Penani Maramba 8
8
1O, ande-andeno omue pepaekompoku tama,
anu mo'uo a wua radano ineku,
aku woo-wooko ba kuhaweko i bungkuno,
ka nahi ta hina mia tumetewehi aku!
2Aku tumaateko ka wawako
a rahado ineku, onaemo anu paguru aku.
Aku mpo'inuakomu anggoro anu mana mo'ahi,
uwoino wua delimaku.
3Kae manggalino kongko i totono uluku,
kae ngkoanano kumopui aku.
4Ku'emao ka impedandi, luwuno ana beine i Yerusale,
tembio ka impokotesingkao ka mpokontensilao pompehohawa
napi tempono ineheno?
Pompehohawa moroso kana matea
8:5-7
5Isema atuu anu me'umbaako inso i pada one,
anu mehonda a mpinehohawano?
A ntoto keu apeli kuwanguko,
i ra'aimo inemu mentiaakomu,
i ra'aimo imentia ka me'anaakomu.
6Naa akumo kana pontondoni a aroamu,
kana pontondoni a ntokiamu,
hangano pompehohawa moroso kana matea,
po'eheno ngisi kana tolinodo mia mate,
langano onaemo langano api,
kana langano api-Do i Ue!
7Uwoi anu hadio nahi pokompepateo pompehohawa,
luwuno korono nahi polio molomoo.
Maupo ipeweengakono mia luwuno arataa a rahano tiano pompehohawa,
onae ta kongko tinetewehi.
Umbungkoroi beine ka uaino
8:8-10
8Hinao uaimami asa beine
anu napi hina wua radano.
Hapake anu kimpoweweu a uai beinemami
a oleo mpesikenoa?
9Tewala onae rere watu,
kami mpowangu menara salaka i wawono;
tewala onae pewowa,
kami mewalaakono polanso keu arasi.
10Ongkue onaemo rere watu
ka wua radaku kana menara.
I tempo atuu a matano
ongkue kana mia anu mohaweomo rodoa manangai.
Me'uraopo sekono i Solema
8:11-12
11I Solema hinao lere anggorono i Baala-Hamoni.
Ipeweengakono lere anggoro atuu a puu mpodagai,
singge mia moweeakono asa nsowu labano salaka inso a hasilino.
12Lere anggoroku, ongkueku me'ueo, kongko i aroku;
tiamumo asa nsowu lempe salaka atuu, mokole Solema,
ka rua etu tiado mia anu medagaio hasilino.
Orua umbungkoroi mesangki-sangki
8:13-14
13Hei, omue anu mo'ia i lere,
wali-wali mpekokoongakono suaramu,
poporongeomo atuu ndi ongkue!
14Pontuturakomo, pinehohawaku,
gagimo kana lagiwa,
ke kana anano rusa
a wawo luwuno torukuno pinaho rampa-rampa.
Currently Selected:
Penani Maramba 8: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
