Roma 1
1
Hau warenebegei wene
1His Allah eiyagai o Roma welegep aʼge narilak norokhwi. At Allah henebe ede aʼge ʼberlegat an Paulus Yesus Kristus eragam aʼge ano en wene pelal wokho heneʼbek perakpou wegi ai o. An en op wene ano aphwami moʼgulentil denaga lemagoluk, Allah en pulogo ediknebesirik peraknobou waga o. 2Nadugat Allah en e,
“Wene op wene ai, pobuk enam ema o,” oluk obok is ap at iak moʼgulontogu legesa aʼge ebano moʼgulentasuam, is en Allah iak ʼbelak aʼge ano pam pelal wokho pogu legesa. 3-4Wene pelal wokho pegesa ai, ebe re, Allah omlogo nonue ʼgain Onuk Logo aʼge Yesus Kristus pagerat o. Aphwami dagagai ʼgelaʼge re, ebe Daud en dogoʼgwe aʼge en dagaga. Aʼgeat de, ebe waragarikmu re, Allah Arogun en anni pam elalugap pesi ai en, Allah omlogoat o, oluk enak aga ai. 5At waragarikmu re, Allah Arogun en elalugap pesi ai re, an en di aphwami yu aphwami enaʼgul onuk loʼbok enede at Yesus ebam heʼberik poluk iak hologo togulom aʼge moʼgulentasuam, at onuk lok emagoluk Allah ebabut op en yoʼgo noboluk peraknobou waga o. 6Aphwami di aphwami yu aphwami enaʼgul onuk loʼbok eba re, his aphwami o Roma aʼge henemin henebagerat o. His henebe Yesus Kristus osi emagoluk yoʼgo henebesiat o. 7Henebe at uʼgwarek pagathorloluk yoʼgo henebesimu welegep o. Ai paget, an en wene pelal wokho heneʼbek perakpou
Nenaik Allah emin, nonue ʼgain Onuk Logo aʼge Yesus Kristus emin, eʼbirek enebabut op ano en op aʼge wokhontogulat, henede haʼbuktak honobogulat, togu lemak o, oluk egi ai o.
Paulus en aphwami Roma aʼge eneʼbek laigoluk egei wene
8Narilak norokhwi. Wene ebe moʼgulhentaik en e, an naduk yu moʼgulhentaik o. Aphwami o di owi yu owi etleba en, his ʼberlegat honobok op ogulat e,
“Is aphwami Roma aʼge enede Yesus ebam heʼberik poluk welagai o,” oluk ogwi ai en, Yesus Kristus moʼgulotluk nak,
“Naik Allah o,” oluk hau werise legi o. 9Asogo hau weriselat e, his henebagerat mo u erlakma en seʼban osoat welegi aʼge, at Allah aluk ani o. An Allah eragam welat, op wene at omlogo taga laga wene ai aphwami moʼgulentil nese legi ai, an nede pam en ningsogoat, at Allah paget takhenebasu legi o. 10Seʼban asogo eselat e, at Allah en op opoluk,
“Is eneʼbek lak o,” oluk moʼgulnotluk woknoboluk wemagoluk ʼgonu moʼguloso modok welegi o. 11His henede hurle emagoluk, Allah Arogun en wogentasu aʼge ai, his logon wokhentaigoluk honobou wele, epasu legi o. 12An wokhentau wele epasu legi ai re, his emin, an emin, nenede Yesus Kristus ebam heʼberik pege aʼge ai pam, nenede ago wat-wat tul en weigoluk epasu legi o. 13Narilak norokhwi. An en, aphwami oʼborl oʼgwe aʼge pema akhit o di owi yu owi etleba wene moʼgulentasu legimu wegesa ʼgelaʼgeat, his asogoat wagup oluk agauwa esanamat heneʼbek weigoluk epasu legi aʼgeat de, neʼgebela ʼbelak en mo ese legi ai henaluk emagoluk moʼgulhentegis o. 14Aphwami di wene yu wene pobi togwi aʼge emin, pobi togwi erlak aʼge emin, seʼgola tigisa aʼge emin, tu erlak aʼge emin, ʼberlegat op wene moʼgulonto oluk an nebam ʼbelak ʼgelaʼge welegi o. 15Ai enat e, op wene ai his aphwami o Roma welegep aʼge eba moʼgulhentau wom nagai epasu legi o.
Op wene ai, Allah anniat o, oluk moʼgulentesi wene
16Op wene ai Allah anniatma re, naduk naduk aphwami Yahudi aʼge, ye, pobuk e, aphwami Yunani aʼge, enede Yesus Kristus ebam heʼberik pogwi aʼge ʼberlegat delenebiso ai en e, an nogorlok erlaksogoat wene op wene ai moʼgulentil denaga legi ai o. 17Allah en disogo egeimu pelal wokho pasulat e,
“Henede an nebam heʼberik wolorogup ai pam, an en wene henebam aʼge noʼgorlogo wokholuk,
nemin pobuk togolik hwedik takhenebaikmu henelaluk modok wolorogup o,” (Habakuk 2:4)
oluk egeimu pelal wokho pegesa ʼgelaʼgeat, Allah emin pobuk togolik disogo hwedik takpo yo, oluk, op wene ai pam selakmayat pesi. Allah emin pobuk togolik hwedik takpo wene ai ebe re, mu aʼge mesik tul pam en puk. We, nenede at ebam heʼberik poluk edipmu en ʼbekhit hwerli ologunmu wolomul ai pam, Allah emin pobuk togolik hwedik takpoluk wolomul o.
