Sepanya 2

Petena ka dontepidi

2:1-3

1Impepumpumo ka inteporokomo, hei tongku anu nahi mpoto'ori mongkoko'ii, 2se'eluno napi pe'umbaako pompakosi ndi omiu, oleo anu telalo kana ota, se'eluno ihawe tekuda-Do i Ue anu tensila ndi omiu, se'eluno ihawe oleo pontekudaako-Do i Ue ndi omiu. 3Ungke Iramo i Ue, oo luwuno mia anu me'urumako i wita anu weweuo songka-Do. Ungkeomo moleoa, ungkeomo pe'urumakoa; bara'ura komiu koa ntekadudui a oleo tekudaa-Do i Ue.

Pohuku a luwuno tongku

2:4-15

4 # Yes. 14:29-31; Yer. 47:1-7; Yeh. 25:15-17; Yoe. 3:4-8; Amo. 1:6-8; Sak. 9:5-7 Hangano Gasa ta bininta ka Asikeloni ta gagi boni-boni; palilino Asidodi ta sinaari ntonga oleo ka Ekeroni ta rinongka. 5Memasola komiu ntu'u palilino wita i wiwi ntahi, omiu tongku Kereti! Ndi omiumo pau-Do i Ue andio: Hei Kana'a, witado to Pelisiti! Aku mepateko, ranta nahina mbo'u palilimu. 6Wita i wiwi ntahi ta gagi tongampada, po'iangado puu mpopakambi ka walado bawaano bembe bimba. 7Wita atuu ta gagi tiado luwuno toreano suku Yehuda. Ira mpopakambi i ra'ai ka mpepombole a luwuno raha i Asikeloni tempono owowa oleo. Hangano Ondae i Ue, Ue Alado Ira mekakaako ira ka wali mokomoikoo teweweudo. 8#Yes. 15:1–16:14; 25:10-12; Yer. 48:1–49:6; Yeh. 21:28-32; 25:1-11; Amo. 1:13-15 ”Kurongeomo pontetewehi inso a nto Moabi ka po'ani-anido inuleno i Amoni, kana'umpe domentetewehi ira bawaa-Ku ka me'unde-undeo koroido a witado bawaa-Ku atuu. 9#Teg. 19:24Onaemo pu'uno, Ongkue anu tuwu, kanandiomo pau-Do Ueno luwuakoano, Ue Alado to Isaraeli, menteeano Moabi ta gagi kana Sodomo ka inuleno i Amoni kana Gumora, onaemo gagi tongampada melaro rui, po'ianga pongkekea ohia, ka po'ianga boni-boni ranta nahina tampulaano. Luwuno toreano bawaa-Ku ira mpopomuru ndi ondae ka anu toreano inso a tongku-Ku ondae mpe'ueo.” 10Ndiomo anu ira mehaweo gagi euno pompelangka-langkaido, hangano mpontetewehi iramo ka me'unde-undeo koroido a bawaa-Do Ueno luwuakoano. 11Ira medoito ndi Ondae i Ue, hangano Ira mokotampulao luwuno pinesombai susua i tolino. Luwuno tongku wita i wiwi ntahi ira mpenggolontu mpesombai Ira, singge mia inso a mpo'iangano. 12#Yes. 18:1-7 Omiu mbo'u, hei to Etiopia, komiu memate tetoboako ponai-Ku. 13#Yes. 10:5-34; 14:24-27; Nah. 1:1–3:19 Ira tumaangakono kae-Do a utara, rumopuo Asuri, ka weweuo Niniwe boni-boni, mokari kana pada one. 14I tonga-tongano ira mpepombole bawaano kondehora, luwuno rupano kondehora a ntobu; moiko manu-manu undani ke manu-manu koro ira mpewongi a luwuno untuno karu raha; manu-manu koa ta umu'uni a pentangoa, ka manu-manu paa-paa a mentoweano pewowa: Dopi keu arasino terongkaomo! 15Onaemo kota anu mo'unde, palilino merodo ka anu motae i laro aroano, ”Butu ongkue anu kongko, nahina anu susua!” Onae gagiomo ntu'u po'ianga anu londa, pepomboleado kondehora mo'ila. Sompo mia anu lumaloo ta mesiili ka mekambe-kamberoako kaeno.

Currently Selected:

Sepanya 2: XMZ

Highlight

Compare

Copy