Roma 2
2
At Allah en aphwami wene enebam pasulat, noʼgorliselat, hegitsogo tiso wene
1Ai holuk e, his narilak norokhwi yu. Wene is pema nak enebam pogularat de, his honuʼgwarek henebam noʼgorlu mia o. Asogo wene is pema nak enebam pogulat e, his ogo is enemin hegirat togu legep yema re! Honuʼgwarek en wene henebam modok pagathorlogu legep o. 2Aphwami enebabut asogo togwi aʼge, Allah en wene enebam hegitsogoat pasu, oluk nenaluk o. 3His narilak norokhwi yu. His en, is logon wiak togumu wene enebam pogulat e, honuʼgwarek ogo re, is togwi ʼgelaʼgeat enemin hegirat togu legep yema re! His honogola en e,
“Allah en wene nenebam po erlakma en uknonobouwa,” oluk opogu legep a? Erlak o. Wene henebam pouwayat o.
4“At Allah ebabut op modok, enago lioktak o,” oluk, honogola mi-miarak pogu legep a? His honogola en e,
“Allah ebabut op en nis wiak togu lege aʼge ukpoluk nenebabut heberlemagoluk, nonogola ʼgagaliso yo,” oluk e, heneperlak no? Henalugat o. 5-6Eniak hologo henebabut heberlu puk yema re! O ologun pam Allah olot het emarik e, aphwami enebe loʼbok enebabut togwi hegitsogoat, selakma enat wene enebam pasulat, noʼgorliselat, tua ai erlige, his wene henebam pouwagoluk honuʼgwarek en wene henebam pogwi modok welegep yema re! 7At Allah en e, is aphwami pema en enebe erligonobogwi aʼge emin, hau doʼgoksogo waronobogwi aʼge emin, muk ago erlak aʼge emin, eiye omogoluk enepe mosogo welat enebabut hegitsogo togwi aʼge, enebe enelaluk modok welemagoluk tagonobouwa o. 8Asogo aʼgeat de, is aphwami pema en onuʼgwarek paget nak togulat e, dem wene ogwiam enesaʼgo hwelak poluk tu pukmu en ukpoluk, wiak wene nak enesaʼgo hologo togwi aʼge ai, Allah olot het-ʼbet oluk wene loksogo enebam pouwa o. 9-11At Allah re, aphwami enagap pam nak il ontoluk, mesik olukhwema pasulat, mesik oʼborloma pasulat, tago erlak ai en e, is aphwami logon enebabut wiak togwi modok welagai aʼge enebe loʼbok e, nonouk togulat di obotut yu obotut houwagoluk tagonobouwa o. Aʼgeat de, is aphwami logon enebabut op togulat welagai aʼge enebe loʼbok e, enebe erligonobogwi aʼge emin, hau doʼgoksogo waronobogwi aʼge emin, enede haʼbuksogo welagai aʼge emin, wogontouwa o. Asogo tagonobouwa ai re, is naduk aʼge ʼgelaʼge Yahudi aʼge emin, pobuk aʼge ʼgelaʼge, Yunani aʼge enaʼgul onuk loʼbok logon emin, eneminat, hegitsogo nak tagonobouwa o.
12Is aphwami oʼborl oʼgwe aʼge wene Allah en nenesaʼgo weregei wene ano eneperlak welat wiak togumu no oluk e, wene ai eneperlak welat nalema o. Aʼgeat de, is aphwami Yahudi aʼge wene ai enaluk welat wiak togumu no oluk e, wene ai en enemdema wokho wene enebam pouwa o. 13Wene Allah en nenesaʼgo weregei wene ano enaluk ai en, wene enebam aʼge noʼgorlogo wokhasu erlak o. We, wene ebe nenesaʼgo werige aʼge hegitsogo togwi aʼge holugat, wene enebam aʼge noʼgorlogo wokhasu o. 14Is aphwami oʼborl oʼgwe aʼge wene Allah en nenesaʼgo weregei aʼge ano eneperlak aʼgeat de, wene ebe egei aʼge hegitsogo togwi ai en, onuʼgwarek onogola wene nenesaʼgo weregei wene ai ʼgelaʼgeat oruak o. 15-16Wene ai enedemu pelal wogo ʼgelaʼge oruak oluk, is enebabut togwi aʼge pam enagat oruak o. Asogo oruakma no oluk e, pobuk o ologun pam Allah en Yesus Kristus yoʼgo pasuam, at en aphwami onogola di wene yu wene hisogo welago aʼge ai ʼberlegat ʼbaksogo wene enebam pasulat, noʼgorliselat, tisokhwe, is onuʼgwarek onogola wenemennei eberogulat,
“An demat wiak tegismu o,” oluk wene enebam pagathorlogulat,
“Erlak, an op tegismu o,” oluk wene enebam aʼge noʼgorlogulat, tua o, olu wene op wene ano pam egeimu, an en moʼgulhentegis ebano re.
