TITU 2
2
Songka mongkona mia mota'u, mia mongura ka ata
2:1-10
1Sine omue, paleleomo hapa anu menunu saru pompaguru anu mentee: 2Tama anu memota'u asalakono ka domentuwu poolo ka isoompo, mempinelangkai, mempande mposongka, mentee a pompe'ala-ala, a pompehohawa ka mpompedato. 3Kanatuu koa mbo'u beine anu memota'u asalakono ka domentuwu gagi mia mpesomba, si dompomposebe, si domegagi atano anggoro, sine mempande mpompaguruako luwuno anu moiko 4ka hangano kanandio paguru ira beine mongura mpehohawa ira tamado ka anado, 5tuwu pande mposongka ka mempori, mokua mpo'atora sombori, memoiko aroa ka mpomperorongeako a ntamano, ka si dompepaukiakono mia pau-Do Ue Ala. 6Kanatuu koa mbo'u mia memongura; imempatudu iramo ka domempabawaio koroido a luwuakoano 7ka pokogagiomo koroimu omuemu aasa pandiri a mpoweweu moiko. Asalakono ka umoleo ka pompesu'ui a pompagurumu, 8mentee ka nahina tataano a pompalelemu, ranta ka imokoko'ii taromu, hangano nahina mongkona anu mosa'o anu dompokopaleleo mongkona ontae. 9Luwuno ata asalakono mpomperorongeako ndi uedo a luwuakoano ka dompemoikoo, si dome'ewaio pinaudo, 10si domemolengku, sine asalakono ka iwela koa inso i aroado ka mpetenunu, hangano kanandio a luwuakoano ka dompokomarambao pompaguru-Do Ue Ala, Puu pongkaduduito.
Pe'aroa-Do Ue Ala kumaduduio luwuno mia
2:11-15
11Hangano pe'aroa-Do Ue Ala anu kumaduduio luwuno mia mengkaaomo. 12Onae paguru kita ka tomebintao gau mosa'o ka luwuno mosisiri ntolino ka tomentuwu pande mponsongka, moleo ka mpesomba i wawontolino kanandio-andio 13saru mensikorio te'ihiino pomperorohito anu buke me'uraa ka mengkaano maramba-Do Ue anu Tedoa Langkai ka Puu pongkaduduito Ondae i Yesu Kerisituu, 14#Pel. 19:5; Win. 4:20; 7:6; 14:2; Pud. 130:8; 1Pet. 2:9 anu meweengakonomo koroi-Do hangano ontae motola kita inso a luwuno anu mosa'o ka mokomemporiako Ira aasa bawaa, bawaa-Do Ondae-Do, anu memokua mpoweweu moiko. 15Paleleomo luwuno atuu, patudu iramo ka pokomanasaako ira a luwuno poweweumu anu tekona domentondao. Si hina mia anu me'uru-uruko.
Currently Selected:
TITU 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
