Roma 3
3
1Asogo aʼgeat de, is aphwami logon en e,
“Is Yahudi aʼge op o,” oluk ogwi ai, nopaget ogwi epegep. Ye, enagap eneʼgerlimu aʼge ai nopaget ʼbalogwi epegep. 2Ai re, di paget yu paget ʼberlegat op nak. Wene ai ebe seʼgeksogo moʼgulhentaik. Mesik Allah en e,
“An niak is elirat tenak welema o,” oluk, isat moʼgulentasu laga. 3Aʼge re, is aphwami Yahudi aʼge ado pema wene ai hologo welat enede heʼbisogo togwi erlak ai en noʼgot ema epegep. Is enebabut Allah iak hologo welat enede heʼbisogo wolom puk ai en e, Allah ede heʼbisogo tago aʼge ai erlak emarik ebakhenne tua epegep? 4Modok erlak o. Aphwami enebe loʼbok eniak esei yenat loʼboksogo ogwi holuk e, Allah iak demat nak oso, oluk wene pelal wokho pogulat e, disogo egesa,
“Hat Allah hiak demat nak osoam demat nak ago.
Aphwami en mabenaphobouwogoluk togwiam e, hat e, maben ago erlak o.
Hanni nak welago yo,” (Mazmur 51:4=TB 51:6)
oluk pelal wokho pegesa ai.
5Aʼge re, nis aphwami en e, nenebabut wiak togu lege ai pam en e, Allah ebabut hegitsogo tago oluk enagat ago holuk, noʼgosogo u no. Aphwami en ogwi ʼgelaʼge ik o. At Allah olot het agalat wiagabenebiso ai wiak no? 6Modok erlak o. At Allah ebabut wiak wellepma re, di aphwami yu aphwami ʼgwiangma aʼge yema, enebabut ʼbalogo wene enebam pasulat, noʼgorliselat, noʼgosogo telip o. 7Aʼge re, hat mesik en eselat e,
“An niak eseiyat loʼbokholuk osoam e, Allah iak demat, oluk, modok enak ago ai o. Asogo enagat agoam e, is aphwami logon en Allah ebe erliktogwi ai. Holuk e, an nebabut ʼbalogo re, at Allah en,
At wiak tago, oluk wene nopaget nebam po yo,” oluk elirat u no? 8Is aphwami pema en e,
“Paulus lak en disogo ogwi,
Nis wiak togwiam ologun pam Allah erliktuagoluk, wiak togu lomul o,” oluk, eniak eseiyat loʼbokholuk nonobok ʼbalogwi ai o. Aphwami asogo ogwi aʼge ai re, Allah en wene enebam po hegitsogoat pouwa o.
Aphwami enebabut hegitsogo togwi erlak welat wiak nak togwi wene
9Holuk e, nis Yahudi aʼge nak e, op agaihwe re, is oʼborl oʼgwe aʼge nal agalat tu no? Modok erlak o. Aphwami Yahudi aʼge et, Yunani aʼge et, ʼberlegat laʼbuksogo wiak aʼge eragam welat wiak togwi nak o, oluk naduk moʼgulhentegis ai o. 10Allah en asogoat egeimu, pelal wokho pogulat e, disogo egesa,
“Aphwami enebabut hegitsogo togwi aʼge mesik e, erlak o.
Mesigat nak holuk ogo mesik erlagat o.
11Ye, aphwami wene pobi togwi aʼge mesik erlagat o.
An Allah nebe dokhumsogo enaluk omogoluk palo nobogwi aʼge mesik erlagat o.
12Enebe ʼberlegat an neʼbek hegitsogo wagai erlakma en,
ʼgwi-ʼgwani lobotluk ebela arat nal agalat alemat egesa o.
Enebabut op togwi aʼge mesik erlagat.
Mesigat nak holuk ogo mesik erlak o. (Mazmur 14:1-3, 53:1-3=TB 53:2-4)
13Aphwami enebe werak aʼge salonobogumu,
eba en eʼben libago ʼgelaʼge,
is eniak eʼben wiak aʼge libagalat,
enemage adugaltakma re, aphwami lalonobogulat,
ʼgosu iak en sarluktak enebasuam waragai ʼgelaʼge,
is enemdema en wiagabonobogulat, togwi ai o. (Mazmur 5:9, 140:3=TB 140:4)
14Eniak olotnu wiakma re, heman onobogwi aʼge onogola ʼbeterak welat en de, ogwi modok oruak. (Mazmur 10:7)
15Aphwami enebe waronobuogoluk holuk e,
onoyuk elalue wiak lagai.
16Aphwami o di owi yu owi enebe wiagabonobogulat,
onolot herabonobogulat, til lagai ai o.
