Peragenebesi 20
20
At Paulus o Makedonia wagarik, ʼbekhit o aphwami Yunani aʼge onowi pam waga wene
1O kota Efesus eniak aʼbik sagalogu legesa aʼge ano erlak agama, at Paulus en e, is aphwami Yesus iak wegesa aʼge worlontoluk enesaʼgo weregei. Enesaʼgo wusogo hau waronoboluk e, ebe o propinsi Makedonia waga. 2O Makedonia eba neselat e, wene loksogo moʼgulentasulat, enede ago wetil nese lagarik, o aphwami Yunani aʼge onowi pam waga. 3Wagarik, dugwi henagan eba welaga. Eba welagarik e, pobuk ik so pam ik oloʼgwe toluk o propinsi Siria laigoluk degelisoma, aphwami en e, disogo moʼgulegisa,
“Is aphwami Yahudi aʼge en wathobuogoluk waʼgun ʼgabuligisarik oruak o,” oluk moʼgulegisema esaʼgo hwelegeitik, togolik o propinsi Makedonia akhit laigoluk tegei. 4Laigoluk tisoma, ap Sopater, Pirus omlogo, owi o Berea aʼge o, Aristarkhus, Sekundus eʼbirek onowi o Tesalonika aʼge o, Gayus owi Derbe aʼge o, Timotius o, Tikhikus Trofimus eʼbirek onowi o propinsi Asia aʼge o, enemin legesa. 5Is naduk legesarik e, o Troas eba yetnentarok welegesa. 6Asogo yetnentarok oruakhwe, aphwami Yahudi aʼge seni lok aʼge soʼboru roti periso erlak aʼge ano neʼgesema re, nis o Filipi en ik oloʼgwe ik so pam toluk o Troas lagalat, nogo agauwa huaben oluk, is o Troas oruakma entai legerik, eba welat nogo agauwa sabiren welege o.
At Paulus ologun ʼgoboksogo aphwami o Troas aʼge entil lasulat tegei wene
7Nis o eba welat, Allah paget weat welegerik e, hubaʼgo soʼboru roti aʼge nenarilak nonorokhwi nemin nouwogoluk odoktak poluk, at Paulus en wene moʼgulnentasu laga. Hubet oʼgwe arat louwogoluk e, wene yat wiak moʼgulnentasulat, hup ede ʼburl ogo moʼgulnentasu modok welaga. 8O holiʼbo lok werikmu odoktigema eba, esaga lampu esanat ʼgwielak welaga. 9Asogo odoktigerik e, ap souwe aʼge mesik onuk Eutikhus, jendela emde ʼbelakma hweriogo welaga. Hweriogo welat e, Paulus wene yat wiak modok oso welaga ai en, nogo il agarik e, ʼgunalogo nogogei. Nogosoma, o holiʼbo o holu hwerli henagan pam louk-louk werikmu ebe erabuno enat dung ʼbu aga. Dung ʼbu agama, ha ʼbu egesa ʼgal e, modogat waragarik oruakma wegesa. 10Wegesema, Paulus ebe ʼbu agarik e, werak ano ebam ʼbou egeitik eʼgik en ebagase parliksogo tenak poluk e,
“Waragama oluk, henede porogup o. Ebe elaluk oruak o,” oluk moʼgulentesi. 11Asogo moʼgulontoluk togolik libagarik e, soʼboru roti aʼge ʼgusogo neʼgesarik nin pobuk wene yat wiagat moʼgulentasu lagarik e, o dakha egeimu Paulus ebe o momu laga. 12Lagama re, ap souwe ano elaluk aʼge owi pam woluk lagalat, elaluk aga aʼge ai paget onogola enagai aʼbik hogulat, tigisa.
O Troas en e, o Miletus legesa wene
13At Paulus en e,
“His ik so pam ik oloʼgwe toluk o Asos lit o. An ʼgwiang oʼgwe weik o,” oluk wene weraknenebesimu, nis naduk ik so pam o Asos eba legerik e, o eba en at ebe wik-wok emin louwogoluk, nis naduk o Asos lege. 14Legerik e, o eba en at ebe emin sarlok toluk, nenemin ik so pam toluk o Metilene lege. 15O Metilene en, ik so pam ik oloʼgwe legerik e, hubet ʼgelaʼge, ik eʼgenma o Khios ai ukpoluk, hau ʼgelaʼge re, ik eʼgenma o Samos ai ʼgwanisogo ukpoluk e, ua ʼgelaʼge o Miletus lege. 16At Paulus en ogola epasulat e,
“An o propinsi Asia yema mago tisokhwe re, seni Pentakosta paget is nolukmu laikno oluk, o kota Efesus ʼgwilo erlakma en ʼbekhit o Yerusalem elit laikmu en nouwa holuk e, op o,” oluk ogola opoluk, elaluesogo laigoluk tegei.
