Po'unde-unde 59
59
Mo'ema pontulungi mo'ewai iwali
59:1-18
1 #
1Sam. 19:11
Tiano petewawado anu mpenani. Montonda nanino Si Poropu. Mikitami inso ndi Daudi, tempono i Saulu montena mia mepenteeo rahano ka ipepateo.
2Ipotola akumo inso a iwaliku, oo Ue Ala;
Ibente akumo te'aro a luwuno mia anu mpentade umewai aku
3Ipotola akumo inso a mia anu mpoweweu mosa'o
ka Ikadudui akumo inso a puu mpo'uwu rea.
4Hangano kitaomo domentowokio penaaku;
mia memoroso mpedandi ira mpoweweu mosa'o ndi ongkue,
kahinaano nahi kupoweweu polimpaia, nahi kutehala, oo Ue,
5nahina salaku, sine mpotuturako ira ka mpepatinda mpesapoi.
Aiwamo ndi ongkue ka Ikitaomo!
6Omiu, Ue, Ue Alano luwuakoano, onaemo Ue Alano Isaraeli.
Ipewangumo humukuo luwuno tongku;
siimo domempinehohawa anu mpoweweu mosa'o saru mpehapu! Sela
7I tempono tekamburi wali ira mehawe,
mentumoo ira kana dahu ka melimbuo kota.
8Kitaomo, ondae melaba mpauako ngangado;
ponai kongko a wiwido, dompewowoloo, ”Isemake anu rumongeo?”
9Sine Omiu, Ue, mengingisii ira,
Ipasinggiri ira luwuno tongku.
10Oo rosoku, aku me'ini ndi Omiu,
hangano Omiu, oo Ue Ala, onaemo kota benteku.
11Ondae Ue Alaku Ira tumotowoakune pompehohawa-Do;
Ondae Ue Ala Ira weweu aku me'uru-uru ira iwaliku.
12Si pepate ira, ka si domengkolupeo tongkuku,
Isaariako iramo pabawa-Miu ngkoraane ngkoramai,
ka Idontai iramo, oo Ue, kantamami!
13Hangano halano ngangado onaemo pinauno wiwido,
po'ineeomo domengkona rako a laro pompelangka-langkaido.
Hangano pontotonaa ka pegaupi anu pinaudo,
14pingko iramo a laro bamburu, pingko iramo,
ranta nami domehina mbo'u,
ka domento'orio nine Ondae Ue Ala moparenta i olodo inuleno i Yako,
hawe i tompano tolino. Sela
15I tempono tekamburi mehawe ira mbo'u,
mentumoo ira kana dahu ka melimbuo kota.
16Ondae mpelakopi mpo'ungke mpongkaa;
tewala nahi domemowohi, mentumoo ira.
17Sine aku menaniako roso-Miu,
i tempono mo'oru aku kokora-kora mo'unde hangano pompehohawa-Miu;
hangano gagi Komiumo kota benteku,
polaiaku i tempono kupompema'iso.
18Oo rosoku, aku menani umunde-unde Komiu;
hangano Ondae Ue Ala onaemo kota benteku,
Ondae Ue Ala anu mehohawa aku.
Currently Selected:
Po'unde-unde 59: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
