Po'unde-unde 80
80
Pekakai tekaduduiado to Isaraeli, keu anggoro-Do Ue Ala
80:1-20
1 #
Pel. 25:22
Tiano petewawa mpenani. Montonda nanino Sisi bonse. Pesakosiino i sapi. Penani po'unde-unde.
2Hei puu mpopakambido to Isaraeli, ta'oomo biri,
Omiu anu sumaario i Yusupu kana bawaano bimba!
Oo Omiu, anu mentoro a wawo luwuno kerubi, Ipe'umbaakomo temewanta
3i arono i Eparai, i Benami, ka i Manase!
Ipopokitaomo roso-Miu
ka I'aiwamo kumadudui kami.
4Oo Ue Ala, Ipokotompa kamimo,
weweuomo rupa-Miu mewanta, ka kami ntekadudui.
5 Ueno luwuakoano,
opiapo mbo'u tehineno itensila tekuda-Miu maupo dompekakai bawaa-Miu?
6Ipoweeako ira mpongkaa roti itino uwoi mata,
Ipoweeako ira mpo'inu uwoi mata hadio ntu'u,
7Iweweu kami gagi teposisalaado pehori-hori rahamami,
ka luwuno iwalimami mempasinggiri kami.
8Oo Ue Ala Anu Tedoa Pabawa, Ipokotompa kamimo,
weweuomo rupa-Miu mewanta, ka kami ntekadudui.
9Ilimbaomo keu anggoro inso i Masiri,
Isaari iramo tongku, ka i'amba pahoo keu atuu.
10Wita atuu Ipatindaakono,
onaemo ka imehaka ondalo ntu'u ka buketio wita;
11luwuno torukuno te'engoiako po'engoino,
ka keu arasi melolangkai hangano luwuno sampano;
12iweroo luwuno sampa kodeino hawe a ntahi,
ka luwuno untuno hawe a ngkoro Eparata.
13Tembio ka Ipobangkuo rere watuno,
ranta ka i'opuo sompo mia anu telalo?
14Bonti mengkarasikio
ka kondehora a mpada mengkaano.
15Oo Ue Alano luwuakoano, Ipepokulemo,
Ipensiromo inso i langi, ka Ikitaomo!
Ipekokoongakono keu anggoro andio,
16Idagaiomo hapa anu pinahono kae ngkoana-Miu,
tumba anu Ipokorosoomo tia-Miu!
17Domentunuomo a laro api kana kuli mpae;
po'ineeomo dontetadi tampulaako te'iseno rupa-Miu!
18 #
Pud. 110:1
Po'ineeomo kae-Miu kumongkomio mia anu i koana-Miu,
anano mia anu Ipokogagiomo wela mehasili ndi Omiu,
19ka omami nahi kami mepansia inso ndi Omiu.
Ipotuwu kami, ka kami mpebooliakono nee-Miu.
20Oo Ue, Ue Alano luwuakoano, Ipokotompa kamimo,
Ipokomewantaomo rupa-Miu, ka kami ntekadudui.
Currently Selected:
Po'unde-unde 80: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
