Po'unde-unde 73
73
TIANO III:
73–89
Pompemasusano mia anu moleo aroa
73:1-28
1Penani po'unde-undeno i Asapi.
Menteeano Ondae Ue Ala atuu moiko a mia anu moleo aroano,
ndi ondae anu morina aroado.
2Sine ongkue, tedeimo koa itelendo karuku, ilawu kutelendo.
3Hangano mosa'o aroaku ndi ondae anu melaba mpau,
tewala kukitao manangaido mia mosa'o gaudo.
4Hangano pompemahaki anu mowawa matea nahina ndi ondae,
ka koroido mewalo;
5nahi dompembasaio masusano mia,
ka nahi kona ira pohuku kana mia susua.
6Onaemo pu'uno, ka dompe'enu-enuako pompelangka-langkai
ka mpesangkaako pobobarasai.
7Hangano mewalo, matado memungku,
aroado luluaako pontuluri.
8Ondae mpebiu ka mpopau anu memosa'o,
ondae pompau porontua saru mpompelangka-langkai.
9Ondae mpenganga umewaio langi,
ka elodo melaba mpau i tolino.
10Onaemo pu'uno mia mpepokule ndi ondae,
kana uwoi anu hadio ntu'u humawe ira.
11Dompotae, ”Kana'umpe ka Doto'orio Ue Ala mongkona atuu,
hinaoke ponto'ori ndi Ondae Anu Tedoa Mantande?”
12Menteeano, kanatuumo mia mosa'o gaudo:
domentuwu nahina tinembi ka mpohowu mpiha arataa kaeaa.
13Nahina ntu'u tuduno kukorahakono aroa anu morina,
ka wo'ohio kaeku, tondonino nahina salaku.
14Sine ikona aku pohuku hawe sumoo oleo,
ka kona huku sompo mo'oru.
15Ande-andeno kupompewowolo, ”Ineheku mepau kanatuu,”
ka manasa kuhapuomo inuledo anamiu.
16Kanatuumo kupo'ia mompewowolo ka kupokonto'orio,
sine mongkona atuu butu gagi pokomasusaku,
17hawe ka kupewinso a laro po'ianga mempori-Do Ue Ala,
ka kupoposooo umariado.
18Menteeano a luwuno moloreano Inaa ira,
Iwinso ira a laro masolaa.
19Ha, sarai ntu'u ka dontedonta,
tetadi moliu iteleo mongkokongirino matea!
20Kana mo'ipi i tempono mewangu, oo Ue,
tempono Ipentade, rupado Ipekodeio.
21Tempono masusa aroaku
ka wua horiku kana dinuhu-duhu,
22benge-benge aku ka nahi kuponto'ori,
kana aku pinotuwu umpeda ndi Omiu.
23Sine umpeda aku mpiha ndi Omiu;
Omiu uminio kae ngkoanaku.
24Itaateakune patudu-Miu,
ranta poko'ariano Itande aku a laro marambaa.
25Isema mbo'u anu aku me'ueo i suruga,
tewala i tolino nahina anu kinekewoiku sangkadio Omiu?
26Koroiku lano ta mate ka rosoku ta pingko,
sine torukuno watuku ka tiaku Ondae koa mpiha Ue Ala nahina tampulaano.
27Hangano menteeano, isema anu olai inso ndi Omiu ta mate;
Ipepate ira luwu mia, anu nahi petenunu mbo'u ndi Omiu.
28Sine ongkue, ineheku umpeda ndi Ondae Ue Ala;
Ondae Ue Ala kupakosio gagi pepekaduduiaku,
ka kupokotutuluo luwuno inangga-Do.
Currently Selected:
Po'unde-unde 73: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
