Po'unde-unde 10
10
1Tembio ka Ipentade ola-olai, oo Ue,
ka Ipepusu a laro tempo ma'isoa?
2Saru pompelangka-langkai mia mosa'o gauno lumampuio mia tepokonsii;
po'ineeomo dontekadu a laro pompopo'oo anu sinongkado.
3Hangano mia mosa'o gauno mo'undeakono po'eheno aroano,
ka mia modoko mompepaukiako ka tumata Ira i Ue.
4Mepau mia mosa'o gauno atuu saru engeno kontahane,
”Ondae Ue Ala nahi Ira motuntu!
Nahina Ue Ala!”, onaemo atuu luwuno pinewowolono.
5Luwuno wineweuno wela mehasili;
luwuno songka-Miu mantandeno lahi;
iperuanahi ira luwu anu umewaio.
6Onae mepau i laro aroano, ”Nahi aku telelu.
Nahi ta umalu aku masolaa mapa'api-api inule.”
7 #
Rom. 3:14
Ngangano bukeako sumpa pontotonaa, pompopo'oo ka pompokonsiia;
a ntoto elono hinao lambaha ka mosa'oa.
8Onae mentoro montowoki umpeda pe'iniaa,
a mpo'ianga anu tewuni onae mompepate mia anu nahina salano.
Matano mompesimi mia molema;
9onae mompora a mpo'ianga anu tewuni
kana singa a laro tongangkura;
onae mompora ta monsapoi mia tepokonsii.
Onae sumapoio mia tepokonsii atuu
saru rumendeo a laro mpesenoano.
10Onae me'odo ka me'opo,
ntedonta iramo mia anu me'urasa'o a laro mpekapono anu moroso.
11Onae mepau i laro aroano, ”Ondae Ue Ala kumolupeo;
Ondae wunio rupa-Do, ka nahi ta hori mbo'u kumitao.”
12Ipentademo, Ue! Oo Ue Ala, tasiakonomo kae-Miu,
si kolupe ira mia anu tepokonsii.
13Tembio mia mosa'o gauno ka itata Ira Ue Ala
ka mepau i laro aroano, ”Nahi Komiu motuntu?”
14Omiu isa'a kumitao masusaa ka marasai,
Omiu kumitao ka umalao a laro ngkae-Miu.
Ndi Omiumo mia urasa'o ipeweengakono koroino;
Omiumo anu tumulungio nana'ote nahina amano.
15Ipuduomo tokiano mia mosa'o gauno ka mia mosa'o wineweuno,
Ituntuomo hawe gauno anu mosa'o nami kohumaweo mbo'u.
16Ondaemo mpiha i Ue Mokole ranta nahina tampulaano.
Luwuno tongku tampula inso i wita-Do.
17Po'ehedo mia anu tepokonsii Irongeomo, oo Ue;
Omiu mokorosoako ira aroado,
Omiu mo'aroo biri-Miu,
18ka moweeako ira moleoa nana'ote nahina amano ka mia anu melinolanda;
ka si hina maupo te'asa mia i tolino anu mosia mompokodoito.
Currently Selected:
Po'unde-unde 10: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
