja' yajnil Salum xnich'on Ticva, smomnich'on Harhas, ja' ti oy ta sventa xchabiel c'u'iletic ta ch'ulnae. Li Huldae te nacal ta xchibal bario ta Jerusalén; te c'ot sjac'beic li c'usi bat sjaq'uique. 23Jech itac'batic:
—Li Muc'ul Dios yu'un Israele jech chal: ‘Jech xavalbe ya'yic li boch'otic tacbilic tal sventa oy c'usi chisjac'bicune. 24Jech chcal vu'un li Muc'ul Diosune: ta xcac'be tsots svocol li banamil li'i xchi'uc li boch'otic te nacajtique. Ja' ta xcac'be scotol li stojol mulil ts'ibabil ta vun ti laj yich' aptael ta stojol li ajvalil ta Judae. 25Yu'un la scomtsanicun; ja' bat smilbeic smoton li yantic diosetique. La sa'bicun sc'ac'al co'nton ta sventa li c'usi la spasique, ja' yu'un ta xcac' tsanuc li sc'ac'al co'nton li' ta banamile; me jutuc mu xtu'p o. 26Jech xc'ot avalbeic li ajvalil ta Judá ti stacojoxuc tal sventa oy c'usi chajac'bicune: Li Muc'ul Dios yu'un Israele jech chal noxtoc: Ta sventa ti laj avich' ta muc' c'usi chal li vune, 27xchi'uc ta sventa ti ic'ot ta avo'ntone, ti laj abic'tajes aba ta jtojole, ti laj ali' ac'u' c'alal laj ava'ye, xchi'uc ti laj avoc'ta aba ta jtojole, jech ec li vu'une laj ca'ibot li ac'ope. 28Ta xcac' ti jun avo'nton chachame, xchi'uc chcac' te chbat achi'in li amoltot ayame' ta vo'onee. Me jutuc mu'yuc chavil li tsots vocol ta xcac'be li banamil li'i xchi'uc li boch'otic li' nacajtique’, xi li Muc'ul Diose —xi li j'alc'op Huldae.
C'alal laj ya'yique, isutic batel, bat yalbeic li ajvalile. 29Li ajvalile lic stacan ta iq'uel li moletic ta Judá xchi'uc ta Jerusalene, yu'un ac'o stsob sbaic. 30Li ajvalile ibat ta ch'ulna yu'un Muc'ul Dios xchi'uc scotol li judaetique, li yajvaltac Jerusalene, li paleetique, li levietique, xchi'uc scotol li israeletique. C'alal ta muc' ta biq'uit te oyic. Te laj yaptabe ya'yic scotol c'usi chal li svunal c'usi chapanbil ti laj yich' tael te ta ch'ulna yu'un Muc'ul Diose. 31Li ajvalile lic va'luc ta sts'el li oyetic yu'un ch'ulnae; te lic yal ta stojol Muc'ul Dios ti ja' no'ox tsts'aclin o li Muc'ul Diose, ti ta scotol sjol yo'nton chch'unbe li smantaltaque, li chanubtaseletic yu'une, xchi'uc li c'usitic yan yaloje, xchi'uc li c'usi ts'ibabil ta svunal c'usi chapanbil yu'une. 32Laj yalbe li boch'otic te oyique, ja' li yajvaltac Jerusalene xchi'uc li benjaminetique, yu'un ac'o yalic ta jamal ta stojol Dios ec ti chch'unic li c'usi chapanbil yu'un Diose, ja' li Dios yu'un smoltot syame'ic ta vo'onee. 33Li Josiase la sloq'ues scotol li c'usitic toj chopol chil Dios te ta scotol yosilal israeletique. Li boch'otic te to oyic ta Israele laj yalbe ti ja' no'ox ac'o yich'ic ta muc' li Muc'ul Dios yu'unique. C'alal cuxul li Josiase, mu'yuc bu la scomtsanic o li Muc'ul Diose, ja' li Dios yu'un smoltot syame'ic ta vo'onee.
Currently Selected:
2 Crónicas 34: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.