Po'unde-unde 9
9
Ondae Ue Ala, puu pongkaduduido mia moleo
9:1–10:18
1Tiano petewawado anu mpenani. Montonda unino penani Muti-Labeni. Penani po'unde-undeno i Daudi.
2Aku umunde-unde Ira i Ue tompaano aroaku,
aku popauo luwuno wineweu-Miu anu kinohali-haliako;
3aku mo'unde ka mawongko hangano Omiu,
menani umunde-undeo nee-Miu, oo Anu Tedoa Mantande,
4tempono luwuno iwaliku mposuka,
ondae ntetidu ntedonta ka memate i aro-Miu.
5Hangano Omiu umalaakono kara-karaku ka tiaku,
Omiu mentoro a wawo ngkadera poparentaa gagi puu mpobitara anu moleo.
6Luwuno tongku Itekudaako iramo,
mepate iramo luwuno mia mosa'o gauno;
needo Ipahihiomo mpiha
ka nahina tampulaano;
7iwali pingko iramo memate,
wela gagi howuno anu terawo:
luwuno kota Ibuta iramo;
tampula rambeado.
8Sine Ondae i Ue mentoro moparenta ranta nahina tampulaano,
kadera poparentaa-Do Dopontadeo ka Dopolempao pobitaraa.
9Ondaemo anu bitarao wawontolino a moleoa
ka bitarao luwuno tongku a menteea.
10Kanatuumo Ondae i Ue onaemo pepekaduduiado mia anu melinanda,
pepekaduduia i tempono ma'isoa.
11Kanatuumo anu tumo'orio nee-Miu me'ala-ala Komiu,
hangano Omiu nahi bintao mia anu umungke Komiu, oo Ue.
12Penanimo unde-unde Ira i Ue, anu mo'ia i Sioni,
paleleomo wineweu-Do i olodo luwuno tongku,
13hangano Ondae anu tumuntuo reano mia anu tepokonsii;
peboolido nahi Dokolupeo.
14Ipehohawa akumo, oo Ue;
kitaomo tedoa marasaino ongkue, hangano anu me'o'aliaakune,
oo Omiu, anu tumande aku inso a mpewowa langkaino matea,
15ka kupopauo luwuno wineweu-Miu anu inunde-unde
ka meboo-booli hangano tekaduduia inso ndi Omiu a mpewowa langkaino ana beine Sioni.
16Luwuno tongku saampu a laro aa anu wineweudo,
karudo kona rako a laro buani anu pinasado ondaedo.
17Ondae i Ue mepopoto'ori Iramo, Ondae weweuo moleoa;
mia mosa'o gauno kona oho a laro wineweuno kaeno onaeno. Sela
18Luwuno mia mosa'o gauno ira mpekule a ntolinodo mia mate,
oo, luwuno tongku anu kumolupe Ira Ue Ala.
19Hangano komba ta kinolupe mpiha mia mongkokolaro,
komba ta tampula mpiha pomperorohiano mia marasai.
20Ipentademo, Ue, ka si po'inee ira mia mponangi;
po'ineeomo luwuno tongku mebinitara i aro-Miu!
21Weweu iramo mpondidi-ndidi, oo Ue,
po'ineeomo luwuno tongku me'akuio nine ondae mia koa. Sela
Currently Selected:
Po'unde-unde 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
