Roma 14
14
“Henarilak honorokhwi honogola en wene yagentagup o,” oluk moʼgulentesi wene
1Henarilak honorokhwi logon enede Allah ebam pobisogo heʼberik po erlakma en enede owan oruak aʼge ai, is enebabut e,
“Disogo tu, yusogo tu,” oluk ogwi aʼge ai paget wene yagonto erlakma enat wogonobogu lomup o. 2Is logon enede Allah pam heʼberik welat e, di aʼge yu aʼge yogunat noʼgulom o, oluk opoluk noʼgwi. Aʼgeat de, is logon enede owan aʼge ai re, soʼboru emin, yorum emin, noʼgwi ai ʼgelaʼge nak noʼgwi o. 3Is yogunat noʼgwi aʼge ai enebe Allah enat wogenebegeimu o. Holuk e, is noʼgwi erlak aʼge ai enede en,
“Is wiak o,” oluk wene enebam pagup o. Ye, is noʼgwi aʼge ai en e, is noʼgwi erlak aʼge ai onogola mi-miarak enebagup no yo. 4Ap logon eneragam aʼgeat de, his en e, wene enebam po no?
“At yu wiak tegei. Huremak o,” ye,
“At ai nak e, op tegei, edik welemak,” oluk is onue ʼgain ano enat u o. Aʼge re, edik welemagoluk e, nonue ʼgain Onuk Logo aʼge en moʼgulonto elit aʼge enat moʼgulontoma edik welema o. 5Is logon en e,
“O we erlige di aʼge yu aʼge tu nak aʼgeat de, o yogodak yu erlige nak e, tu miayat o,” oluk opogukhweat de, is pema en e,
“O di erlige yu erlige hegit nak o,” opogwi ai, enebe loʼbok onogola asogoat opogulom nak o. 6Is pema en e,
“O yogodak yu erlige nak e, di aʼge yu aʼge tu puk o,” oluk ogwi aʼge ai, nonue ʼgain Onuk Logo aʼge pagerat opogwi o. Ye, is logon di aʼge yu aʼge yogunat noʼgwi aʼge ai re, nonue ʼgain Onuk Logo aʼge pagerat noʼgulat e, Allah hau worogwi ai o. Ye, is noʼgwi erlak aʼge ai, nonue ʼgain Onuk Logo aʼge pagerat noʼgwi erlakma en, mo ogulat e, Allah hau worogwiat ai o. 7Nenebe loʼbok e, nonuʼgwarek paget nak nenelaluk welat, waragalat, togu lege puk. 8We, nis nenelaluk welege holuk, nonue ʼgain Onuk Logo aʼge pagerat welege o. Ye, waromul holuk e, at ebagerat waromul o. Holuk e, nenelaluk wolom emin, warom emin, at en aʼgeat welege o. 9Waregesa aʼge et, nenelaluk aʼge et, laʼbuksogo enebaget e, at Kristus nonue ʼgain Onuk Logo aʼge weleigoluk, waragarik elaluk aga ai o. 10Narilak norokhwi o. Nis nenebe ʼberlek Allah en nenemdema wouema lul aʼgeat de, his henarilak honorokhwi enemin henede Allah pam heʼberik pogu legep aʼge ai, nopaget wene enebam pogulat, honogola mi-miarak onobogulat, togu legep. 11Allah en e, disogo moʼgulentesi,
“An henaik ʼgain Nonuk Logo aʼge nelaluk modok welago aʼge en niak demat moʼgulhentaik.
Aphwami enebe loʼbok e, an neragam ʼgu otluk,
is en e,
ʼGain Allah harat o, oluk enebe loʼbok eniak pam ʼbaksogo moʼgulnontouwa o,” (Yesaya 45:23)
oluk moʼgulentesimu pelal wokho pegesa. 12Pobuk e, nenebe loʼbok en,
“An disogo tegismu ai o, asogo en tegismu ai o,” oluk, wene ʼbeliʼgogo at Allah at moʼgulomul o.
“Henarilak honorokhwi wiagabenebagup o,” oluk moʼgulentesi wene
13Ai en e, nis-nis logon en e, mesik wene ebam pasulat, mesik en e, mesik wene ebam pasulat, togulom mia o. Nis en e, nenarilak nonorokhwi enemin nenede Allah pam heʼberik pogu lege aʼge, wiagabonobogulat, onogola ʼgagalugulat, tuano oluk, henebabut opsogo togu lomup o. 14Di aʼge yu aʼge noʼgwi aʼge ai ebe re, asua erlak, oluk, an nonue ʼgain Onuk Logo aʼge Yesus emin hwedik welat naluk o. Pobi tegis o. Aʼge re, at mesik ede en e,
“Ai aʼge asua. No mia o,” oluk epasu holuk e, at ebaget e, no miayat o. 15Ye, hat nasu legen aʼge ai en hare ogola wiak aga holuk e, ebe hedeap taga legen erlak o. Hare ai paget Kristus waragarikmu re, hat nagun ai pam at ebe wiagap pagun o. 16-17Allah eragam welat e, di aʼge yu aʼge noʼgulat, ukpogulat, togwi ai ebe logo puk. Ebe logo re, Allah Arogun onogola welat, Allah ede agai epasu aʼge hegitsogo togulat, enede haʼbuksogo welat, onogola enagai hogulat, togwi ai nak e, hat hede en e,
“An op taga legi o,” oluk epasu legen aʼge re, is aphwami logon en hobok wiak uano oluk e, asogo taga lorogun o. 18His Kristus eragam aʼge welat, wene ai paget op togulomma re, Allah ogola op agalat, aphwami logon onogola en e,
“At ai op o,” oluk onogola opogulat, tuayat o. 19Holuk e, nenede haʼbuksogo wolomogoluk, nis-nis mesik en mesik ede hurleap pasulat, mesik en, mesik ede hurleap pasulat, ningsogoat togu lomok o. 20Hat nasu legen aʼge ai pam en, Allah eiyagai at en opsogo heliʼgogo enebesi aʼge wiagabenebagun o. Di aʼge yu aʼge op noat aʼgeat de, nasulat at mesik wiagap pagun holuk e, hat wiagat togun o. 21Hat mesik en e, wam ʼgwerik nasulat, anggur eʼgen aʼbosu nasulat, di bele yu bele tagalat, tagoma re, hare herei mesik wiak ema ai en e, no erlakma en ukpasulomma re, op o. 22Hat mesik hede Allah pam heʼberik welat e,
“Yogun elirat tu o,” oluk, hogola ʼgagalak ai re, Allah il pam huʼgwarek paget nak taga lemen o. Sa en,
“An op taga legi o,” oluk epasulat e, wene uʼgwarek ebam pagathwerlasu erlak holuk e, ogola agai houwa o. 23Asogo aʼgeat de, sa en ede Allah pam dokhumsogo heʼberik po erlak welat,
“Yu aʼge elit no a? No erlak hwi a,” oluk wenemennei ede en eberiselat nouwa holuk e, Allah en wene ebam pouwa o. Enede Allah pam dokhumsogo heʼberik po erlak welat e, di aʼge yu aʼge tua holuk, wiagat tua o.
Currently Selected:
Roma 14: WUL
Highlight
Share
Compare
Copy
Want to have your highlights saved across all your devices? Sign up or sign in