“Aphwami Yahudi demat Yahudi aʼge salak no,” oluk moʼgulentesi wene
17Asogo aʼgeat de, his en e,
“Nis nenebe Yahudi demat Yahudi aʼge o,” oluk ogulat, henede wene Allah en nenesaʼgo weregei wene ano pam heʼberik welat,
“Allah ai nis nenaik o,” oluk erliktogu legep yema re! 18His en e,
“Allah ogola en e,
Disogo tuak, asogo tuak, oluk ogola epasu ai nenalukmu re,
Ai op, ai wiak, oluk Allah en nenesaʼgo weregei wene pobirak poluk en hegitsogo tu o,” oluk pobi togu legep ai o. 19His en e,
“Aphwami enil hopnik aʼge nis en eneʼgik tenakho elirat wogonoboluk lo yo. Ye, nenebe esaga ʼgwielak ʼgelaʼgeatma re, aphwami o hiktakma welagai aʼge ai elirat ʼgwielak onobo yo. 20Ye, wene Allah en nenesaʼgo weregei wene ano nis en tenak welegerikmu re, di wene yu wene nenaluk welat wene demat aʼge nak moʼgulontogu lege ai en e, aphwami enede ebis aʼge moʼgulontogulat, malik wei aʼge wene moʼgulontogulat, elirat tu o,” oluk ogu legep ai. 21Asogo is aphwami logon moʼgulontogularat de, his honuʼgwarek moʼgulogu legep erlak yema re! His en ogulat e,
“Yogot wagup,” oluk is logon moʼgulontogularat de, his honuʼgwarek yogot wogu legep yema re!
22“Hwami yogunat tenentagup o,” oluk moʼgulontogularat de, his honuʼgwarek en hwami tenontogu legep yema re!
“Dogwi asua ogut de, werik aʼge ai modok nebit e,” oluk ogularat de, di aʼge yu aʼge dogwi asua owi pam oruakma yogorlia wogu legep yema re!
23“Wene Allah en nenesaʼgo weregei wene at Musa en moʼgulnentesi aʼge wene ano an naluk o,” oluk ogularat de, wene ai ukpoluk wiak togwiam, is pema en Allah onuk ogulat e, obok wiak ogwi ai, his en Allah onuk wiagap pogu legep yema re! 24His en togu legep ai paget, Allah iak pelal disogo wogo oruak,
“His henebabut asogo togup ano pam,
is aphwami oʼborl oʼgwe aʼge en,
Allah onuk ogulat, obok wiak ogu lemayat o,” (Yesaya 52:5)
oluk egeimu wene pelal wokho pegesa hegitsogoat togu legep o.
25His e, wene Allah en nenesaʼgo weregei wene ano hwelak poluk togu legep holuk e, henagap heneʼgerlimu aʼge ʼbaligep ai re, op modok u o. Aʼgeat de, wene ai hologo togwi erlak holuk e, henagap ʼbalogu legep ai almasogo ʼbalogu legep ai en e, ʼbelak erlak aʼge ʼgelaʼgeat welegep o. 26Ye, is aphwami logon enagap eneʼgerlimu aʼge ʼbelak erlak welat, wene Allah en nenesaʼgo weregei wene ano hologo togwi holuk e, at Allah en e, enagap eneʼgerlimu aʼge ʼbelak erlak aʼgeat de, ʼbelak aʼge ʼgelaʼge ua erlak no? ʼBelak aʼge ʼgelaʼgeat ua o. 27Ye, his Yahudi aʼge, wene Allah en nenesaʼgo weregei wene ano his eiye welat, henagap heneʼgerlimu aʼge ʼbalogu legep aʼgeat de, wene ano hologo togwi erlak, sagalogo ukpoluk wiak togu legep ai en, aphwami logon enagap eneʼgerlimu aʼge ʼbelak erlak aʼgeat de, wene Allah en nenesaʼgo weregei wene ai hegitsogo togwi ai nak e, is en wene his henebam pouwa o. 28Aphwami Yahudi demat Yahudi aʼge ai ebe re, selakma aʼge ai puk. Ye, enagap eneʼgerlimu aʼge ʼbalogwi ai ebe re, enagap eneʼgerlimu aʼge ʼbelak ai pugat o. 29Aphwami Yahudi demat Yahudi aʼgeat de,
“An nebe Yahudi aʼge nagap neʼgerlimu aʼge ʼbelak welegi o,” oluk suesiʼga pam pelal wokho pogwi ai paget puk. Erlak o. We, enagap ʼbelak ebe demat aʼge re, enagap eneʼgerlimu aʼge ʼbalu ʼgelaʼge, Allah Arogun en enedemu aʼge degelogo lebikpasu aiat o. Aphwami enedemu asogo degelak oruak holuk e, aphwami logon en erligonobogwi puk. We, at Allah enat erligenebiso yo.
Currently Selected:
Roma 2: WUL
Highlight
Share
Compare
Copy
Want to have your highlights saved across all your devices? Sign up or sign in