17Aphwami pema enemin opsogo laʼbulogo wolom e, eneperlak o. (Yesaya 59:7-8)
18An Allah hau doʼgoksogo watnobogwi modok erlagat o,” (Mazmur 36:1=TB 36:2)
oluk egeimu wene pelal wokho pegesa. 19Wene Allah en nenesaʼgo weregei wene ai, is hwelak wolom aʼge nak moʼgulentesi, oluk nis nenaluk. Allah ematek en aphwami o di owi yu owi ʼberlegat wene enebam pasulat, noʼgorliselat, tisoma, at mesik en wene ebam noʼgorlu mia emagoluk nenesaʼgo weregei ai. 20Wene Allah en nenesaʼgo weregei wene ai pam en, nis aphwami wiak togu lege aʼge ʼbagoso ai en, nis ʼberlegat wene at en nenesaʼgo weregei wene ai hwelak welat, at ilem hegitsogo tu mia o. Hologo togulomma re, at en emin pobuk hwedik taknonobo aʼgeat de, miayat o.
Aphwami enede Yesus ebam heʼberik pogwiam e, pobuk Allah emin hwedik tagenebasu wene
21-22Asogo aʼgeat de, yogodak Allah en, at emin hwedik taknonobo wene ano selakmayat pesimu oruak o. Ai re, nenesaʼgo weregei wene ai hwelak poluk hegitsogo togu lege ano en, pobuk hwedik taknenebaigoluk egei puk. At e, nis nenede Yesus Kristus ebam heʼberik pogwiam hwedik taknenebaigoluk egei o. Asogo hwedik taknenebaigoluk, obok wene at en nenesaʼgo weregei wene ano pam eselat, at iak moʼgulontogu legesa aʼge en ogulat, egesa hegitsogoat hwedik takhenebaigoluk tegei ai o. Ai re, nis aphwami ʼberlegat nenede Yesus ebam heʼberik pogu lege aʼge hun domok erlak o. We, nenemin hegitsogo hwedik taknenebaigoluk tegei o. 23Nis aphwami ʼberlek page enat wiak togu lege ai pam, Allah ebe erliktogwi modok welagai aʼge ai ukpoluk nenematekma walek lai legerik welege o. 24Asogo oruakma, at wiak aʼge en herle wusogo tennentarok oruakma, at Allah ebabut op en Kristus Yesus en we oʼgo erlak aʼge herle hebilogo delnonobuagoluk perakpou waga. Asogo delnenebiselat, wene nenebam aʼge noʼgorlogo wokhesirik e, togolik Allah emin hwedik taknenebesi ai o. 25-26Nadugat, at Allah en e, nis aphwami wiak togukhwe, watnonobu erlakma en epe mosogo welagarik e, yogodak at ebabut hegitsogo tiso aʼge ano enagat emagoluk, Yesus perakpou waga o. Perakpou wagama ebe worogwiam emep ʼbegei ai pam, nis aphwami nenede at ebam heʼberik pege aʼge, at emin togolik hwedik taknonobouwagoluk perakpou waga ai o. Allah en nis aphwami nenede Yesus ebam heʼberik pege aʼge, wene nenebam aʼge noʼgorlogo wokholuk at emin togolik hwedik taknenebasulat, at hegitsogoat tago oluk yogodak ebabut enagat aga ai o.
27Asogo taknenebasu holuk e, nonuʼgwarek en erliktugulom no? Erliktugulom aʼge modogat erlak aga o. Noʼgosogo oluk erliktugulom aʼge erlak aga. Nis nonuʼgwarek en wene Allah en nenesaʼgo weregei wene hegitsogo togu lege ano en togolik hwedik taknenebesi no? Erlak o. Nenede at ebam heʼberik pogwiam e, at enat hwedik taknenebasu ai en, erlik tu mia o. 28Wene ai paget nis pobitu re, disogo. Nis en wene Allah en nenesaʼgo weregei wene ano tenak welat hegitsogo togwiam, nis wiak togu lege aʼge erlagap poluk, at emin togolik hwedik taknenebasu puk. We, nenede at Yesus ebam heʼberik pogwiam, emin hwedik taknenebasu o. 29At Allah re, nis aphwami Yahudi aʼge nak nenaik no? Is oʼborl oʼgwe aʼge eneminat nenaik erlak no? Demat aphwami oʼborl oʼgwe aʼge eneminat nenaik o. 30At Allah ebe mesigat ai en e, nis aphwami nenagap neneʼgerlimu aʼge ʼbelak aʼge nenede at ebam heʼberik pogwiam e, wene nenebam aʼge noʼgorlogo wokholuk at emin togolik hwedik taknenebasulat, ye, is aphwami enagap eneʼgerlimu aʼge asogo ʼbelak erlak aʼge enede at ebam heʼberik pogwiam e, asogoat tagenebasulat, tago yo. 31Holuk e, nenede at ebam heʼberik pogulat e, wene Allah en nenesaʼgo weregei wene ano sebelogu lege hwi a? Erlak o. At iak aiat anniap pogu lege.
Currently Selected:
Roma 3: WUL
Highlight
Share
Compare
Copy
Want to have your highlights saved across all your devices? Sign up or sign in
