Sakaria 10

Butu Ondae i Ue anu mompowee usa

10:1-2

1Po'emamo usa ndi Ondae i Ue a mpokotampulaano pepo'euano tempo motu'i ka wula usa! Ondaemo i Ue anu weweuo seru mo'ito, ka usa marombo Ira mompotii ndi ondae ka luwuno pinopaho a tonga mpada a sompo mia. 2#Mat. 9:36; Mrk. 6:34Hangano hapa anu pinauno terapimi onaemo mosa'o, ka anu kinitado mia anu nahi manasa ta gagi onaemo pegaupi, ka luwuno mo'ipi anu mempinaudo nahina pengkonaano; ondae mpontarero anu nahina tuduno. Onaemo pu'uno tongku atuu mpelakopi kana bawaano bimba ka pompemarasai hangano nahina puu mpompakambi.

To Isaraeli mempinotola inso a luwuno pabawa susua

10:3–11:3

3”A luwuno puu mpopakambi tekuda-Ku ta tensila ka a luwuno petewawado bawaano bembe Aku moweweu pombaloa, hangano Ueno luwuakoano merioo suku Yehuda, bawaano pinotuwu-Do, ka weweu ira kana ngara maramba-Do a laro mpeteaa. 4Inso ndi ondae ta me'umbaako siuno watu, inso ndi ondae ta me'umbaako pandorano kema, inso ndi ondae ta me'umbaako pana mpetea, inso ndi ondae ta me'umbaako luwuno anu mempabawa mperonga-ronga. 5Ondae ira kana puu mpetea anu mpololanda iwali a laro rege a mpeteaa. Ira mpetea, hangano Ondae i Ue kumongkomi ira ka dompokoko'ii ira sorodadu mpengara. 6Aku mokomorosoo suku Yehuda, ka Aku kumaduduio inuleno i Yusupu. Aku mokomoikoo tuwudo, hangano Kupehohawa ira. Ondae ira megagi kana nahi Kuhori tumempu ira, hangano Ongkuemo Ue, Ue Alado, ka Aku sumangki ira. 7I Eparai ta gagi kana asa mia puu mpe'iwali, aroado ta mawongko kana molanguako anggoro. Luwuno anado ira mengkitao, ka do'amba memawongko ka aroado mpeboo-booli hangano Ondae i Ue. 8Aku momansu moboi ira ka Aku pumpu ira, hangano Kupotola iramo, ka ira megagi hadio kana i ndi'ipua. 9Maupo Kusiarawo iramo i olodo luwuno tongku, sine a luwuno po'ianga anu olai ira merambe Aku. Ondae ira mentuwu mperonga-ronga saru luwuno anado ka ira mpekule. 10Aku wawa ira mpekule inso i wita Masiri, ka inso i Asuri Aku pumpu ira. Aku wawa ira i wita Gileadi ka i Libano, ranta nahina mbo'u po'iangado. 11Tahi molue masusaa ta sinaki, bombano tahi ta winombaki, ka luwuno ondaloano a ngkoro Nili gagi motu'i. Anu pino'undeakodo to Asuri ta dinontai ka tuko poparentaano Masiri ta tampula. 12Aku mokomoroso ira ndi Ondae i Ue, ka ira mentuwu a laro nee-Do,” kanandiomo pau-Do i Ue.

Currently Selected:

Sakaria 10: XMZ

Highlight

Compare

Copy