Yesaya 1
1
TIANO AMBA-AMBANO
LAMORO 1–39
PINAU ANU TA GAGI MONGKONA YEHUDA KA YERUSALE
LAMORO 1–12
Puu mpau
1:1
1 #
2Mok. 15:1-7; 15:32–16:20; 18:1–20:21 Pongkitano i Yesaya anano i Amosi mongkona Yehuda ka Yerusale anu ikitaomo tempono poparentaano i Usia, i Yotami, i Ahasi ka i Hisikia, luwuno mokoledo to Yehuda.
Potuntu a nto Isaraeli
1:2-9
2Rongeomo, hei langi, ka ta'oomo biri, hei tolino,
hangano Ondae i Ue mepau,
”Ongkue mokolangkai ira nana'ote ka mekakaako ira,
sine me'ewa ira ndi Ongkue.
3Sapi tumo'orio ueno,
sine to Isaraeli naahi;
kalide tumo'orio dulano ueno,
sine bawaa-Ku naahi.”
4Masola ntu'u tongku anu tehala,
bawaa anu bukeako sala,
inuledo mia anu melolambaha,
mia anu mpoweweu mokoburu!
Domebinta Ira i Ue,
tumata Ira Anu Tedoa Mempori, Ue Alado to Isaraeli,
ka mpewolili mpebungkui Ira.
5Tembio ka imebehe mentinunduhi mbo'u,
omiu anu tekense mpebungkui Ira?
Ulu mahaki luwu
ka luwuno aroa molema ka telusa.
6Inso a mpelengkaru hawe a ulu
nahina anu madoo:
kaamba ka lamba ka mobela sarai,
nahi pinokomorina ka nahi winalu
ka nahi pinonaako lana.
7Witamu gagi boni-boni,
kotamu pingko tinunu.
I arono matamu mia hawe
mpomuruo witamu,
boni-boni, domesongkoo mia mehawe.
8Ana beine Sioni tebinta asa-asano
kana laika a lere anggoro,
kana bansule a lere nsuai,
kana kota anu tekadu.
9 #
Teg. 19:24; Rom. 9:29 Ande-andeno Ondae Ueno luwuakoano
nahi Dopobinta ndi ontae mia mentekadudui,
ontae ilawu kana Sodomo,
ka gagi mengkena kana Gumora.
Pesomba mentee
1:10-20
10Rongeomo pau-Do i Ue,
hei luwuno petewawano Sodomo!
Ta'oomo birimiu a pompaguru-Do Ue Alato,
hei palilino Gumora!
11 #
Pow. 5:21-22
”Hapa tuduno ndi Ongkue pesombamu anu ntehohadio?” Pau-Do i Ue;
”Kute'osaakonomo luwuno pesomba tinunu kana bimba lakino
ka tabano ana nsapi anu mewalo.
Reano sapi ka anano bembe-bimba lakino
nahi Kupe'eheo.
12Tempono ime'aiwa i aro-Ku,
isemake anu tumuntuo atuu inso ndi omiu,
ranta ka imelolandao kintala-Ku?
13Siimo mbo'u impowawa pesomba anu nahina pengkonaano,
pesomba dupa onaemo Kumokoburuakono.
Porame-ramea wula wo'ohu ka saba
ke luwuno tepotowoa
nahi Kupolio kumitao
tepumpua langkai tinondaako wineweu mosa'o.
14Porame-ramea wula wo'ohu ka luwuno oleo langkaimiu
Ku'o'aliaakono.
Luwuno atuu gagi tembia-Ku,
mokendo Akumo tumembio.
15Tempono imentineo kaemiu,
Aku wolilio rupa-Ku
tendeano maupo temararu impekakai,
nahi Aku merorongeakono,
hangano kaemiu bukeako rea.
16Imewo'ohiomo, impokomorinaomo koroimiu,
ime'olaiakono luwuno wineweumiu anu mosa'o
inso i arono mata-Ku.
Impenaa-naamo mpoweweu mosa'o,
17impepagurumo mpoweweu moiko;
teahakonomo moleoa,
pabawai iramo mia lambaha;
weeako iramo tiado nana'ote nahina amado,
teahakonomo kara-karado tuwu beine!
18Aiwamo, moikoomo tompekara-kara!
Pau-Do i Ue.
Tewala halamu motaha kana kirimisi,
ta gagi mopute kana seru baku;
tewala motaha kana kasumba,
ta gagi mopute kana wulu bimba.
19Tewala mebehe komiu mpetenunu,
komiu mpongkaa hasili moiko inso a wita andio.
20Sine tewala mpe'ewa komiu,
ta kumaa komiu ponai.”
Mentee ntu'u, Ondae i Ue anu pauo.
Pohuku tiano Yerusale
1:21-31
21Adoo, kota anu i ndi'ipua metenunu
kanandio-andio gagiomo belesu!
Hieno buke moleoa,
menteea mo'ia i larono,
sine kanandio-andio bukeako puu pompepate.
22Salakamu gagiomo ta'i labu
ka aramu mesalo uwoi.
23Luwuno petewawamu ondaemo anu me'ewa
ka ntepo'asa saru puu mponako.
Inehedo luwu mpontarima pompowee nahi pototono
ka inehedo mpo'ala anu komba tiado.
Nahi dompe'alaako a ntiado nana'ote nahina amado,
ka kara-karado tuwu beine nahi hawe ndi ondae.
24Ondaemo pu'uno, kanadiomo pau-Do i Ue,
Ondae Ueno luwuakoano, Anu Tedoa Moroso, Puu Pongkaduduido to Isaraeli;
”Petangkoro, Aku motiio tekuda-Ku a luwuno iwali-Ku,
ka mombalo a luwuno iwali-Ku.
25Aku mewolili umewaiakomu kae-Ku;
Aku mokomangkiloo salakamu,
ka tumadio luwuno rege inso ndi omue.
26Aku mokule ira puu mpobitaramu kana i ndi'ipua,
ka luwuno puu pompatudu kana se'eluno. Umarino atuu omue konineeako kota moleoa,
kota anu metenunu.”
27Sioni ta pinokobebasi molalo moleoa
ka luwuno miano anu tepidi molalo menteea.
28Sine mia anu umewa ka mia tehala
ta rinopu meronga,
mia anu binta Ira i Ue ta pingko moliu.
29Mentee ntu'u, komiu mpohawe mokoko'ii hangano luwuno keu pesombaa
anu ino'aroamiu;
ka komiu mpohawe pontataa hangano lere bungano pinesombai
anu bininikimiu.
30Hangano omiu ta kana keu langkai
anu leweno moleu,
ka kana lere nahina uwoi.
31Anu moroso gagi kana ewo mokari,
inanggano gagi kana bunga api;
oruano ta mo'ai meronga
ka nahina anu mokompepateo.
Currently Selected:
Yesaya 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