Allah en wene aphwami enebam pasu wene
18Aphwami en e, Allah ebe enebakhenne ukpoluk, enebabut wiagat togulat, dem wene aphwami logon enaluk emano oluk sebelogwi ai en e, Allah olot het agalat ʼbogorl pam en selakmayat pesi. 19At Allah olot het agalat selakmayat pesi ai, at uʼgwarek en,
“An nebabut degenik o,” oluk obok ʼbaksogo selakmayat pesimu pobitu aʼge oruakhweat de, togwi ai en olot het aga ai o. 20Allah ebe nenil hogwi erlak aʼgeat de, at en ʼbogorl ʼgwiang walhesimu enil hogulat, at ebe walhesi aʼgeatma re, anni otok modok welago yo, oluk, ebabut dokhumsogo pobitu aʼgeat welagai ai o. Asogo welagai ai paget, is en wene enebam aʼge noʼgorlogo wene no aʼge u. Mia o. 21Allah ebe asogo enaluk welarat de, is en e,
“Allah ebe di aʼge yu aʼge walhesi aʼgeat o,” oluk, ebe erliktogwi erlak, hau worogwi erlak, welegesa. Asogo welat e, mu aʼge ebe arogun erlak aʼge paget de, wenemennei ebam eberogu legesa ai en, enede ebis aga ai o. 22Is enede asogo modok ebis agama welarat de,
“Nis nenede modok ʼgagalak o,” oluk ogwi o. 23Enede ebis agama re, Allah ebe muk ago erlak aʼge, erliktu aʼge ai ukpoluk ebalema re, muk ago aʼge eneʼgik en ogut-ogut de, aphwami ʼgelaʼge heliʼgogulat, sue heliʼgogulat, wam, ʼbaik, mene heliʼgogulat, inaʼge heliʼgogulat, heliʼgogo poluk e, erliktogwi ai o.
24Asogo togwi ai en, Allah en e,
“Is onuʼgwarek enede en nasuam, is-is eneʼgerli erlak enebe wiagaphorlogu lemak o,” oluk enebe ugenebasu ai o. 25At Allah ebe walhesi aʼge erliktogwi modok wolom, oluk ogwiam,
Demat, oluk u ʼgelaʼge,
“Amin,” oluk ogulom aʼgeat de, is en Allah iak dem wene ai ukpoluk, aphwami enepenen en eniak pam ʼgagalogo ogwi aʼge ai wegesa. Asogo wegesarik, Allah en di aʼge yu aʼge walhesi aʼge ai ebe erliktu erlakma en, we, di aʼge yu aʼge waltak aʼge ai eneʼgik en ogut walsogo wusogo poluk, erliktogulat, at ebaget togulat, togwi ai o. 26Is asogo togwi ai at Allah en, is enede en nasuam eneʼgerli erlaksogo togu lemagoluk,
“Eneba loʼbok o,” oluk ugenebesi. Is hwami en e, ap enemin nogogwi ʼgelaʼgeat nogo u aʼgeat de, is hwami-hwamiat nogogwi erlak aʼgeat nogogwi ai o. 27Ai ʼgelaʼge, is ap en ogo re, ap en hwami enemin nogogwi ʼgelaʼgeat nogogwi erlak, we, ap-ap nogogwi ai o. Is ap-ap enebam age ligagoam eneʼgerli erlaksogoat wiak togulat e, onuʼgwarek en wene enebam pagathorlogulat e, enebe wiak agai ai o.
28Is en e,
“Allah ebe nenaluk wolom e, nenebit o,” oluk at ebe is onogola en mi-miarak pegesema re, at en e,
“Is onogola en opogwi ai wiak o. Nebit. Is en e, wiak aʼgeat de, op, oluk opogwi ai, asogo eneba loʼbok opogulat tu puk aʼge til laga lemak o,” oluk enebe ugenebasu o. 29Asogo ugenebasuam, is onogola re, di wiak yu wiak, aʼgul onuk loʼbok ʼbeterak welat, enemikmik wiak togulat, aphwami logon wiagabonobogulat, togwi o. Togulat, aphwami enebam ʼbou togulat, enebe waronobogulat, wene sorok ogulat, aphwami lalonobogulat, wene eʼgen poluk welat, togwi ai aʼgeat onogola modok ʼbeterak welago yo. Onobok hisakho nobok-hobok ogulat, 30selakma ogulat, Allah ebe enapserisogo welat, enebam haro wiak togulat, onuʼgwarek en logo pagathorlogulat, erlikhorlogulat, wiak tuogoluk eneʼberlel wiak togulat, enaiklak enialak eniak hwelak erlak togulat, togwi ai o. 31Enede erik ʼgelaʼge wiak togulat, obok wogontogwi aʼge ano ugonobogulat, aphwami enebit nak welat, enedeabonobogwi erlak welat, togwi o. 32Asogo togwi ai en, at Allah en e,
“Aphwami enebabut asogo togwi aʼge holuk e, an en wene enebam poluk enebe modok waronobu hegitsogoat warenebik o,” oluk egei aʼge enaluk welarat de, is onuʼgwarek en asogoat togwi modok welagai o. Is asogo togulat, is logon asogoat togukhwe re,
“Elirat togu legep o,” oluk moʼgulontogwi.
Currently Selected:
Roma 1: WUL
Highlight
Share
Compare
Copy
Want to have your highlights saved across all your devices? Sign up or sign in
