1 Samueli 1
1
Hinaano i Samueli
1:1-28
1Hinao asa mia tama te'inso i Ramataimi i wita Supi, te'inso i mentorukuno Eparai, neeno i Elikana anano i Yerohama anano i Elihu, anano i Tohu anano i Supi, to Eparai. 2Mia andio orua kombiano, anu asa meneeako i Hana ka anu asa mbo'u meneeako i Penina. I Penina hinao anano, sine i Hana nahina. 3Sompo ta'u i Elikana inso i Rama lumako mesomba ka mompesombaako pesombano ndi Ondae i Ueno luwuakoano i Silo. Orua ira anano i Eli, onaemo i Hopini ka i Pineha gagi sando mpesomba-Do i Ue i ra'ai.
4A oleo lakoano i Elikana mompesombaako pesomba, i wela moweeako ira asa mia asa ntia, ndi Penina kombiano, ka a luwuno anano tama ka beine. 5Sine i Hana butu mohawe asa ntia, hangano Ondae i Ue nahi Dopoweeakono ana, sine maupo kanatuu, tedoa ipehohawao i Elikana. 6I Penina wela mokomahakiakono aroano i Hana, hangano nahi Dopoweeakono i Ue ana. 7Kanatuumo anu gagi sompo ta'u, sompo lakoano i Hana i raha-Do i Ue, i Penina wela mokomahakiakono aroano, onaemo ka ipengese nahi behe mongkaa. 8Ka i'amba i Elikana, tamano sumikenoo, ”Hana, tembio kau pengese? Tembio ka nahi ubehe mongkaa? Tembio ka imasusa aroamu? Ongkue andio mentuduopo ndi omue sekonopo hopulu ana ntama.”
9Asa tempo, mansado me'umari mpongkaa ka mpo'inu i Silo, mentadeomo i Hana, ka sando mpesomba Eli kontongaano mentoro a ngkadera umpeda a ngkaruno pewowa raha-Do i Ue. 10A laro masusano aroano, i Hana mekakai ndi Ondae i Ue i tondaakono mengese sensedu. 11#Pod. 6:5Ka i'amba montanga kanandio, ”Omiu Ue luwuakoano, tewala ipehohawa aku, Ikitaomo masusano aroaku, tetenaa-Miu andio, Irambe aku kasi kolupe aku, tetenaa-Miu, tewala ipowee akumo asa ana ntama, aku meweengakono asa ntinuwuno ndi Omiu Ue. Piso pekeru nahi ta dumanggio uluno.” 12Kontongaano wela mekakai ndi Ondae i Ue, i kokontooo i Eli wiwino; 13I Hana mekakai i laro aroano, butu wiwino anu momuti-muti, nahi teronge ipepau. Onaemo ka ipotae i Eli, beine atuu molangu. 14Ka i'amba motaeakono i Eli, ”Hawe te'ipia ka i'amba tetadi molangumu? Siimo po'inu anggoro.” 15Sine sumangki i Hana, ”Komba kanatuu, ue, ongkue andio asa beine anu tedoa me'isei aroaku. Nahi kupo'inu anggoro ke inua anu mompokomolangu, sine kuluarakono ihino aroaku i aro-Do i Ue. 16Si potaeakune tetenaamiu andio beine anu mosa'o gauno. Kupekakai tehine hangano tedoa aku mompemasusa ka mahaki aroa.” 17Sumangki i Eli, ”Lakomo temoiko. Ondae Ue Alado to Isaraeli Ira moweeko hapa anu inemamu ndi Ondae.” 18Motaeomo i Hana, ”Ipehohawa akumo, ue.” Ka i'amba beine atuu lumako, ka mongkaaomo, rupano moleoomo.
19Tisomono mo'oru, mpewangu iramo ka dompenggolontu mpesomba i aro-Do i Ue. Ka do'amba mpekule i Rama. I Elikana mewowaliakono i Hana, kombiano, onaemo ka Doronsoo i Ue i Hana. 20Mentiaomo i Hana ka ipe'anaakono asa ana ntama. Ineeakono anano atuu i Semueli, hangano ipotae, ”Ku'emaomo ndi Ondae i Ue.”
21I Elikana, tama atuu, lumako saru luwuno pe'asa rahano, mpompesombaako pesomba sompo ta'u ka pesomba pontangano ndi Ondae i Ue. 22Sine i Hana nahi petonda, ka ipotaeakono, tamano, ”Ambapo tewala tetoeomo mo'uo nana'ote atuu, ka ku'amba lumako wawao. Onae ta me'aro ndi Ondae i Ue ka ta mo'ia mpiha i ra'ai asa ntinuwuno.” 23Ipotae i Elikana tamano, ndi onae, ”Weweuomo hapa anu pinemoikomu. Po'iamo ranta ka itepotoe mo'uo. Topo'ema ka Do'ihiio i Ue dandi-Do.”
Gagi beine atuu mo'iaomo i raha mo'uoo anano ranta ka itepotoe. 24Mansano tepotoeomo mo'uo nana'ote atuu, da kodei iwawaomo beine atuu i raha-Do i Ue i Silo saru asa sapi lakino tinuwuno otolu nta'u, asa efa tarigu ka asa kadu anggoro. 25Mansano sinumbele sapi laki atuu, winawaomo nana'ote atuu ndi Eli. 26Ipotae i Hana, ”Tabeamiu ueku, ndi omiu ueku anu tuwu, ongkuemo beine anu i ndi'upua mentade mekakai ndi Ondae i Ue i ndi'ai umpeda ndi omiu, 27onaemo andio ana anu inemaku a laro mpekakaiku ka Doweeakumo i Ue anu inemaku ndi Ondae. 28Gaagi kuwali meweengakono ndi Ondae i Ue asa ntinuwuno.” Ka do'amba mpenggolontu mpesomba ndi Ondae i Ue i ra'ai.
Currently Selected:
1 Samueli 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