At Paulus en aphwami o Efesus aʼge enesaʼgo wusogo onoboluk laga wene
17At Paulus ebe o Miletus eba welat e, is ap Allah eiyagai o Efesus aʼge tenentarok welegesa aʼge enebe wemagoluk wene wusogo perakpesi. 18Wene wusogo perakpesimu enebe wegesema re, at Paulus en e, disogo moʼgulentesi,
“An naduk o propinsi Asia wegi ai hwerli en, henemin modok welat taga legi aʼge henalugat o. 19Is aphwami Yahudi aʼge en nebe watnobuogoluk nobok ʼbalogulat wik-wiak taknobogukhwe, nuʼgwarek en nede sebelogo, erliktu erlakma enat, nge aʼbik tagalat e, nonue ʼgain Onuk Logo aʼge eragam welat at ebaget taga legi ano henalugat o. 20Asogo tagalat e, wene his moʼgulhonto aʼge mo u erlakma enat, aphwami odoktak oruakma en, wene moʼgulhentasulat, honowi loʼgwe loʼbok en, wene moʼgulhentasulat, taga legi ano henalugat ani o. 21An en aphwami Yahudi aʼge emin, Yunani aʼge emin, henesaʼgo weriselat e,
Wiak togu legep aʼge ukpoluk, henebabut heberlotluk e, honolukhwe Allah wogemis o. Wogotluk e, henede nonue ʼgain Onuk Logo aʼge Yesus ebam heʼberik poluk wogorogup en moʼgulhentasu legi ai o. 22Aʼge re, yogodak Allah Arogun enat nogola ʼgagalegeimu, iak hologo, o Yerusalem laiogoluk taga legi yu i o. Eba lolukmu en noʼgosogo taknobouwa hwe. An neperlagat o. 23Asogo neperlak aʼgeat de, an o kota agaikhe en agaikhe lasu leikmu eba ʼberlegat at Allah Arogun en e,
Heʼgik herle worogulat, di obotut yu obotut hebam pogulat, tua ani o, oluk moʼgulnoso ai nak e, naluk o. 24Asogo aʼgeat de, an nebe nelaluk wolom aiat logo oluk ai aʼge logo pasu legi erlak o. Nonue ʼgain Onuk Logo aʼge Yesus en yoʼgo nebasulat, at en e,
Allah ebabut op en tagenebasu aʼge op wene aiat moʼgulentil lu o, oluk yoʼgo nebesi aʼge ano ologun pam ʼgoboksogo tiogoluk logo pasu legi o.
25An his narilak norokhwi ʼberlegat wene Allah eragam ʼgoluk wolomul ai wene moʼgulhentil nese legi ai re, hwerli yogodak ya en e, his en pobuk norogole henil niagup erlak o, oluk an nalugat o. 26-27Asogo Allah ede epesi wene ai, an nogola sebelogo mo u erlakma en modogat ʼbaksogo moʼgulhentasu legi ai en e, his logon pobuk wiak orogup holuk e, wene an nebam e, erlak o, oluk moʼgulhentegis o. 28Wam domba wam ʼgwelagentarok welagai ai ʼgelaʼge, his en Allah eiyagai ʼgwelagentarok welemagoluk, at Arogun en yoʼgo henebesi aʼge ai, ʼgwelagentarok welat e, honuʼgwarek henepe heberlogo wolomup o. Asogo henepe heberlogo welat e, Allah eiyagai yema, at uʼgwarek omlogo emep pam wogenebegeimu enebe at uʼgwarek eiyagai oruak, oluk opsogo ʼgwelagentarok wolomup o. 29Aʼge re, mene orlomene anni wiak aʼge en wam ukpo erlakma en modok nasu ai ʼgelaʼge, an nebe laikmu re, is logon Allah eiyagai his en ʼgwelagentarok welegep aʼge ai wiagabenebil ʼguma aʼge oruak ani o, oluk e, an nalugat o. 30Asogo wiagabonobogukhweat de, ap his aʼge logon inotluk e, aphwami Yesus iak wegesa aʼge lisogo wogonobuogoluk, wene eniak esei aʼge moʼgulontogu lema ani o. 31Henede weʼgerlogo wolomup! An o mo ligom ʼbugom osokhwe 3 tahun henemin welat e, mo u erlakma en, erlige en, hubaʼgo en, nge tagalat, henebe loʼbok henesaʼgo werise legi ano, henede eberak wolomup o. 32Wene Allah ebabut op en woknenebiso ai wene heneʼgik ningsogo tenakho weleripogoluk, moʼgulhentegis o. Yogodak e, at Allah anni oruak aʼge en, wene ai pam henede hurleaphenebasulat, di aʼge yu aʼge at eiyagai wogentaigoluk enebesi aʼge wokhentasulat, elit tu aʼge eʼgikmu henebegi o. 33An nede en e, his henaʼge uang emas aʼge emin, perak aʼge emin, honosum emin, nagai oluk mesik opo erlak. 34We, an emin, ap an nosi neʼberlik noʼgwi aʼge emin, di aʼge yu aʼge erlak en, an nuʼgwarek neʼgik en mesik herasogo horlogu lege ai henalugat o. 35Wene nonue ʼgain Onuk Logo aʼge Yesus uʼgwarek en disogo moʼgulnentesi ai,
Is aphwami logon en wokhontogwiam horloluk honogola henagai ho mia o. We, at e, his honuʼgwarek en is muon wogontogulat nak e, honogola henagai ho yo, oluk moʼgulnentesi ai nenede eberak welat e, an en is logon enanni erlak aʼge lerentasu legi ai, his en pobirak noboluk an nebabut wik-wok heneʼgik annisogo lerontogulom ebele paget oluk moʼgulogo taga legi ai o,” oluk moʼgulentesi.
36Asogo moʼgulentesirik e, odogorlu pam huragarik, is ʼberlegat enemin welat seʼban egei. 37Seʼban egeimu re, is ʼberlegat nge aʼbik togulat e, Paulus ebe ebagase parliksogo tenak poluk, enemde motok hau wit-wat, hau wusogo perakpegesa. 38Seʼban owan u erlak welat, at Paulus en e,
“His en an pobuk norogole henil niagup erlak o,” oluk moʼgulentesi aʼge ano enede eberigisarik, enede modok wiak agarik, ebe hau wusogo woluk e, ik so ano oruakma legesa.
Currently Selected:
Peragenebesi 20: WUL
Highlight
Share
Compare
Copy
Want to have your highlights saved across all your devices? Sign up or sign in
