Sakaria 11

1Ungkahiomo luwuno pewowamu, hei Libano, ka ipokokaano api luwuno keu arasimu. 2Ponsabangimo, hei keu sanobari, hangano keu arasi tebangkuomo ka luwuno keu anu langkai sinolangiomo! Ponsabangimo, hei luwuno keu tarabantino Basani, hangano tobu anu mokapa mereteomo tinuehi! 3Rongeo ponsabangido puu mpopakambi! Hangano pino'undeakodo sinolangiomo. Rongeo pengaolido singa mongura! Hangano sinolangiomo pino'undeakono Koro Yarade.

Orua rupa puu mpopakambi

11:4-17

4Kanandiomo pau-Do Ue Alaku ndi ongkue, ”Pakambi iramo asa bawaa bembe bimba sumbelea atuu! 5Luwuno anu mpo'oli mensumbeleo kana nahina salado ka mia me'asao mpotae, ’Unde-unde Iramo i Ue! Mompoli akumo!’ Luwuno puu mpopakambi nahi dompehohawao. 6Ongkue mbo'u nahi Aku mehohawao palilino wita andio, kanandiomo pau-Do i Ue. Menteeano, Aku meweengakono singge mia a ngkaeno pe'asa miano ka a ngkaeno mokoleno. Ira merawo-rawoo wita andio ka nahi Aku motolao inso a ngkaedo.” 7Ka ku'amba pakambi ira asa bawaa bembe bimba sumbelea atuu tiado puu mpebalu-balu bembe bimba. Ku'alao orua tuko: anu asa kupauo ”Me'aroa” ka anu susua kupauo ”Powutu.” Ka ku'amba pakambi ira asa bawaa bembe atuu. 8I larono asa wula kuliahakono otolu puu mpopakambi. Ka i'amba nahi kupokompeteao mbo'u aroaku a asa bawaa bembe bimba atuu, ka ondae nte'osa iramo ndi ongkue. 9Ka ku'amba motae, ”Nahi kubehe mbo'u pakambi komiu; anu ta mate, po'ieeomo imate; anu ta tampula, po'ineeomo itampula, ka anu da tebinta atuu, po'ineeomo dosingge mengkaano bauno walino!” 10Ka ku'amba umalao tuko ”Me'aroa” atuu, ka ku'amba puduo ka nami gagi anu Kuwutuomo saru luwuno bawaa. 11Gagi pedandia nahi pinokogagi a oleo atuu ka domento'oriomo puu mpebalu-balu bembe bimba anu kontongaado mpekokoongakune nine atuu onaemo pau-Do i Ue. 12#Mat. 27:9-10 Ka ku'amba motae ndi ondae, ”Tewala impemoikoo, impowee aku tamboku, ka tewala naahi, siimo!” Domentimbao tolu pulu lempe salaka gagi tamboku. 13Sine mepau Iramo i Ue ndi ongkue, ”Pepasiakonomo salaka atuu a mpuu mpo'angga labu! Tedoa mantande domentudu Aku!” Ka ku'amba umalao tolu pulu lempe salaka atuu ka mepasiakono a mpuu mpo'angga labu a raha-Do i Ue. 14Ka ku'amba puduo tuko anu ko'orua, tuko ”Powutu,” ka siimo ihina pepaekompoa i olono Yehuda ka Isaraeli.

15Umarino atuu Ondae i Ue mepau ndi ongkue, ”Alaomo tepohona mbo'u parewano asa mia puu mpopakambi anu benge-benge! 16Hangano menteeano, Aku mokohinao i wita andio asa mia puu mpopakambi anu nahi perioo anu moliu, nahi ungkeo anu tetadi, nahi pokotompao anu mobela, nahi pekakaakono anu madoo, tendeano mongkaa bauno anu mewalo ka butao kukudo. 17Masola ntu'u puu pompakambi-Ku anu benge-benge, anu mobinta asa bawaa bembe bimba! Ponai ta umaluo tokiano ka mata ngkoanano! Tokiano ta tedoa morungku, ka mata ngkoanano ta gagi morawu!”

Currently Selected:

Sakaria 11: XMZ

Highlight

Compare

Copy