Habaku 3
3
Pekakaino nabi Habaku
3:1-19
1Pekakaino nabi Habaku montonda unino ponsabangi.
2Kurongeomo telele-Miu Ue,
ka inangga-Miu, oo Ue, ku'unde-undeo!
Ipotuwuomo atuu i tempo andio,
Ipokomengkaaomo i tempo andio;
a laro ntekuda Irambeomo pompehohawa!
3Ondae Ue Ala aiwa inso i wita Temani,
Anu Tedoa Mempori inso a mentorukuno Parani. Sela
Langkaino pabawa-Do buketio langi,
ka tolino bukeako po'unde-unde ndi Ondae.
4Hinao tesangkilo kana wanta,
pansario wanta inso a ngkae-Do
ka i tu'aimo itewuni roso-Do.
5I aro-Do melempa haki lele
ka haki lele tumondao hanga-Do.
6Ondae mentade ka mebomba tolino;
Ondae mengkita ka luwuno tongku Doweweuo mpondidi-ndidi,
terawo-rawoomo luwuno torukuno anu kongko mompu'u tempo se'eluno,
ka luwuno pongku wita anu etu-etuno ta'u gagi merete.
Onaemo telaloa-Do etu-etuno ta'u.
7Kukitao luwuno kemado to Kusiani medinado,
ka luwuno tenda i wita Midia mpondidi-ndidi.
8A luwuno koronoke, oo Ue,
a luwuno koronoke tekuda-Miu tensila?
A ntahike tekuda-Miu
tempono ipesawikio ngara-Miu ka kareta ponangia-Miu?
9Pana-Miu I'ungkahiomo,
I'ihiiakonomo ana mpana.
Meluarakoomo luwuno korono inso i tolino anu binansi-Miu.
10Kumita Komiu, luwuno torukuno mpondidi-ndidi,
uwoi mowo u'uru telalo,
uwoi a ondaloano moporongeo unino
ka tumandeo kaeno.
11Mata oleo, wula menaa-naa a mpo'iangano,
tempono wantano ana mpana-Miu mompalari,
ka tesangkilono kansai-Miu mengkoliki.
12A laro ntekuda, Omiu lumolandao tolino,
a laro ntekuda, Omiu sumesao luwuno tongku.
13Omiu lumako kumadudui ira bawaa-Miu,
kumaduduio anu inurapi-Miu.
Omiu mokoropuo petewawado anu nahi dompotonda parenta-Miu
lumolohio anu i totono hawe a we'uno.
14Omiu dumuhuakono ana mpanano onaeno
petewawa sorodaduno, anu aiwa kana lompiu
ta sumiarawoakune saru po'unde,
kana-kana tewuni dompotele mia tepokonsii.
15Saru ngara-Miu, Omiu lumolandao tahi,
howuno uwoi anu mebomba.
16Tempono kurongeo, mondendeomo aroaku,
rumongeo unino, bibiomo wiwiku;
pompemekiki mewinso a laro wukuku,
ka pelempano karuku mondidi-ndidi.
Ka kupomperodo sumikorio oleo masusaa,
anu ta umaluo tongku
anu sumapoi kami.
17Maupo keu ara nahi pensisi,
keu anggoro nahi pewua,
ka hasilino keu saitu mompokomasusa aroa,
maupo luwuno lere nahi pehasiliako kaanga,
bawaa bembe bimba tesaari inso a mpo'ukoa,
ka nahina sapi a laro wala,
18sine aku mo'unde ndi Ondae i Ue,
mebooli mo'unde ndi Ondae Ue Ala anu kumadudui aku.
19 #
2Sam. 22:34; Pud. 18:34 Ondae Ue Ala Ueku atuu rosoku.
Ondae weweuo karuku kana karuno rusa,
Ondae weweu aku mokompelempa a mpo'ianga mantande.
Tiano petewawa mpenani. Saru pemaeno katapi.
Currently Selected:
Habaku 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
