Hébreu 12
12
Apôtre ateye bèni bwe, bolondo bandèngè b’èchingane kot’èlòndòlò.
1Na kobona kinòwa o bèni bochaka n’èbuliki enè a bandèngè, tika bèni bomiche beka byango biwunduze bèni, nà machuma mango mayengazane na bèni, na bobandame nikichi n’ètungu o ncha momeko mwango mobitikiba o bocho ba bèni.
2Na mo bèni bokieke Jésus, mokonchi m’èchingane, mwango mobitunywiba, wango achèbèki ichèbo awechinye ika a moni mwango mobèki o ncha bocho ba wango, wango abowa kacha tonga na dyanchi, dyango tiyephila wango ka, na kinòwa adi bwa ebati èlomi a kiti a Nzambe.
3Ko beni bochimunyaka koncha wango bato ba machuma balekaki eyètènè na wango, mòchi biyaye ba beni bidyale okondo ka.
4O cha bita ba machuma byango bidi na beni kokoko ncho kinòwa, beni boch’ochèbè ichèbo ikuli dyango itubize beni malongo ka.
5Na beni bobibunga tètè kot’èbungele mateyo mango maphèbaki na beni, motwatwa ko bateye bana ba baphele bona bwe: ”Mwan’a nga a bole, tòbwakake mochimbako ma Mokonchi bwe, edi mateyo m’iphwa, na tòkondoke okomo mwango mophè kò mateyo m’ichèbo.
6Tonga koncha wango Mokonchi modinge, mwango moleki ephelele wango mateyo m’ichèbo, na mwango mobinze bana ba baphele bachò bango mwango moleki edingele ngièkèkè.”
7Okomo beni bote n’ichèbo, owana yena edi ncha ikatiza beni kot’èkatibe; Nzambe akiele na beni ko ekielele ikiela na bana ba baphele bona.
8Tonga mo bana baninga bachò bayambaki ichèbo dyango, ko, beni twa, kobona ibè beni bodi odyala kota bana ka, owana beni bodi bana b’inganchi.
9Na dyòkò bwe, kutèkè okomo bachango ba bèni b’èbati a nchoto baphèki bèni mateyo m’ichèbo, bèni bokiekaki bango na kilo, twana kobona bèni tileki etulize manchoto ma bèni o bocho ba Chango a biyaye, mòchi bèni bodyale na bomwè?
10Bochango ba bèni baphèki bèni mateyo m’ichèbo bobiko boki bona, ko bango bachinganaki o edyalele yango eleki bonyòngò, ko Nzambe aphèki bèni mateyo m’ichèbo ebèki tonga n’iphè bèni kota bonyòngò, tonga n’iyèchangana na wango o èchwa a wango.
11Eyènènè tètè kinòwa bwe, machèbo machò madi mo ko kièlèlè phencha, moni twa, ko o chima yango mango tabota mbuka a phi, n’èchwa na bakoncha bango bakataki o cha mango.
12Na kobona bolendizaka mabòkò mango madi na lèlèkè, na mangoto mango mayèyèkè
13na bokielaka manè ma beni lengenge, mòchi ekolo yango etambole n’ichèku edyale owunwangana ka, mòchi yango ebele ika iwunwangana.
14Bodyalaka phi na bato bachò, na boyenga echwa, tonga mo echwa twa, edi moto iyicha boyènè Mokonchi twa.
15Na bokiekaka n’ikièngu, ta moto nyò mò ayechumbiza grâce a Nzambe, mòchi modi ma molòmbò modyale otèzè dyòkò ka, na kobona mòchi ebuliki yena edyale okula molòmbò ka.
16Bokièkaka n’ikièngu ta moto nyò mò adyala moto a bochembi na echwa twa ko Esau bona, koncha wango etèkizaki botuki ba wango ba mata, tonga n’èlambo yò phencha.
17Beni boyebe nchu bwe, Esau achukinyaki nch’idwa botuki bwango bokatwibaki na wango na mbembe, ko ebòki dyò ncha idwa bwango twa.
18Beni bobophola o bokoli bwango bodi ophiliba ka ka, bwango bololaki, nyò bokutuchanga nyò boyi, nyò enguchi,
19na makingo ma malimba kotwa, na ikingo dyango ilonchaki, na kobona bakoncha bango bawokaki dyango balobaki bwe, dyò bango phocha iwoka dyango twa.
20Tonga bango baboyicha dyò bowoke moyeko mwango baphèki bango bwe: ”Mo nyò edyale nyama mo wango aphole o bokoli bu, taboma wango na maboko,” ka.
21Tonga eyeka yango eyènibaki tètè ekuli kobona, na Moïse alobaki bwe: ”Nga tile na nga wate na bobo.”
22Edi nchu tonga beni bophola o bokoli ba Sion, mboka a Nzambe a bomwè, edi Jérusalem a ikolo, enongo yango edi bangelo bakama, bango badi oyicha bobalibe ka,
23ebuliki a bokolo bato, na a bana ba baphele ba tabocho, tòtè a bango edi ko Nzambe, a bango bachò, na biyaye b’èchwa byango bibitunywiba,
24na o ma Jésus, koncha wango edi mochungi a kano etemu, na o ma malongo mango matangaki, mango maleki malongo m’Abel bonyòngò.
25Bokiekaka n’ikièngu ta beni bonakola koncha elobe na beni. Tonga mo b’èlongo yango baboyicha bokochwe na koncha wango echakolaki bodingo ba Nzambe o che woni ka, twana bèni toyicha bokochwe bwe, mo bèni tonakola koncha wango echakole bodingo ba wango, bwango bochònò o ikolo.
26Ikingo a wango inyalwizaki che, ko kinòwa wango abiphè ilakako bwe: ”Nga tanyalwiza dyò inyalwicha, dyò odyala che phencha ka, ko nà ikolo dyòkò.”
27Mawò ma mayènize bwe, beka byango bitulibaki biyiche bowate, tonga byango bitulibaki na byango tiyenchiba, tonga beka byango bidi oyicha bowate ka, byango titenela.
28Na kobona mo bèni tòyamba bokonchi bwango bodi oyicha bowate ka, tika bèni bophè ingòko, na kobona owana bèni bokiele mochalo ma Nzambe mango mwango mophè Nzambe moni na mowato na bobo b’èchwa.
29Tonga Nzambe a bèni adi meya myango mitumbe.
Currently Selected:
Hébreu 12: BUI1947
Highlight
Copy
Compare
Share
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
