TITU 3
3
Luwuno pe'oliwi pokotompa
3:1-14
1Popoto'oriako iramo ka dompe'urumako a mia mpeparenta ka a mia anu mempabawa, mpomperorongeako ka mpepatinda meweweuo sompo anggaa anu moiko. 2Si dompomposebe, si dompengenge, tendeano ka domemauru ka mpe'aroa a luwuno mia. 3Hangano i ndi'upua ontae mentuwu kita koa mbo'u a monge-mongea: nahi tompomperorongeako, ntesosaelo, megagi atano mperupa-rupa po'eheno aroa ka mosisiri, mentuwu a mosa'oa ka kohilia, mokoburu, memambe'o'aliako. 4Sine mansano mengkaa pe'aroa-Do Ue Ala, Puu pongkaduduito, ka pompehohawa-Do a mia, 5i tempo atuu Dokadudui kitamo, komba hangano wineweu moiko anu tomeweweuomo, sine hangano pompehohawa-Do a mpebahoa ka towali mempine'anaako ka a pompokowo'ohua anu inangga-Do Penaa Mempori, 6anu Doweeakitamo hangano Ondae i Yesu Kerisituu, Puu pongkaduduito, 7Ontae anu megagi mia pinokomentee hangano pe'aroa-Do, ka tontekona mpontarima tuwua anu nahina tampulaano, menunu saru pomperorohito. 8Pau andio mentee ka ineheku ka upokomorosoo ntu'u, ka luwudo anu mpompe'ala-ala iramo ndi Ondae Ue Ala ka dompe'o'osu ntu'u meweweuo anggaa anu moiko. Onaemo anu moiko ka mentudu a mia. 9Sine olaiakonomo wineweu anu inungke-ungkeako ka anu monge-monge, mongkona potudano tumuwu, teposisalaa ka pengengea mongkona songka Taura, hangano luwuno atuu nahi mentudu ka nahina pengkonaano. 10Asa mia anu mompaguru susua anu mararuomo upatuduo, laluopo olaiakono. 11Uto'orio nine mia anu kanatuu tesosaelo ntu'u ka halano humukuo koroino onaeno.
12 #
Tin. 20:4; Eps. 6:21-22; Kol. 4:7-8; 2Tim. 4:12 Umariku tumenao i Aratema ke i Tikiku aiwa ndi omue, pompete'umalamo aiwa ndi ongkue i Nikopoli, hangano kuputusiomo aku mo'ia i tu'ai i larono tempo morini andio. 13#Tin. 18:24; 1Kor. 16:12 Tulungiomo temoi-moiko i Sena, anu monto'ori ntu'u Taura atuu ka i Apolo, a mpelempaado, ka si domemakuraako hapa-hapa. 14Ka po'ineeomo ka dompepaguru mbo'u miato meweweuo anggaa anu moiko ka dompokosompoo pepotuwudo, ka ipewua koa tuwudo.
Tabea
3:15
15Tabea inso a luwuno mia anu pewali-waliku i ndi'ai ka pohaweomo tabeaku ndi ondae anu mpehohawa kami a pompe'ala-ala. Pe'aroa kumongkomi komiu luwu!
Currently Selected:
TITU 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
