Po'unde-unde 68
68
Marambano poponangi-Do Ue Ala
68:1-36
1Tiano petewawado anu mpenani. Penani po'unde-undeno i Daudi. Penani.
2Mentade Ira Ue Ala, ka ntesiarawo iramo iwali-Do,
luwuno mia anu umo'aliaako Ira mpolai inso i aro-Do.
3Kana moliuno ahu, kanatuumo Ipokomoliu ira
kana lonono gomo umpeda a api,
kanatuumo domemate mia mosa'o gaudo i aro-Do Ue Ala.
4Sine mia mentee memawongko,
ondae mengkokora-kora mpo'unde i aro-Do Ue Ala, mpo'unde ka memawongko.
5Penanimo tia-Do Ue Ala, penanimo umunde-undeo nee-Do,
pelangkai Iramo anu me'ula a nseru!
Nee-Do onaemo i Ue; mawongkomo i aro-Do!
6Ondae Ue Ala a mpo'ianga-Do anu mempori
onaemo Amado nana'ote nahina amado ka Puu Mpo'alaakodo tuwu beine,
7Ondae Ue Ala moweeako ira po'iangado anu ntesosaelo,
Dopotola ira anu mentinaha, onaemo ka dompo'unde,
sine anu me'ewa pino'inee mpo'ia a wita anu londa.
8 #
Pel. 19:18
Oo Ue Ala, tempono Ilako metea i arodo bawaa-Miu,
tempono Ipelempa a mpada malua, Sela
9tolino leelu ka langi mo'uwu usa
i aro-Do Ue Ala i Sinai, i aro-Do Ue Ala, Ue Alado to Isaraeli.
10Usa anu hadio ntu'u I'uwuo, oo Ue Ala;
Ipokomoikoo wita-Miu anu mokari atuu,
11onaemo ka dompo'ia mpiha binawaa-Miu i ra'ai;
a laro moiko-Miu Ipokosompoo
kineredo mia anu tepokonsii, oo Ue Ala.
12Ondae i Ue mompowee pau;
langkai pebaresido beine mpowawa lele moiko,
13”Luwuno mokole ka sorodadudo mpolai, mpolai ira,
ka beine i raha mpetia-tia pinomuru.
14 #
Mpo. 5:16
Tembio ka ibutu mpepombole i olodo raha bimba,
hei marapati saru pani metongoako salaka,
saru wulu mpanino tesosangkilo kana wulaa?”
15Tempono Anu Tedoa Pabawa sumiarawo ira mokole i ra'ai,
metiiomo seru baku a wawo Ntorukuno Salomoni.
16Torukuno ondau ntu'u, mentorukuno Basani atuu,
mentorukuno anu mepunsu hadio, mentorukuno Basani atuu!
17 #
Pud. 132:13
Hei luwuno torukuno anu mepunsu hadio, tembio ka impesili mata mosiri,
a ntorukuno anu inehe-Do Ue Ala gagi mpentoroa-Do?
Menteeano, Ondae i Ue Ira mo'ia mpiha i ra'ai!
18Luwuno kareta-Do Ue Ala mopulu nsowu,
tendeano mapasowu-sowu hadiono;
Ondae i Ue hawe Iramo inso i Sinai, mewinso a mpo'ianga mempori!
19 #
Eps. 4:8
Mewuatako Komiumo a mantandeano, saru wawa ira tinawa;
Itarimaomo luwuno pesomba inso a mia,
maupo inso ndi ondae anu me'ewa hangano Ondae Ue Ala mo'ia i ra'ai.
20Inunde-unde Iramo i Ue!
Oleo me'eu oleo Dotembiakita tinembito;
Ondaemo Ue Ala tekaduduiato. Sela
21Ndi ontae Ondae Ue Ala atuu onaemo Ue Ala anu mongkadudui,
butu ndi Ondae Ue Ala, Ueto, hinao pesalaa meluarako inso a matea.
22Menteeano, Ondae Ue Ala Ira piregoo uludo luwuno iwali-Do,
banga uluno mia mewuu mokapa anu tuwu mpiha a laro hala.
23Ondae i Ue mepau Iramo, ”Inso i Basani Aku umala ira,
Aku umala ira maupo inso a ntahi anu ondalo,
24ka uwo'ohio karumu a laro reado iwalimu,
ka elodo dahumu mpohawe mbo'u tiado.”
25Mia mengkitao maramba-Miu, oo Ue Ala,
maramba-Do Ue Alaku, Mokoleku, a laro po'ianga mempori.
26I arono mpelempa luwuno anu mpenani, i bungkuno luwuno anu mpemaeako katapi,
i tongano luwuno ana beine anu mpotingko rebana,
27”Unde-unde Iramo Ue Ala a laro luwuno bawaa,
unde-unde Iramo i Ue, hei omiu anu nte'inso a mpepu'uano Isaraeli!”
28I tu'ai kongko i Benami, anu tompa susu, anu wawa ira,
luwuno pinemota'uno i Yehuda ntehuhu,
luwuno pinemota'uno i Sebulo, luwuno pinemota'uno i Napatali.
29Ipumpuomo roso-Miu, oo Ue Ala,
pokorosoomo, oo Ue Ala, hapa anu Iweweuakamimo.
30Hangano raha-Miu i Yerusale,
luwuno mokole mpohaweo pesomba ndi Omiu.
31Wurarai iramo kondehora mo'ila a ntonga gelaga,
bawaano bante saru sapi lakinodo luwuno tongku!
Landa iramo anu mpo'ungke salaka;
siarawo iramo tongku anu inehedo mpetea.
32Inso i Masiri mia mewawa ira sangka mala,
Etiopia ronga tumandeo kaeno ndi Ondae Ue Ala.
33Hei luwuno poparentaa ntolino, penanimo tia-Do Ue Ala,
penanimo unde-unde Ira i Ue; Sela
34tia-Do anu hinao pe'ulaa-Do telaloio langi tempo se'eluno.
Pekokoongakonomo, Ondae moporongeo suara-Do, suara-Do anu mongkokongiri!
35Mangakuakonomo pabawa-Do Ue Ala;
maramba-Do kongko i wawono Isaraeli,
pabawa-Do humaweo luwuno seru.
36Ondae Ue Ala tedoa mongkokongiri inso a laro po'ianga mempori-Do;
Ondaemo Ue Alado to Isaraeli, Ondae moweeako ira pabawa
ka roso a bawaa-Do. Inunde-unde
Iramo Ue Ala.
Currently Selected:
Po'unde-unde 68: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
