Po'unde-unde 69
69
Pekakai a laro pompema'isoa
69:1-37
1Tiano petewawado anu mpenani. Montonda nanino Sisi Bonse. Inso ndi Daudi.
2Ikadudui akumo, oo Ue Ala,
hangano uwoi mewuatakoomo hawe a we'uku!
3Tondu aku a laro epe anu ondalo,
nahina petadaa;
tedonta akumo a laro uwoi a laro uwoi anu ondalo,
ka mansolono mowo molomo aku.
4Telusa aku hangano meboo-booli, motu'i burokoku;
mataku mooro hangano merorohi Ira Ue Alaku.
5 #
Pud. 35:19; Yoh. 15:25 Mia anu me'o'aliaakune nahina pu'uno
hadioopo sekono wuu a uluku;
hadio ntu'u anu mingki mpepate aku,
ondae onaemo iwaliku anu inehedo mpegaupi.
Hapa anu nahi kurontuo,
asalakonoke aku mokuleo?
6Oo Ue Ala, Omiu tumo'orio benge-bengeku,
luwuno salaku nahi tewuni ndi Omiu.
7Si po'inee ira mia anu sumikori Komiu pinokoko'ii hangano ongkue,
oo Ue, Ue Alano luwuakoano!
Si po'inee ira mia anu umungke Komiu kona mokoko'iia hangano ongkue,
oo Ue Alado to Isaraeli!
8Nde hangano Omiumo kutembio mokoko'ii,
mokoko'iia kuwowawao.
9Gagi akumo mia susua a mpe'etuku,
mia hawe luwuno anado ineku;
10 #
Yoh. 2:17; Rom. 15:3 hangano mawongkono kumekewoio raha-Miu mokomo'ai aku,
ka pontatado mia tumatako-Miu umalu aku.
11Mengese aku ka puasa,
sine maupo atuu mowawaakune tataaku;
12kupokonao sawu kampili gagi sangkaku,
sine ongkue gagi pasinggirido.
13Ndi ondae anu mpentoro a mpewowa langkai gagi aku wua wiwi
ka penani pasinggirido anu memolangu.
14Sine ongkue, mekakai aku ndi Omiu, oo Ue,
i tempo Ipemoikoo, oo Ue Ala;
a pompehohawa-Miu anu langkai Isangkiakunemo
pontulungi-Miu anu nahi otu-otu!
15Ipotola akumo inso a laro rege,
kasi kutondu,
po'ineeomo kupinotola inso ndi ondae anu umo'aliaakune,
ka inso a uwoi anu ondalo!
16Si po'ineeo uwoi moowo molomo aku,
ke ondaloano tahi malua tumele aku,
ka si po'ineeo sumuru mekomu umuko aku.
17Isangki akumo, oo Ue, hangano hadio ntu'u pompehohawaMiu nahi otu-otu,
Ipewolilimo ndi ongkue montonda langkaino pompehohawa-Miu!
18Siimo Iwunio rupa-Miu inso a ntetenaa-Miu,
hangano mompema'iso aku; rongamo Isangki aku!
19Aiwamo ndi ongkue, Itolosi akumo,
hangano luwuno iwaliku Ipotola akumo.
20Omiu tumo'orio tataaku, mokoko'ii ka mokoko'iiaku;
luwuno iwaliku kongko i aro-Miu.
21Rosoku ipuduomo pontataa atuu,
tedoa aku molema;
monsikori aku mia anu metonda mompemasusa, sine nahina,
sumikori ira anu mpontarero, sine nahi kupohawe.
22 #
Mat. 27:48; Mrk. 15:36; Yoh. 19:28-29 Tendeano, domempakaakune rasu,
ka i tempono kumokoranga, dompopo'inuakune anggoro mo'olo.
23 #
Rom. 11:9-10
Po'ineeomo kaanga pinatinda i arodo gagi oho,
ka porame-rameado gagi pompete'umala.
24Po'ineeomo matado gagi wongi-wongi, ranta nahi dompongkita;
weweuomo tongado wela telusa!
25I'uwuomo mosa'ono aroa-Miu ndi ondae,
ka po'ineeomo tekuda-Miu anu tensila umalu ira.
26 #
Tin. 1:20
Po'ineeomo pekemaado gagi boni-boni,
ka po'ineeomo luwuno kemado nahina mo'iangario.
27Hangano domelampuio mia anu tinunduhi-Miu,
domentiangio pompemahakido mia anu tinobo-Miu.
28Itiangiomo sala a nsala poweweudo,
ka si mansa Ipokomentee ira!
29 #
Pel. 32:32; Meng. 3:5; 13:8; 17:8 Po'ineeomo domempinahihi inso a wunta tuwua,
siimo domebinuri mperonga-ronga saru mia mentee!
30Sine ongkue andio tepokonsii ka mompemahaki,
pontulungi-Miu, oo Ue Ala, po'ineeomo tumande aku!
31Aku umunde-undeakono penani nee-Do Ue Ala,
melangkaiako Ira penani po'unde-unde;
32hangano mongkona atuu Dopemoikoopo i Ue sekonopo sapi lakino,
sekonopo ana nsapi lakino anu metandu ka mekuku tebansi.
33Po'ineeomo ikitao mia anu me'urumako ka ipo'unde;
omiu anu umungke Ira Ue Ala, po'ineeomo ka iwali moroso aroamiu!
34Hangano mia mongkokolaro Doperorongeakono i Ue,
ka nahi Dopekodeio mia-Do anu tinawa.
35Po'ineeomo langi ka tolino,
tahi malua ka luwuno anu melelu i larono, umunde-unde Ira.
36Hangano Ondae Ue Ala Ira kumaduduio Sioni
ka wali wangu ira kotano Yehuda,
ka dompo'ia tetenaa-Do i ra'ai ka mpe'ueo;
37ana'uedo ta me'ueo,
ka ondae anu kumekewoio nee-Do ira mpo'ia mpiha i tu'ai.
Currently Selected:
Po'unde-unde 69: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
