Sakaria 9

LUWUNO PINAU ANU TA GAGI MONGKONA HAWE-DO I MESIA

LAMORO 9–14

Pau-Do anu pabawa a luwuno tongku petengi-tengino Isaraeli

9:1-8

1 # Yes. 17:1-3; Yer. 49:23-27; Amo. 1:3-5 Pau-Do anu pabawa.

Pau-Do i Ue kongko i wita Hadaraki ka penaa-naaano i Damasi. Hangano ndi Ondaemo i Ue te'aroano matano luwuno mia, luwuno suku Isaraeli, 2#Yes. 23:1-18; Yeh. 26:1–28:26; Yoe. 3:4-8; Amo. 1:9-10; Mat. 11:21-22; Luk. 10:13-14kota Hamati anu metida saru onae, Tirusi mbo'u ka Sidoni, maupo kana'umpe pandedo mposongka. 3Kota Tirusi mowangu rere benteno ka mohowu salaka kana awu wita saru wulaa kana rege a nsala. 4Sine kanandio-andio, Ira umalao i Ue ka metadiakono rosono Tirusi a laro ntahi, sekono kota atuu ta kumaano api. 5#Yes. 14:29-31; Yer. 47:1-7; Yeh. 25:15-17; Yoe. 3:4-8; Amo. 1:6-8; Sep. 2:4-7 Kota Asikeloni ta kumitao, ka i'amba gagi doito; Gasa mbo'u, ka i'amba tedoa mondende; Ekeroni kanatuu koa mbo'u, hangano pomperorohino tedupaomo. Inso i Gasa ta tampula mokole ka kota Asikeloni nahi ta pino'iangario mbo'u. 6I Asidodi ira mpo'ia inule mpesalo, ka pinerorohodo to Pelisiti Aku mokotampulao. 7Aku metadiakono rea inso a ngangano ka mokoburua inso a olo ngisino. Ondae anu ntepo'ia ira megagi mia-Do Ue Alato. Ondae ira megagi kana aasa suku i Yehuda, ka to Ekeroni mbo'u gagi kana to Yebusi. 8Aku mekema i raha-Ku gagi puu mpodagaido anu wela telalo; nahi ta hina mbo'u anu aiwa mokonsiio, hangano kanandio-andio Kudagaiakono mata-Ku Ongkue-Ku.

Hawe-Do Mokole Sintuwu

9:9-10

9 # Mat. 21:5; Yoh. 12:15 Peboo-boolimo temeroku, hei ana beine Sioni, peboo-boolimo, hei ana beine Yerusale! Kitao, mokolemu hawe ndi omue; onae moleo ka poponangi. Onae mauru ka mesawi a asa kalide, kalide lakino anu mongura. 10#Pud. 72:8Onae ta mokotampulao kareta inso i Eperai ka ngara inso i Yerusale; pana mpetea ta pinokotampula ka onae ta paleleo manangai a luwuno tongku. Wita pinabawaino ta tewile malua inso a ntahi hawe a ntahi ka inso a Ngkoro Eparata hawe a luwuno tompano tolino.

Isaraeli pinokomoiko

9:11-17

11Mongkona omue, hangano rea pedandia-Ku saru omue, Aku motola ira miamu anu mentinaha inso a ngkineke anu nahina uwoi. 12Pekulemo a ngkota bentemu, hei luwuno mia mentinaha anu buke pomperorohi! A oleo koa mbo'u andio Kupauakomiu: Aku moweeakomiu euno meluka mpendua! 13Hangano, Yehuda Kupadiio ndi Ongkue kana wo'eno pana ka umihiiakono Eparai. Aku mesoeakono luwuno anamu, hei Sioni, a luwuno anamu, hei wita Yawani, Aku pakeko kana ponaino asa puu mpe'iwali. 14Ondae i Ue Ira mepopokita ndi ondae, ka ana mpana-Do ta mompalari kana koliki. Ondae Ue Ala Ira puurio tawuwua ka lumako monsapoi a laro lompiu inso i selata. 15Ondae Ueno luwuakoano anu dumagai ira ka ira mepingkoo saru mperawo-rawo ira watu pongkembi. Ira mempo'inu ka ira mpohohoi kana molanguako anggoro, lulua kana loea kodei ponsiwui, merano kana luwuno siuno meda pontunua pesomba. 16Ondae Ue Alado, ia oleo atuu anu kumadudui ira, bawaa-Do, kana bawaano bimba. Ondae kana luwuno paramatano ramba-ramba ulu anu tesosangkilo i wita-Do. 17Mentee ntu'u, tedoa moiko ka tedoa ira ntekosi! Mangalitau ntetiangi hadio hangano gandu ka ana beine hangano anggoro.

Currently Selected:

Sakaria 9: XMZ

Highlight

Compare

Copy