Po'unde-unde 57
57
Iluluo iwali, sine Dotulungio Ue Ala
57:1-12
1 #
1Sam. 22:1; 24:3 Tiano petewawado anu mpenani. Montonda nanino Si Poropu. Mikitami Inso ndi Daudi, tempono ipolai inso ndi Saulu, a laro kunepo.
2Ipehohawa akumo, oo Ue Ala, Ipehohawa akumo,
hangano ndi Omiumo kupepekadudui;
a laro mpe'egoano pani-Miu aku mepekadudui,
hawe ka itelalo ponsolangia atuu.
3Mebooli aku ndi Ondae Ue Ala, Anu Tedoa Mantande,
ndi Ondae Ue Ala anu Ira mombaloakune.
4Ira montena anu montulungi inso i suruga ka kumadudui aku,
tumaroio mia anu lumulu aku. Sela
Ondae Ue Ala Ira tumenao pompehohawa ka mentee-Do.
5Mepombole aku i tonga-tongado singa lambaha
anu inehedo mperangkami ira anano mia, anu ngisino kana kansai ka pana,
ka elono kana ponai montaso.
6Po'ineeomo Ipinokomantande wawoio langi, oo Ue Ala!
Po'ineeomo maramba-Miu wawoio asa wawontolino!
7Ondae mpota'o buani a luwuno pelempaaku,
dompokompetuunduo sumangaku,
ondae mpokeke aa i aroku,
sine ondaedo ntedonta i larono. Sela
8 #
Pud. 108:2-6
Aroaku tetinda, oo Ue Ala, aroaku tetinda;
aku menani, aku mo'unde-unde.
9Pewangumo, hei sumangaku, pewangumo, hei gambusu ka katapi,
aku wanguo towea!
10Aku umunde-unde Komiu i olodo tongku, oo Ue,
aku menani umunde-unde Komiu i olodo suku tongku;
11hangano pompehohawa-Miu langkai hawe i langi,
ka mentee-Miu hawe a laro nseru.
12Po'ineeomo Ipinokomantande wawoio langi, oo Ue Ala!
Po'ineeomo maramba-Miu wawoio asa wawontolino!
Currently Selected:
Po'unde-unde 57: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
