Roma 13
13
Is ʼgain pemerintah aʼge eniak hwelak poluk togulom wene
1Honuelak ʼgain pemerintah aʼge ai, edip we aʼge puk o. Edip e, at Allah at o. At enat edigenebesimu ʼgain welagai ai en e, his henebe loʼbok is eniak hologo wolomup o. 2Ai enat, sa en is ʼgain pemerintah aʼge ai eniak hwelak erlak togwi holuk e, at Allah en edigenebesi aʼge aiat iak hwelak erlak tago yo. Holuk e, is aphwami asogo togwi aʼge ai re, onuʼgwarek en wene enebam pagathorlouwa o. 3Is aphwami logon op togulat e, ʼgain pemerintah aʼge ai, onogorlok erlaksogo welagai. Aʼge re, is pema wiak togulat e, onogorloksogoat welagai o. His en is pemerintah aʼge honogorlok erlaksogoat wolomogoluk e, henebabut opsogo togu lomup o. Asogo togu lorogup holuk e, is en erlikhonobuayat o. 4Is pemerintah re, Allah en edigenebesimu, at eragam aʼge welat, his opsogo welemagoluk togwi o. Aʼge re, wiak togup holuk e, honogorloksogo wolomup o. Is segen woluk noʼgwi ai, ʼburlat woluk noʼgwi puk. We, aphwami wiak togwiam e, Allah en olot het emarik wene enebam po ʼgelaʼge, is edigenebesimu re, is en wene enebam pogwi o. 5Holuk e, is eniak hwelak poluk tu o. Mo u mia o. Allah olot het emano oluk, eniak hwelak poluk tuat aʼge re, ai pam nak eniak hwelak poluk tu puk o. Henede eʼgin erlak se wolomogoluk, is eniak hwelak poluk tuat o.
6Ai enat, uang pemerintah paget ʼgonu ogwiam wogontogu legep ai o. Is e, Allah eragam welat, at ebaget asogo ningsogo togwi o. 7Holuk e, is wogonto aʼgeat wogontogu lomup o. Uang pemerintah en di paget yu paget ʼgonu ogwiam wogonto hegitsogoat wogontogulat, is enebe honogorloksogo wolom hegitsogoat honogorloksogo welat, heniak hau doʼgoksogo waronobu hegitsogoat doʼgoksogo waronobogulat, togu lomup o.
“Henarilak honorokhwi enemin nede-hedesogo henede hwedik wolom o,” oluk moʼgulentesi wene
8His e, aphwami pema en aʼge ʼbelak aʼge woluk wolorogup no. We, henebam ʼbelak aʼge wolom ʼgelaʼge re, his-his nede-hedesogo henede hwedik wolom aiat o. Wene Allah en nenesaʼgo weregei wene ano ʼberlegat hegitsogo tu ʼgelaʼge re, enebe nede-hedesogo enede hwedik wolom aiat o. 9Wene ai nenesaʼgo weriselat e, disogo egei,
“ʼBabi tenontogulat, tenontouwagoluk togulat, togup o.
Aphwami enebe waronobogup o.
Yogorlia wagup o.
Is logon enaʼge aʼge honogola en e,
Nagai e, oluk epagup o,” (Keluaran 20:13-15, 17; Ulangan 5:17-19, 21)
oluk wene nenesaʼgo weregei ai emin, logon nenesaʼgo weregei aʼge eminat e, mesigat laʼbuksogo wene logo ʼgelaʼge re, disogo egei,
“His e, honuʼgwarek henebe henede hwedik welegep ai ʼgelaʼge,
is aphwami muon henemin welegep aʼge ai, henede hwedik wolomup o,” (Imamat 19:18)
oluk egei ai. 10Aphwami logon enebe enede hwedik welat e, enebe wiagabonobogwi erlak. Wene Allah en nenesaʼgo weregei wene ano ʼberlek hegitsogo tu ʼgelaʼge re, aphwami logon emin nede-hedesogo enede hwedik wolom aiat o.
“At Kristus wema erlige horok lau waga,” oluk moʼgulentesi wene
11Asogo togulom ai re, nopaget togulom no. Ai re, nis naduk naduk nenede Allah pam heʼberik pege eria erlige re, o delnonobua erlige walegat welaga. Aʼge re, yogodak e, horogat lau waga ai en e, his nogo ogu legep ai, henelaluk om hegit aga ai, pobi togu legebat o. 12O hup welegerik dakha iogoluk horogat aga. Aphwami o hiktakma welat togwi aʼge ai ukpouwok o. We, segen waʼgun wik-wok enebabut heberlogo welagai ʼgelaʼge, nis o dakharak aʼge wik-wok e, nenebabut heberlogoat wolomok o. 13O dakharakma welat togwi ʼgelaʼge, nenebabut hegitsogo togu lomok o. Seni noluk wiak togulat, ik ʼgelaʼge noluk honuk honuk togulat, togwi ai ʼgelaʼge togup o. Hwami yogunat tenontogulat, eneʼgerli erlak aʼge togulat, togwi ai ʼgelaʼge togubat o. Wene ʼbalogulat, ʼbou togulat, togwi ai ʼgelaʼge togubat o. 14His henebabut e, aphwami enebabut onotogat welat,
Di wele, yu wele, oluk ogwi ai ʼgelaʼge honogola ʼgagalu erlakma en e, we, segen waʼgun wogwi ʼgelaʼge, nonue ʼgain Onuk Logo aʼge Yesus Kristus ebabut aiat womup o.
Currently Selected:
Roma 13: WUL
Highlight
Share
Compare
Copy
Want to have your highlights saved across all your devices? Sign up or sign in
