Peragenebesi 27
27
At Paulus ik so pam ik oloʼgwe toluk o Roma womogoluk woluk wegesa wene
1Is en nis ik so pam ik oloʼgwe toluk o Italia peraknonobumogoluk, wene arat ʼbaligisarik e, ap tentara aʼbik Kaisar ot esan logolhogu legesa aʼge onue ʼgain onuk Yulius en Paulus emin, aphwami eneʼgik herle werak aʼge logon enemin, wogonoboluk wemagoluk eʼgikmu pegesa. 2Asogo enebe at eʼgikmu pegesema, ik so ebe o Adramitium en woluk wegesarik oruakma, aphwami o propinsi Asia ik so ʼgwisoʼgwe loʼbok ʼbelabil womogoluk togumu, ap Aristarkhus, owi o propinsi Makedonia kota onuk Tesalonika aʼge emin, ik so ai ogola ʼgwigerik wege. 3ʼGwigerik wagalat, loruk oʼgwe re, o Sidon wege. Wegerik e, at Yulius ano en, Paulus ebe edeaptegeitik e, disogo moʼgulesi,
“Hat di aʼge yu aʼge logon erlak holuk e, harilak en wokhemagoluk eneʼbek ʼgwelagentil entil lak o,” oluk moʼgulesimu laga. 4Loluk wagarik e, o eba en, ik so pam ik oloʼgwe toluk wagalat, yasobu nonorogole ʼbalik punhai lagama re, ik eʼgen onuk Siprus ai abel pema akhit yasobu ʼgwe ʼbelakma re, op en e, ʼgwe ai wege. 5Eba en wegerik e, o propinsi Kilikia en ʼbekhit propinsi Pamfilia hegit eba ik lok ai esaʼgo yu akhit liplau wegerik e, o propinsi Likia kota onuk Miria ai wege. 6Eba en ap tentara aʼge onue ʼgain ano en e, ik so mesik o Aleksandria aʼge o Italia womogoluk togumu, hwiaregeitik e, ik so nis wege aʼge ano pam en, ik so ai pam woknonoboluk ʼgwegei.
7Woknonoboluk ʼgoluk, agauwa mesik nogil, mesik nogil, orogat waga legerik, wom mia ʼgelaʼge aga aʼgeat de, o onuk Knidus hegit wege. Wegerik, yasobu en ebela hegitsogo wom mia agama re, ʼgwi-ʼgwani ik eʼgen onuk Kreta ai abel pema akhit yasobu ʼgwe ʼbelakma re, op oluk, Salmone eʼbiang ai ukpoluk ʼgoboksogo ʼbekhit wege. 8Nenebam wik-wiaksogo waga legerik, o kota Lasea horok eba o mesik onuk,
“Ik so op delogo pogumu,” oluk ogumu eba wege.
9Eba wegerik e, agauwa esanat welege. Welat, aphwami Yahudi aʼge en e,
“Nis wiak togu lege aʼge Allah en erlagapsogo ukpoluk pobuk nenemin op ege o,” oluk enede ebesogo soʼboru no erlakma en weat welagai hegitsogo welegerik enat, so pam ik oloʼgwe opsogo wom mia en, ik olomu lo ʼgelaʼge agama, at Paulus en e,
10“Narilak o. An nede en e,
Nis so pam ʼbekhit lul holuk, modogat alemat omul o. Ai en e, di aʼge yu aʼge so ogola yagarak aʼge nak wiak agalat, so ebe wiak agalat, tua puk. At e, aphwami nenebe neneminat ik olomu lagalat, tul epasu legi o,” oluk moʼgulentesi. 11Asogo moʼgulentesi aʼgeat de, ap tentara onue ʼgain ano en Paulus iak sagalogo ukpoluk, is ap ik so pam yabuk togu legesa aʼge onue ʼgain ai o, ik so aluk welat woluk noso aʼge ai o, eʼbirek eniak hwelegei. 12O wiak pam ik so agosogo eba e daintak poluk modok wolom mia ai en, is ap ik so yabuk togu legesa aʼge enebe lok akhit en e,
“O kota onuk Feniks lo holuk e, lorik, o wiak pam e, eba re, op wolom o,” oluk wene ʼbaligisa. Wene asogo ʼbaligisa ai re, ik eʼgen onuk Kreta eba, o Feniks ik oʼgutmu eba o mo ʼgoboksogo ʼbiso hegit abel oʼborl akhit emde ʼbelagat, ogodima akhit ogo emde ʼbelagat oruakma re, ik so ago daintak poluk op welagai ai en egesa.
