Penani Maramba 6
6
1Isuamo ilako pinehohawamu,
hei tekosi i olodo beine?
Te'aro isuake ilako pinehohawamu,
ka tome'ungkeo mperonga?
2Pinehohawaku metiiomo a lereno,
a maluano lere rampa-rampa
ta mompakambi bimba a lere
ka mo'opu sisi bonse.
3Ongkuemo me'ueo pinehohawaku, ka ongkue onae me'ueo,
anu mompakambi bimba a ntonga-tongano sisi bonse.
Po'unde-undeno umbungkoroi tama a umbungkoroi beine
6:4–7:5
4Omue tekosi, pinehohawaku, kana kota Tiresa,
tekosi kana Yerusale,
mongkokongiri kana sorodadu saru banderano.
5Polimbaomo matamu inso ndi ongkue,
hangano ongkue gagi bulalingo hangano onae.
Wuumu kana bawaano bembe
anu mpetuda-tuda mpetii inso i Gileadi.
6Ngisimu kana bawaano bimba,
anu mpeluarako inso mpowo'ohia,
anu mpe'ana indua luwu,
ka nahina anu nahi pe'ana.
7Kana bansino wua delima nipi-nipimu
i asambalino pesoumbumu.
8Kombiado mokole hinao nomo pulu,
samburue halu pulu,
ka luwuno ana beine nahi pinokodoa hadiono.
9Sine onaemo asa-asano marapatiku, linolaroku,
asa-asano anano ineno,
ana mpinehohawano anu me'anaakono.
Domengkitao ana beine ka mpotaeakono me'ura,
luwuno kombiado mokole ka luwuno samburue me'unde-undeo.
10”Isemake onae anu me'umbaako kana towea mewanta,
tekosi kana wulantii,
mewanta kana mata'oleo,
mongkokongiri kana sorodadu saru banderano?”
11A lere kenari kupetii
kumita ira tumba i lembono,
kumitao keu anggoro ba mensumbo
ka keu delima mensisi.
12Se'eluno nahi kupokonto'orio,
tekewoiku numaa aku a wawo ngkaretado ulea mokole.
13Pekulemo, pekulemo, o ana beine Sulami,
pekulemo, pekulemo, ka kimpokokitako!
Tembio ka imengkitao ana beine Sulami atuu
kana mongkita po'ense-ense peteaa?
Currently Selected:
Penani Maramba 6: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
