Po'unde-unde 71
71
Pekakai mo'ema pekadudui i tempo mota'u
71:1-24
1Ndi Omiu, oo Ue, kupepekadudui,
Osi'i ntu'u kupinokoko'ii.
2Ipotola akumo ka Ipokomalua akumo hangano moleo-Miu,
Ita'oomo biri-Miu ndi ongkue ka Ikadudui akumo!
3Igagimo torukuno watu pongkaduduiku,
po'ianga moiko ku'aiwa sompo tempo. Lano medandi Komiumo Komiu kumadudui aku,
hangano Omiumo pongku watuku ka pekorahakoaku.
4Oo Ue Alaku, Ipotola akumo inso a ngkaeno mia mosa'o gauno,
inso a pokungkudo mia mpoweweu po'ehedo ka melambaha.
5Hangano Omiumo pinerorohiku, oo Ue,
pine'ala-alaku mompu'u tempo mongura, oo Ue Ala.
6Ndi Omiu kupehonda mompu'u inso a mpe'anakaa,
Iluarako akumo inso a mpe'anakaado ineku; Omiu anu wela inunde-undeku.
7A hadio mia ongkue gagi kana petondoni,
hangano Omiumo pepekaduduiaku anu moroso.
8Po'ineeomo ngangaku bukeako po'unde-unde ndi Omiu,
saru pompelangkai ndi Omiu hawe sumoo oleo.
9Si tadi aku i tempono kumota'u,
si binta aku tewala pingko rosoku.
10Hangano luwuno iwaliku mempopau aku,
mia anu mpomporaakono penaaku teriso mperonga-ronga
11ka mpotae, ”Onae dobintaomo Ue Ala,
lampuio ka rakoo, hangano nahina anu motolao!”
12Oo Ue Ala, si olai inso ndi ongkue!
Ue Alaku, Ipontuturakomo tumulungi aku!
13Po'ineeomo dompohawe mokoko'ii ka pingko memate
mia anu mpe'iwaliakune;
po'ineeomo dompesoumbuako pontata ka mokoko'iia
mia anu pompewowolo masolaaku!
14Sine ongkue, aku wela mpiha momperorohi
ka koteti-tetiangino mowuatako po'unde-unde ndi Omiu;
15ngangaku ta tumutuluo moleo-Miu
ka tekaduduia inso ndi Omiu hawe sumoo oleo,
hangano nahi kupokodoao.
16Hawe aku ka mepau mongkona luwuno moroso-Do Ue Ala,
paleleo butu moleo-Miu!
17Oo Ue Ala, Ipaguru akumo mompu'u tempo kumongura,
ka hawe kanandio-andio kupaleleo wineweu-Miu anu kinohali-haliako;
18hawe mbo'u tempono kumota'u ka mopute wuuku,
oo Ue Ala, si binta aku,
ka kupaleleo moroso-Miu a luwuno inule anu ta hawe,
moroso 19ka moleo-Miu, anu humaweo langi anu mantande, oo Ue Ala.
Iweweu iramo mongkona anu langkai,
isemake kana Omiu, oo Ue Ala?
20Maupo Iweweu akumo membasaio hadio masusaa ka masolaa,
Komiu koa wali motuwu aku,
ka inso a ondaloano ntu'u tolino Komiu koa wali wuatako aku.
21Po'ineeomo ka Ipomuleakune moikono neeku
ka wali tumarero aku.
22Ongkue mbo'u ineheku menaniako-Miu po'unde-unde saru gambusu
hangano pompehohawa-Miu nahi otu-otu, oo Ue Alaku,
menania-Komiu penani po'unde-unde saru katapi,
oo, Omiu Anu Tedoa Mempori, Ue Alado to Isaraeli.
23Wiwiku ta kokora-kora mo'unde ka menania-Komiu penani po'unde-unde,
sumangaku mbo'u anu Ipotolaomo ta kokora-kora mo'unde.
24Eloku mbo'u ta popauo
moleo-Miu hawe sumoo oleo.
Mentee ntu'u ondae anu mpompewowolo masolaaku
ira mpohawe mokoko'ii ka pontata.
Currently Selected:
Po'unde-unde 71: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
