2 TIMOTIU 4
4
Ihiiomo pepoboi pompekakaakomu
4:1-8
1I aro-Do Ue Ala ka i Kerisituu Yesu anu Ira mobitara mia mentuwu ka anu memate, ku'oliwiko ntu'u hangano pepokomengkaa-Do ka hangano poparentaa-Do: 2Paleleomo pau-Do i Ue, pepatindamo moiko ke nahi moiko tempono, pokomengkaaomo hapa anu sala, kuahakono ka patuduomo a luwuno maurua ka pompaguru. 3Hangano ta hawe tempono, mia nahi pokontarimao mbo'u pompaguru mentee, sine ira mpopumpu guru montonda po'ehedo mpotendeo ineheno birido. 4Ira mempiio birido inso a menteea ka me'ungkahiakono tutu-tutulu. 5Sine pabawaiomo koroimu a luwuakoano, sabaramo marasai, weweuomo anggaa mompelele Lele Mawongkoa ka anggaomo anggaa pompekakaakomu! 6Mongkona ongkue, reaku mompu'uomo inuwu gagi pesomba ka tempo mateaku umpedaomo. 7Kutompaakonomo petandia anu moiko, hawe akumo a garesi pokotompa ka kupekakaakonomo pompe'ala-ala. 8Kanandio-andio pinatindaako akumo ramba-ramba ulu menteea anu Ira weeakune i Ue, Puu mpobitara anu moleo, a oleo-Do; sine komba butu ndi ongkue, tendeano a luwuno mbo'u mia anu kumekewoio hawea-Do.
Pe'oliwi pokotompa
4:9-18
9Pompete'umalamo ka uronga aiwa ndi ongkue, 10#2Kor. 8:23; Gal. 2:3; Kol. 4:14; Tit. 1:4; Plm. 24 hangano ikekewoiomo i Demasi wawontolino andio ka ibinta aku. Onae melungkaomo lumako i Tesalonika. I Kerekesi lumakoomo i Galatia ka i Titu lumako i Dalamatia. 11#Tin. 12:12, 25; 13:13; 15:37-39; Kol. 4:10, 14; Plm. 24 Butu i Lukasi anu mo'ia saru ongkue. Lakomo alao i Marakusu ka wawaomo ramai, hangano pompekakaakono kukereo. 12#Tin. 20:4; Eps. 6:21-22; Kol. 4:7-8 I Tikiku kutenaomo ka ilako i Epesu. 13#Tin. 20:6 Tewala aiwako ramai wawao mbo'u lemba meloe anu binintaku i Tiroasi a rahano i Karipusu ka luwuno mbo'u wuntaku, tamoako kuli mpinotuwu poburia atuu.
14 #
Pud. 62:13; Rom. 2:6; 1Tim. 1:20 I Alesanderi, puu mpolabu mala atuu, hadioomo ipoweweu mosa'o ndi ongkue. Ondae i Ue Ira mombaloakune montonda wineweuno. 15Omue mbo'u asalakono tangkoroo koa, hangano tedoa i'ewaio pompaguruto. 16I tempono amba-ambano kusangki a ngkara-karaku nahina maupo te'asa mia anu mokowali aku, luwuno mebinta aku – po'ineeomo mongkona atuu si domempinopotembiako –, 17sine mentade Iramo i Ue i horiku ka mokoroso aku, ka ipinalele koa ntu'u Lele Mawongkoa telalo ndi ongkue ka domerongeo luwuno mia anu komba to Yahudi. Hangano kanandio ka kutola inso a ngangano singa. 18Ka Ondae i Ue Ira motola aku inso a sompo tinoo anu mosa'o. Ira kumadudui aku, ranta ka kupewinso a laro Poparentaa-Do i suruga. Tia-Domo marambaa ranta nahina tampulaano! Ami.
Tabea
4:19-22
19 #
Tin. 18:2; 2Tim. 1:16-17 Tabea ndi Perisika ka ndi Akawila ka a nsomborino i Onesiporu. 20#Tin. 19:22; 20:4; 21:29; Rom. 16:23 I Erasitu mo'ia i Korinti ka i Tiropimu kubintao mahaki i Miletu. 21Pompete'umalamo aiwa ramai se'eluno napi tempo morini. Tabea inso ndi Ebulu ka i Pudesi ka i Linusu ka i Kelaudia ka inso a luwuno pepaekompo.
22Ondae i Ue kumongkomio penaamu, Pe'aroa-Do kumongkomiko!
Currently Selected:
2 TIMOTIU 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
