Penani Maramba 7
7
1Tedoa momoiko pelempamu saru sandala atuu,
ana beine anu moleo gauno!
Lengkuno tongamu kana peramba-ramba,
wineweuno kaeno mia pande moweweu anu alusu.
2Puhemu kana sangkiri anu bonggoli,
anu nahi makuraako anggoro sinalo.
Kompomu howuno gandu,
mewalaako sisi-sisi bonse.
3Kana orua ana rusa wua radamu,
kana ana induano lagiwa.
4We'umu kana menara tindu,
matamu kana limbo i Hesiboni,
umpeda Pewowa Langkai Batirabimi;
engemu kana menara i Libano,
anu me'aro i Damasi.
5Ulumu kana pongku Karameli,
wuumu a ulumu mororontaha;
mokole te'onggo a piniu-piuno.
Mo'ahino mompehohawa
7:6–8:4
6Tedoa tekosi, tedoako mompokosanaa,
O pinehohawaku, saru luwuno anu mo'ahi.
7Ondauno koroimu kana keu kuruma
ka wua radamu tepumpuano wuano.
8Kupotae, ”Aku mingki momaruo keu kuruma atuu
ka uminio luwu tepumpuano wuano.
Po'ineeomo wua radamu kana tepumpuano anggoro
ka woono penaamu kana wua apeli.
9Paumu mo'ahi kana anggoro!”
Oo, anggoro atuu waa tetutu a mpinehohawaku
mewaa ntededei a wiwido mia tekonai mpoturi!
10Ongkuemo me'ueo pinehohawaku,
po'eheno aroano te'aro ndi ongkue.
11Aiwa, pinehohawaku, tolako a tonga mpada,
merato i sompo inia!
12Aiwa, tolako mo'o-mo'oru a lere anggoro
ka kumitao keu anggoro ba mentumbaomo,
ba tewileomo sisino,
keu delima ba mensisiomo!
I ra'aimo aku weeakomu pompehohawaku!
13Wua dudaimi tewuha woono,
ka umpeda pewowato hinao mperupa-rupa wua mo'ahi,
anu da sarai maupo anu tehine,
anu kunaakomumo, pinehohawaku!
Currently Selected:
Penani Maramba 7: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