Yasobu lok mesik ik laut ogum pam waga wene
13Nis eba oruakma, sogwei ik laut hegit en weisogo punhau wagama, is ap ik so yabuk togu legesa aʼge en e,
“Nis louwogoluk ege ano arat lo hegit aga o,” oluk ik so agosogo daintak aʼge henokho wik-wok e, ik eʼgen onuk Kreta eragam oʼgwe wege. 14Aʼge re, horoksogo wege ʼgal e, o yasobu iak lok aʼge o mo orlu aʼge hegit abel oʼborl akhit ik esaʼgo hegit en annisogo modok punhau waga. 15Punhau wagama re, ik so aʼgul yasobu lok wagokhwe hegitsogo woluk wom mia agama re, ʼgwe ai hegit woluk wom erlakma en ukpoluk orukma, yasobu en ʼgwi-ʼgwani woknonoboluk waga. 16Woknonoboluk wagama re, ik so wei aʼge so lok aʼge yen lisogo woluk lasu aʼge ai ningsogo noʼgosogo herle hettu ʼgelaʼgeat agama re, ik eʼgen wei aʼge onuk Kauda ai yasobu ʼgwe ʼbelakma abel olukhwe akhit ʼgwi-ʼgwani wagalat, so wei aʼge ano herle lisogo elirat hettigisa. 17Asogo hettigisarik, ik so lok aʼge pam pegesa. Ebam poluk e, ik so lok aʼge ano ebe ningsogo oluk ʼgoʼbi so abel opmaʼgwe lekho herle hettigisa. Hettigisarik, o Libia hegit eba ik ogum horokma re, yasobu en ik al onuk Sirtis pam dung i louwano oluk, onogorlok en, sum sogwei en wogonoboluk louwagoluk lagabogwi aʼge ano ʼbelakpou wegesema re, yasobu en yogunat woknonoboluk waga. 18Asogo wagoam, yasobu en modok punak leʼgaksogo woknonoboluk wagoma, loruk oʼgwe so ebe se emagoluk di aʼge yu aʼge ogola yagarak welaga aʼge logon naʼgogo ik olomu hwikha ʼbigisa. 19Hwikha ʼbigisarik, loruk oʼgwe re, is ap ik so yabuk togu legesa aʼge en, so oʼgoʼbi emin, di aʼge yu aʼge logon emin, onuʼgwarek eneʼgik en naʼgogo ʼbelakpegesayat. 20Asogo ʼbelakpegesarik, agauwa esanat yasobu anni wiak punak leʼgaksogo punhau wago modogat mo egeimu, mo emin, hwesagal emin, nenil likho erlak welat, nenede en e,
“Nis naduk en e, opsogo woknonoboluk louwa opogu lege aʼge anoat de, yogodak e, ik olomu lul hegi o,” oluk nenede wiak agama mo ege.
21Asogo nenede wiak agama soʼboru page enat, no erlakma en, weat oruakma re, at Paulus ebe eneʼgerlakma inagarik e, disogo moʼgulentesi,
“Nue nari. O ik eʼgen Kreta en,
Lul erlak, oluk henesaʼgo weregis ano, an niak hwellipmu re, di aʼge yu aʼge wiak agalat, nal agalat, tige ai, tolu erlagat o. 22-24Aʼge re, narilak. An nebe eiye re, Allah atma, an at erliktiso aʼge en, malaikat mesik yogo hup neʼbek perakpou wagama re, neragam inlau waga. Inlau wagarik, disogo moʼgulnesi,
Paulus. Hogorlok erlaksogo wolomup o. Hat pobuk ʼgain Kaisar eʼbek lagun ai en, aphwami eba ʼberlegat henemin ik so pam laga legep aʼge, at Allah ebabut op en hat edesogo eneminat delhenebik o, oluk moʼgulnesi ai en, narilak. Henede haʼbuksogo welemagoluk, wene yu moʼgulhentaik. Nenebe logon ik olomu lul erlak. We, ik so ebe nak alemat ema o. 25Ai en e, narilak. Allah en moʼgulnesi ai ʼgelaʼge demat ema ani o, oluk, nede at ebam heʼberik welegi ai en, his henede haʼbuksogo wolomup o. 26Aʼge re, ik eʼgen mesik esaʼgoma dungsogo nenebei louwa o,” oluk moʼgulnentesi.
