Ruti 3
3
I Ruti ka i Boasi ia mposesaa
3:1-18
1Onaemo ka i Naomi ponino atuu, motaeakono, ”Anaku nde nahi moiko tokoa ba kupo'ungkeakomu anu ta mekariako ka umanangai? 2Gaagi kanandio, nde i Boasi, anu mompopo'anggaako beine anu upewali-waliako ira atuu, lano io pe'etuto? Nde onae ia wongi andio tekonai moduku jelai ia mposesaa; 3Pedolomo ka upemina-mina, pesangkaako sangka anu tekosi, ka lakomo a mposesaa. Sine kasi to'oriko mia atuu, se'eluno napi umari mongkaa ka mo'inu. 4Tewala mepomboleomo moturi pepenteeo temoiko pepomboleano. Ka u'amba rangkuhio sungkeo hawuno inso a ngkaruno ka upepombole i tu'ai. Asalakono ta koa pauakomu, hapa anu ta wineweumu.” 5Motaemo i Ruti ndi onae, ”Luwuno anu upauakune aku weweuo.”
6Umari atuu lumakoomo a mponsesaa ka iweweuo kana anu i'oliwiakono ponino. 7Ko'umarino mongkaa ka mo'inu i Boasi mawongkoomo aroano, haweomo ta moturi i tompano pohowua jelai atuu. Haweomo beine atuu meningka-ningka, ka isungkeo hawuno inso a ngkaruno i Boasi, ka ipepombole i tu'ai.
8I tempono porontongawongi, tededengkeomo mia atuu ka iperare i horino, kahinaano asa beine moturi i horino karuno. 9Mesikenoomo, ”isemake omue andio?” Isangkio, ”Ongkue i Ruti, mia tetenaamiu: Ipokomolueo pongkadudui miu nde omiumo anu metoto tumolosi kami.” 10Motaeomo i Boasi, ”Doronsoko i Ue, o anaku! Kanandio upopokitaomo ntu'u moputeno aroamu, sekono amba-ambano, nde omue nahi upontondari tama mongura, moiko anu mongkokolaro ke anu mompoli. 11Onaemo anaku, siimo doito. Nde luwuno anu pinaumu atuu, aku weweuo ndi omue nde luwuno mia asa kota mami andio domento'orio motae omue beine anu moi-moiko. 12#Rut. 2:20Kanandio-andio, lano ongkue te'inso ia pe'etumu, anu metoto montolosi, sine maupo kanatuu da hinao mbo'u asa mia pontolosi anu umpedaopo sekono ongkue. 13Po'iamo wongi andio i ndi'ai. Tisomo mo'oru, ba ineheno tumolosiko, po'ineomo onae montolosi. Sine ba nahi behe tumolosiko, ongkuemo anu tumolosiko, ia nee-Do i Ue anu tuwu. Pepombole ka poturimo i ndi'ai ranta tisomo mo'oru.” 14Moturiomo ihorino karuno ranta hawe mo'oru, umari atuu mewanguomo, se'eluno mia napi pada dontepoto'ori nde ipotae i Boasi, ”Kasi domento'orio mia motae hinao aasa beine anu hawe a mposesaa.” 15Ipotae mbo'u, ”Wee aku bomboni anu pinakemu atuu ka uwileo.” Onaemo ka iwileo bombonino. Umari atuu isa'uomo onoo nsa'u jelai a bombonino. Umarino atuu lumakoomo i Boasi i kota.
16Mansano i Ruti hawe ia mponino, mesikeno i Naomi, ”Kana'umpe anaku?” Itutuluomo i Ruti luwuno hapa anu wineweuno ndi onae. 17Ka ipotae: Jelai onoo nsa'u atuu iwee aku, ka potaeno, ”Silako pekule mpemoa ia mponimu.” 18Ipotae ponino atuu, ”Pesikorimokoa anaku, ranta ka uto'orio, ba kana'umpe poko'ariano teweweuno atuu, hangano mia atuu nahi ta menaa-naa ba napi poko'umario teweweuno atuu oleo andio.”
Currently Selected:
Ruti 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021