Sepanya 1
1
Puu mpau
1:1
1Pau-Do i Ue anu hawe ndi Sepanya anano i Kusi anano i Gedalia anano i Amaria anano i Hisikia tempono i Yosia anano i Amoni, mokole i Yehuda. #2Mok. 22:1–23:30; 2Taw. 34:1–35:27
Pohukua a oleo-Do i Ue
1:2-18
2”Aku rumoahio morina luwuakoano inso i wawontolino, kanandio pau-Do i Ue. 3Aku rumoahio mia ka pinotuwu; Aku rumoahio luwuno manu-manu a laro meene ka bou a ntahi. Aku dumontai ira mia anu nahi tondao parenta-Ku ka mokotampulao mia inso i wawontolino, kanandiomo pau-Do i Ue. 4Aku tumaangakono kae-Ku ndi Yehuda ka luwuno palilino Yerusale. Aku mokotampulao inso a mpo'ianga andio luwuno toreano Baala ka neeno sando mpesomba lahumoa i olodo luwuno sando mpesomba. 5Aku mokotampula ira mbo'u anu mpenggolontu mpesombaio sorodaduno langi a wawo ato ka ondae anu mpenggolontu mpesomba, mpesumpa mpetenunu ndi Ondae i Ue, sine mpesumpa mbo'u a lahumoa Milikomi, 6saru ondae anu mpebungkui Ira i Ue, anu nahi ungke Ira i Ue ke mo'ema pontiso-Do.”
7Pomperodomo i aro-Do Ue Ala, hangano oleo-Do i Ue rangkuomo. Mentee ntu'u, Ondae i Ue mompatinda Iramo pesomba sinumbele ka mokomemporiomo luwuno inolu-Do.
8”A oleo pesomba sinumbele inso ndi Ondae i Ue atuu, Aku humuku ira mia pinemota'u, luwuno ana ntamado mokole ka luwuno mia anu mompokona sangka anu susua. 9Ia oleo atuu Aku humukuo luwuno mia anu melonsokio montoweano pewowa ka buketiakono pobobarasaia ka pompopo'oo rahano uedo. 10Ka a oleo atuu, kanandiomo pau-Do i Ue, ta teronge pebooli inso a Mpewowa Langkai Bou ka ponsabangia inso a Mpe'iniaa Sarai ka unino tehoa langkai inso a luwuno pongku wita. 11Ponsabangimo, hei palilino Nohu! Hangano luwuno puu mpebalu-balu pingkoomo, luwuno puu mpontimba salaka tampulaomo. 12Ia tempo atuu Aku paresao Yerusale saru mowawa pansona ka Aku humukuo luwuno mia anu bakuomo kana anggoro a wawo potonduano ka anu mepau i laro aroano: Ondae i Ue nahi Ira moweweu moiko ke moweweu mosa'o! 13Arataa pompolido ta rinontu ka luwuno rahado ta gagi boni-boni. Ondae mpowangu raha sine nahi ira mpo'iangario; mpelere anggoro ira sine nahi ira mpo'inu anggorono.”
14Oleo-Do i Ue anu mongkokongiri atuu rangkuomo, rangkuomo ka haweno magasi ntu'u! Tedoa mapari pebooli a oleo-Do i Ue! Puu mpetea mbo'u mpohio i oleo atuu. 15Oleo atuu oleo tekudaa, oleo mosusaa ka masukaraa, oleo tekalea ka rodoa, oleo wongimpusu ka menggao-nggao, oleo menseru ka wongi-wongi, 16oleo pompuuria tawuwua ka pohio mpetea a luwuno kota pekorahakoa ka a menara sompo siuno anu mantande. 17Aku mompotii masusaa a mia, ka dompelempa kana mia morawu, hangano mentehala iramo ndi Ondae i Ue. Reado ta te'uwu kana pampawu ka haro kompodo te'uweti anu mokoburu. 18Salaka ke wulaa nahi pokokadudui ira a oleo tekudaa-Do i Ue. Asa wawontolino ta pingko ikaano api mahakino aroa-Do, hangano matea, tendeano matea mongkokongiri pinotii-Do a luwuno palili i tolino.
Currently Selected:
Sepanya 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
