Po'unde-unde 72
72
Pekakai tiano poparentaano mokole anu moleo
72:1-20
1Inso ndi Salomo.
O Ue Ala, songka-Miu Iweeakonomo mokole
ka moleo-Miu a ana ntamano mokole!
2Po'ineeomo ka ibitara ira bawaa-Miu a moleoa
ka mia-Miu anu ntepokonsii menunu songka!
3Po'ineeomo luwuno torukuno mpowawa manangaiano tongku,
ka luwuno pongku mpowawa menteea!
4Po'ineeomo ipokomorosoo moleoa
tiano mia anu tepokonsii i olodo palili,
tumulungi ira anado mia mongkokolaro,
sine pirego ira anu mpompokonsii!
5Po'ineeomo ka imelai tinuwuno i larono pebolilino mata oleo,
ka i larono wula mewanta, mapa'api-api inule!
6Po'ineeomo ka ikana usa anu metii a wawo mpada ewo,
kana usa marombo anu umuwoio tolino!
7Po'ineeomo ka ikomoro-morosono moleoa a tempo poparentaano
ka manangaia hadio ntu'u, hawe tempono wula nahi mewanta mbo'u!
8 #
Sak. 9:10
Po'ineeomo ipoparenta inso a ntahi lumako a ntahi,
inso a ngkoro Eparata hawe a tompano tolino!
9Po'ineeomo anu mpo'ia a mpada malua mpenggolontu i'arono,
ka luwuno iwalino mponsila'e pampawu;
10 #
Mat. 2:1-12
po'ineeomo luwuno mokole inso i Tarasisi ka luwuno togo
dompowawa pesomba;
po'ineeomo luwuno mokole inso i Sieba ka Seba
dompowawa peki'ue!
11Po'ineeomo luwuno mokole mpenggolontu mpesomba ndi onae,
ka luwuno tongku ntepe'ata ndi onae.
12Hangano, ipotolao mia mongkokolaro anu mebooli mepetulungi,
mia tepokonsii anu nahina tumulungio;
13ipehohawao mia molema ka mia mongkokolaro,
ikaduduio penaano mia mongkokolaro.
14Itolosi ira inso a pompokonsiia ka pobobarasaia,
reado masuli olino a pongkitano.
15Tuwu iramo mokole! Po'ineeomo ka ipinesombaako ndi onae wulaa Sieba!
Po'ineeomo ka ipinekakaiako mpiha,
ka pino'emaako ronso hawe sumoo oleo!
16Po'ineeomo ka ihadio ntu'u pinopaho gandu i wita,
mebomba a punsuno luwuno torukuno;
po'ineeomo luwuno tonggino te'ili kana luwuno keu i Libano,
ka palilino kota tetiangi kana ewo i tolino.
17Po'ineeomo neeno ka ipo'ia mpiha,
po'ineeomo neeno ka itepahe teto'ori i larono oleo metanggolili.
Po'ineeomo luwuno tongku mambe ronso a neeno,
ka mpotaeakono me'ura.
18Inunde-unde Iramo i Ue, Ue Alado to Isaraeli,
asa-asa-Do weweuo wineweu kinohali-haliako!
19Ka inunde-undeomo nee-Do anu maramba nahina tampulaano,
ka po'ineeomo maramba-Do buketio asa wawontolino.
Ami, ami.
20Tompamo i ndi'ai luwuno pekakaino i Daudi anano i Isai.
Currently Selected:
Po'unde-unde 72: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
