Ruti 4
4
I Ruti gagi kombiano i Boasi
4:1-17
1Lumakoomo i Boasi ia mpewowa inia ka ipentoro i ra'ai. Telaloomo pontolosi anu nineeno i Boasi atuu. Mepauomo i Boasi, ”Pepaekompoku aiwa ari ramai, pentoro i ndi'ai.” Merangkuhakoomo ka ipentoro. 2Ibiniki iramo hopulu ira mia mota'u anu i kota atuu, ka ipotae, ”Impentoromo i ndi'ai.” Ka mpentoro iramo. 3Motaeomo a pontolosi atuu, ”Wita tiano pepaekompoto i Elimele ta umasao i Naomi, nde mekuleomo inso i wita Moabi. 4Gaagi kupewowoloo: Moiko kupauakomiu, kanandio: I'oliomo wita atuu i arodo mia anu mpentoro i ndi'ai ka i arodo mia memota'u ia tongkuto. Tewala inehemiu tumolosio, itolosiomo. Sine ba nahi behe tumolosio, ipauakune, ka kuto'oriokoa, nde nahina mia anu mokontolosio, sangkadio omiu, ka umarino omiu, ongkue.” Ka ipotae, ”Aku koa tumolosio.” 5Sine ipotae i Boasi, ”I tempono i olio wita atuu inso ndi Naomi, sarukoa mbo'u i Ruti beine to Moabi anu mateomo tamano, anu ta wanguo neeno mia atuu anu lano tia pusakano.” 6Ka ipotae pontolosi atuu, ”Tewala kanandio, nahi aku mokontolosio, nde aku sumosa'orio anu lano tia pusakaku. Pomperorohiku, omue anu tumolosio, hapa anu lano aku tumolosio, nde lano nahi kupokontolosio.” 7#Win. 25:9-10Kanandio anu lano gaudo nse'elu i Isaraeli, ia gau montolosi ka montobosi. I tempodo mia ira mpopokomoroso kara-kara, asalakono asa mia iluarakono sapatuno asambali ka ipeweengakono a mia anu susua. Kanandiomo gaudo mia mompokomoroso kara-kara i Isaraeli. 8Ka mpontolosi atuu motae ndi Boasi, ”Omuemo anu umolio.” Ka ilohuomo sapatuno. 9Motaeomo i Boasi, ia mia memota'u, ka luwuno mia anu i tu'ai, ”Omiumo oleo andio gagi sakosii, motae luwuakoano anuno i Elimele, ka luwuno anuno i Kilioni ka i Mahaloni ku'olio te'inso a ngkaeno i Naomi. 10#Win. 25:5-6Ka i Ruti, beine to Moabi atuu, kombiano i Mahaloni gagi beineku, ta gagi powanguno neeno mia anu mate atuu gagi tia pusakano. Kanandiomo needo nahi ta tetadi inso ia olono pepaekompodo ka inso i olodo palili i kota. Omiumo oleo andio gagi sakosii.” 11#Teg. 29:31; 30:22-23Ka luwudo mia anu mehawe ia mpewowa inia atuu, ka mia memota'u mpotae ira, ”Omamimo gagi sakosii. Ondae i Ue Ira weweuo beine anu ta mewinso i rahamu atuu, kana i Raheli ka i Lea, anu wanguo tongku Isaraeli. Po'ineomo ka ugagi manangai i Eparata, po'ineomo neemu telele i Beteleme, 12#Teg. 38:27-30po'ineeomo inulemu gagi kana inuleno i Peresi anu pine'anaakono i Tamari tiano i Yehuda nde hangano inule anu Ira weeko i Ue inso ia ana beine andio!”
13I'alaomo i Boasi i Ruti, ka beine atuu gagi kombiano, ka ipewowaliakono. Gagi hangano pokongkomi-Do i Ue beine atuu mentia, ka ipe'anaako asa ana ntama. 14Onaemo luwuno beine mpotae ira ndi Naomi, ”Po'unde-unde ndi Ondae i Ue, anu tumulungiko ia oleo andio Doweeko aasa pontolosi. Ka itelelemo neeno nana'ote atuu i Isaraeli. 15Ka onaemo anu mokomawongkoo laromu ta mekariako i tempono wuumu moputeomo. Nde ponimu anu kumekewoiko, anu me'anaakono, beine atuu tedoa langkai i aromu sekono opitu ana ntama.” 16I Naomi umalao nana'ote atuu ka i'awio ka onaemo anu mekakaakono. 17Ka mia isinggerahano numeeakono nana'ote atuu, dompotae, ”Ndi Naomi pine'anaakomo asa ana ntama.” Domeneeakono i Obe. Onaemo amano i Isai, ka i Isai amano i Daudi.
Potudano anu me'anaakono i Daudi
4:18-22
18Ndiomo inuleno i Peresi. I Peresi hinao anano neeno i Heseroni, 19I Heseroni hinao anano neeno i Rami, i Rami hinao anano neeno i Aminada, 20i Aminada hinao anano neeno i Nahaso, i Nahaso hinao anano neeno i Salomo, 21I Salomo hinao anano neeno i Boasi, i Boasi hinao anano neeno i Obe, 22i Obe hinao anano neeno i Isai, ka i Isai hinao anano neeno i Daudi.
Currently Selected:
Ruti 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021