Jacques 1
1
Jacques ateye bato ba Nzambe bwe, badyalaka chabo o cha kièlèlè.
1Jacques, mochali a Nzambe na Mokonchi Jésus Christ, abèche madia dyomu na mabale, mango maphanchanaki.
2Banyango ba baphele ba nga b’èbati a Nzambe, botangaka maphèphi moto elenge elenge mango mate na beni ko moni mochò bona,
3boyebaka bwe, beka bichò byango bimeke echingane a beni bitubize chabo.
4Tika chabo ekiele botoma ba yango kot’èkielele, echoko beni bodyale banyèki na bobitunywiba yango, n’èyeka nyò yò tichèngi na beni.
5Ko, mo moto mò o phanyak’a beni achenge bolèngi, tika wango ayonge bwango na Nzambe, koncha wango edi n’ikabo na bato bachò, n’adi wochako twa, na bwango tophèba na wango.
6Ko, tika wango ayonge n’èchingane, ophomunya ka tonga koncha wango ephomunye awule chokel’a may manè wango enguchi ephukize n’èdumbe.
7Tonga moto èlenge yena adi ochimunya bwe, wango ayambe eyeka a Mokonchi ka,
8moto wango adi na motema biba bibale, na wango andandange o manè ma wango machò.
9Tika mwanyango a bole a Nzambe, wango atulize nchoto achange o bango bakondize wango o ch’a Nzambe,
10ko, koncha wango edi mandi, tika wango akiele elenge ko yango o bango batulize wango.
11Tonga bucha bokondelaki, na yangal’a bwango ewomizaki byembu, na biphuncha ba byango bikwaki, n’èdyalele enyòngò a byango elengwaki; na moto a mandi tawoma elenge ko yango o manè ma wango.
12Koncha wango ebandame n’ètungu o ch’a maphèphi adi n’ilèmu, tonga o wango abichil’omekibe wango tayamba ngul’a bomwè, wango Nzambe alakaki bakoncha bango badinge wango.
13Tika moto nyò mò adyale oloba bwe: Nzambe aphèphize nga ka, tonga Nzambe adi ophèphiba n’èyeka ebè ka, na wango koncha adi ophèphiza moto nyò mò ka.
14Ko, moto ikika adi aphèphibe okomo phongo a wango koncha alutize n’abembize wango.
15Chima phongo akindaki, wango abote bochuma, ko, o chima bochuma buchil‐otunywibe bwango bobote bowe.
16Banyango ba baphele ba nga b’èbati a Nzambe bakonde, tolengwake!
17Matabichi manyòngò machò na matabichi manyèki machò machònò ikolo ma Chango a phololo, edyalele a wango edi ochekwa ka, n’èdyalele a wango edi ko yò biteneli.
18Ko bodingo ba wango bobèki bona, wango abotaki banga na mawò ma nènè, echoko banga todyala beka ba tabocho o phanyak’a beka byango wango atulaki bichò yango.
19Boyebaka bwe, banyango ba baphele ba nga b’èbati a Nzambe, tika moto ikika awoke dyolo, ko, talobake dyolo, na tabeleke dyolo.
20Tonga n’ibèli a moto idi otubinya beka binyèki o bocho ba Nzambe ka.
21Kobona bomichaka mbindo ichò na beka bakbwi bibè bichò, na boyambaka mawò mango mabiphikiba na ndèphè, mango mayiche bophakole mamwè ma beni.
22Towokake mawò mowoka phencha, ko, bokielaka mango, ta beni bochukwiza ebati a beni makoncha n’ichena.
23Tonga mo k’òwoke mawò mowoka phencha, mo k’òdi okiela mango ka, owana k’òdi ko koncha wango etokolo bocho ba wango o tatala bona,
24chima o wango achilaka botokolo bocho ba wango, wango alangwe n’abunge elenge a wango koncha dyolo.
25Ko koncha wango etokolo o cha miyeko minyèki kot’ètokolo, miyeko myango michekole bato bachomi, na abandame o ch’a myango, odyala ko koncha wango ewoke mowoka n’abunge myango bona ka, ko adyalaka ko koncha wango ewoke myango kot’èwokele bona, na kobona wango tadyala na moni o cha botoma ba wango.
26Mo moto achimunye bwe, wango akiele botoma ba Nzambe, ko wango adi ochiba bolèmu ba wango ka, owana wango achukwize ebati a wango koncha n’ichena, na kobona botoma ba wango b’ichambela bodi bwabona.
27Botoma b’ichambela bwango bodi cheche na biphebo twa o bocho ba Nzambe na Chango, bwango bodi kobona, bokiè bokieka bana bango badi batike, na bachani o ch’a kièlèlè a bango, na bochobe ebati a wikoncha cheche o che.
Currently Selected:
Jacques 1: BUI1947
Highlight
Copy
Compare
Share
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
