TITU 1
1
Tabea
1:1-4
1Inso ndi Paulu, tetenaa-Do Ue Ala ka tinena-Do i Yesu Kerisituu ka ipekakaakono pompe'ala-alado mia bininiki-Do Ue Ala ka ponto'ori menteea kana anu mengkaa a laro mpesombato, 2ka me'empehiako pomperorohia a ntuwua anu nahina tampulaano anu se'eluno pompu'uano tempo Dodandiomo Ue Ala anu nahi Dopegaupi, 3ka a tempo anu po'ehe-Do Dopokomengkaaomo pau-Do a pompalelea Lele Mawongkoa anu kupine'ala-alaako menunu saru petena-Do Ue Ala, Puu pongkaduduito.
4 #
2Kor. 8:23; Gal. 2:3; 2Tim. 4:10 Hawe ndi Titu, anu pine'anaku ntu'u montonda pompe'ala-alato luwu: pe'aroa ka rodoa inso ndi Ondae Ue Ala Ama ka Ondae i Kerisituu Yesu, Puu pongkaduduito, kumongkomiko.
Anggaano i Titu i Kereta – atora a penatua, pomparesa bawaa
1:5-16
5Kubintakomo i Kereta saru tinoo andio, ka upatindao hapa anu napi umari ka upakosi ira penatua i sompo kota, kana anu ku'oliwiakomu, 6#1Tim. 3:2-7 onaemo mia anu nahina tataado, anu butu aasa beinedo, anu anado mentuwu mpompe'ala-ala ka nahi dompinokotuluri hangano tuwu mosa'o gaudo ke tuwu nahi te'atora. 7Hangano gagi puu mpo'atora a raha-Do Ue Ala aasa petewawa bawaa asalakono nahina tataano, nahi pompelangka-langkai, komba marante'ise, komba marampo'inu, komba marantekuda, nahi pedokoli, 8tendeano ineheno metotoka, ineheno anu moiko, pande mosongka, moleo, mempori, mokompabawaio koroino 9ka me'ini a mpau anu mentee, anu menunu saru pompaguru anu mentee, ka ipolio mompatudu mia me'empehiako pompaguru atuu ka polio tumisoako ira salado anu me'ewaio. 10Hangano hadioomo mia mentuwu nahi te'atora, tamoako i olodo anu mpe'ini a songka metindi. Saru mpepau anu nahina tuduno domensosaeloo pinewowolodo. 11Mia anu kanatuudo asalakono kinomu wiwido, hangano hadio sombori dompokomarisuako ira pompaguru anu nahi mentee ka dompohawe ura anu mompokoko'ii. 12Asa mia inso ndi ondae, nabido ondaedo, horio mepau, ”Lano to Kereta mpegaupi, kondehora lambaha, modoko ka moluwe.” 13Ponsakosii atuu mentee. Onaemo pu'uno kuahako iramo ntu'u ka domegagi mentee a pompe'ala-ala, 14ka siimo domperioo mbo'u tutu-tutuludo to Yahudi ka luwuno songkano mia anu pansia inso a menteea. 15A mia mempori luwuno mempori; sine a mia mokoburu ka a mia nahi pompe'ala-ala maupo te'asa nahina anu mempori, hangano moiko pinewowolo maupo po'o'aroado mokoburu. 16Dompotae domento'ori Ira Ondae Ue Ala, sine a mpoweweudo domehapu Ira. Memokoburu ira ka buunto ka nahi domempolio mpoweweu te'asa anu moiko.
Currently Selected:
TITU 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
