Roma 12
12
Aphwami en Allah eragam welat togulom wene
1Narilak norokhwi. At Allah nenebe ede oluk wene mesik henede ʼgagalik. Allah uam warogu legesa ʼgelaʼge, henebe henelaluk aʼgeat, at uʼgwarek ebaget poluk, at ogola opsogo wogogu lomup o. At eragam welat e, at ebaget togulom aʼge asogoat togu lomup o. 2Aphwami yema en togwi aʼge ai enebabut wagup o. Henebabut ʼget muat emagoluk, at Allah enat honogola ʼget aʼge takhenebasu lemak o. Asogo takhenebasu lomma re, at ogola en,
“Disogo tuak, asogo tuak,” oluk epasu ai ebe henaluk ema o. Op aʼge ebe aiat o. At Allah ogola opsogo togulat, enede hurle agalat, tago re, ai enat o. 3At Allah ebabut op en, disogo togu lemagoluk yoʼgo nebesi ai en, wene mesik yu henebe loʼbok henesaʼgo werik. His e, is muon eneragam wolom aʼge oruakhweat de, henede en,
“An nebe ʼgain,” oluk henede logo pogulom erlak o. At e, Allah en henebe loʼbok henede at ebam heʼberik pogu lemagoluk henebabut loʼbok wokhentesi hegitsogo, henede sebelak welat henebabut ʼbalogu lomup o. 4Nenebe yu re, neneʼgik nonoyuk, nenebe pam hwedik aʼge logon aʼbigat oruak. Asogo oruak aʼgeat de, nenebe pam hwedik aʼge ai, eniabuk loʼbok togu lemagoluk hwedik taknenebesi o. 5Ai ʼgelaʼge re, nenebe aʼbigat welege aʼgeat de, Kristus emin mesigat hwedik taknenebesimu welege ai o. Nenebe mesigat aʼge re, neneʼgik nonoyuk nenebe hwedik welagai ai ʼgelaʼge, nenarilak nonorokhwi enemin asogoat welege o. 6At Allah ebabut op en, nis ʼberlegat nenebabut loʼbok woknentesi ai en e, at en woknentesi hegitsogoat togulom o. Is pema en Allah iak moʼgulontogu lemagoluk enebabut wogentesi aʼge re, enede at ebam heʼberik poluk welagai hegitsogoat moʼgulontogulom o. 7Ye, is pema re, aphwami logon lerontogu lemagoluk enebabut wogentesi aʼge ai re, opsogo lerontogulom. Ye, is pema en, wene moʼgulontogu lemagoluk enebabut wogentesi aʼge ai re, opsogo moʼgulontogulom o. 8Ye, is logon e, aphwami logon enede ago worogu lemagoluk enebabut wogentesi aʼge ai re, asogoat opsogo togulom o. Ye, is logon e, enaʼge aʼge is aphwami logon enaʼge erlak aʼge soʼburontogu lemagoluk enebabut wogentesi aʼge ai re, onomokhwi om pukmu en lebeksogo wogontogulomat o. Ye, is logon en wene leʼgelenebise lemagoluk enebabut wogentesi aʼge ai re, ningsogoat togulom o. Ye, is logon en aphwami mu aʼge enedeabonobogu lemagoluk enebabut wogentesi aʼge ai re, onogola enagaisogo welat enedeabonobogulom o.
Allah eiyagai en enebabut togulom wene
9His henede enat aphwami logon henedesogo wolomup o. Wiak aʼge henebit modok welat e, op aʼge heneʼgik ningsogo tenakho wolomup o. 10Henarilak honorokhwi Allah eiyagai aʼge ai henebe ap mesigat aʼge en dogo aʼge ʼgelaʼge, henede hwedik modok welat e, his-his henarilak honorokhwi heniak hau doʼgoksogo waronobogu lomup o. 11Allah Arogun en honogola aʼgoluktak pasukhwe, nonue ʼgain Onuk Logo aʼge paget henebit om erlakma en, ningsogoat togu lomup o. 12His en e,
“Pobuk at Allah en obaptua aʼge oruak o,” oluk, honogola henagai holuk, di eʼgin yu eʼgin welat e, henepe mosogo welat seʼban mo u erlakma en ogwi modok wolomup o. 13Allah eiyagai aʼge logon di aʼge yu aʼge erlak oruak holuk soʼburontogulat, ap ʼbok enebe heneperlak aʼge wagaiam honowi pam opsogo wogonobogulat, togu lomup o.
14Is aphwami pema en wiagaphonobogwiam e, Allah en is obabonobuagoluk yoʼgo pogu lomup. Wiagabonobuagoluk heman onobo erlakma en, obabonobuagoluk yoʼgo pogu lomup o. 15Is aphwami logon onogola enagai hogwi holuk e, his heneminat honogola henagai hogulat, ye, is nin pema nge togwi holuk e, his heneminat nge togulat, togu lomup o. 16Aphwami pema honolukhwema onobogulat, pema honoʼborlma onobogulat, tu erlakma en e, henedesogo hegitsogo nak tagonobogu lomup o. ʼGaindek enebabut togwi aʼge ai, tu erlakma en e, eneragam welat togwi aʼge aiat togu lomup o. Honogola en e,
“An wene modok naluk o,” oluk honuʼgwarek en logo pagup no yo.
17Is aphwami logon en wiagaphonobogwiam e, his en oʼgo lagaksogo wiagabonobogu lorogup o. Aphwami ʼberlek en enil hontoluk e,
“Is op togwi o,” oluk honobok op ogu lemagoluk e, honogola opoluk en opsogo togu lomup o. 18Aphwami ʼberlek henemin op laʼbuksogo wolomogoluk holuk e, his henebabut op tu aʼge hegitsogoat togu lomup o.
19Narilak norokhwi. Henebe nede o. Aphwami logon en his wiagaphonobogwi holuk e, honuʼgwarek en oʼgo pagup o. We, Allah olot het emarik, at en tuak en e, at eʼgik pam nak pogu lomup o. Wene asogo togulom o, oluk pelal disogo wogo oruak,
“Aʼgulmu an en warenebiselat,
oʼgo an en pasulat, tik o, oluk
Nenaik ʼgain Onuk Logo aʼge en oso,” (Ulangan 32:35)
oluk pelal wokho pegesa. 20Ai holuk, his en e, disogo tu,
“Aphwami henemin wiak aʼge ai soʼboru nele oruak holuk e, wogontogulat,
ik nele oruak holuk e, nangontogulat, togu lomup o.
Asogo togup ai pam e, odouk eʼgen enaʼgul pam pogwiam nonouk tu ʼgelaʼge, eneʼgerli ema ai o.” (Amsal 25:21-22)
21Wiak togwi aʼge ai anni emarik his mabenaphonobouwano oluk e, his op nak togulat, henanni oroguptik e, wiak togwi aʼge ai mabenap pogu lomup o.
Currently Selected:
Roma 12: WUL
Highlight
Share
Compare
Copy
Want to have your highlights saved across all your devices? Sign up or sign in