27Ik Adria yeʼgelak ogum petne yasobu en woknonoboluk wagokhwe, agauwa 13 nogoigerik, agauwa mesik pam o hup ede ʼburl ʼgelaʼge is ap ik so yabuk togu legesa aʼge ebano onogola en e,
“Ik esaʼgo horogat lau wege hegi o,” oluk epegesa. 28Asogo epegesarik e,
“Ik il yat a? Horok a,” oluk elit aʼge helep erlilogo ʼbelakpegesema re, 40 meter ʼgelaʼge yarat welaga. Asogo ʼbelakpoluk, horok eba wegerik en, elit aʼge pobuk ʼbelakpegesa aʼge re, 30 meter horok wei ʼgelaʼge welaga. 29Asogo welaga ai en e, is en,
“Ik so helep pam dungtak pouwano,” oluk e, mo uarik welemagoluk, so eʼgin aʼge ugan so aloʼgwe ʼgwe yen herle erlilogo ik ogola ik alma ʼbelakpegesa. ʼBelakpoluk e,
“O perlene dakha uak da,” oluk enagai yen ogu legesa. 30Asogo ogulat, is ap ik so yabuk togu legesa aʼge ebano so pam en hweiye louwogoluk e, is logon disogo moʼgulentigisa,
“Nis en so eʼgin aʼge so aʼgul akhit en herle erlilogo ʼbelakpul o,” oluk eniak eseiyat egesarik, so wei aʼge ano herle erlilogo ik olomu ʼbelakpegesa. 31Ik olomu ʼbelakpegesema at Paulus en e, ap tentara aʼge onue ʼgain ano emin, osi ebano enemin, moʼgulentasulat e,
“Is ap yema ik so lok aʼge yu pam welema erlak holuk e, his henebe ʼberlegat delhwerlagup erlak hegi o,” oluk moʼgulentesi. 32Asogo moʼgulentesimu, is en e, ik so wei aʼge ʼgoʼbi erlelik welaga aʼge daktak pegesema ik olomu laga.
33O dakha iogoluk tisokhwe, Paulus en is berlegat soʼboru nouwagoluk disogo moʼgulentesi,
“His honogola en e,
Nis noʼgosogo tul, oluk his henede mennei eberogulat agauwa 14 soʼboru no erlakma en weat welegep ai o. 34Aʼge re, his henebe logon ik olomu lagalat, weiyat logon henebam wiak agalat, tua modok erlak o. Holuk e, op delogup en e, soʼboru logon nagup en moʼgulhentegis o,” oluk moʼgulentesi. 35Asogo moʼgulentesirik e, soʼboru roti aʼge mesik eʼgikmu wesirik e, is ʼberlegat enilem Allah hau wusogo, at naduk ʼgusogo neʼgei. 36At naduk neʼgeimu re, is enede siok oluk e, enebe ʼberlegat soʼboru nil legesa. 37So ai pam nenebe ʼberlek e, 276 wege. 38Nonogumsogo neʼgerik e, ik so ebe se emagoluk gandum eʼgen so ogola yagarak welaga aʼge naʼgogo ik olomu ʼbelakpegesa.
Ik so ik iak pam dungsogo wiak aga wene
39O dakha egeimu re, is ap so yabuk togu legesa aʼge ebano en, ik esaʼgoma enil yethegesa aʼgeat de, o ʼgeba ʼgelaʼgeat enede nalaga. Enede nalagarik enil yethegesa ʼgal e, ik oʼgutmu ik al delak oruakma yethegesarik, disogo egesa,
“So ebe eba yogo pei lo elit a? Mia ya. Walhouwok o,” oluk egesa. 40Asogo egesarik, so ebe eria louwagoluk so eʼgin aʼge ʼbelakpegesa aʼge ano, ʼgoʼbi daksogo ik olomu ʼbelakpegesa. ʼBelakpegesarik so ago aʼge mesik, so aʼgul eden-peden hogu legesa aʼge ano hebilogo re, sogwei en so aʼgul hegitsogo ik iak akhit woluk louwagoluk, sum so aʼgul akhit aʼge lagabak pegesa. 41Lagabak pegesema, sogwei en woluk e, ik al horogat herlektakma eba so ano yesi laga. Yesi lagama, so aʼgul akhit ningsogo dung tegeimu re, aloʼgwe ʼgwe, ik hererimtak wagalat wei wiagap til, wei wiagap til, til-til modok wiagat aga. 42Asogo tegeimu re, is ap tentara ebano en, is eneʼgik herle werak aʼge ebano hweiye ik ebi lebemano oluk e, enebe waronobuogoluk tigisa. 43Asogo waronobuogoluk tigisa aʼgeat de, is onue ʼgain ano en Paulus deligoluk e,
“Asogo togup o,” oluk wene ʼbalegei. Wene ʼbalegeitik e,
“Ebi henaluk aʼge naduk ik olomu ʼgolokho ʼboluk ik iak pam liplai lit o. 44Ye, his ado e ʼgagalak aʼge yema emin, so moluktak aʼge yema emin, heneʼgik tenhegeik, woluk, eneʼberlik liplai lit o,” oluk moʼgulnentesi. Moʼgulnentesimu, asogoat nenebe ʼberlegat delogo nak ik iak pam op libege.
Currently Selected:
Peragenebesi 27: WUL
Highlight
Share
Compare
Copy
Want to have your highlights saved across all your devices? Sign up or sign in
