Po'unde-unde 56
56
Pompe'ala-ala ndi Ondae Ue Ala a laro masusaa
56:1-14
1 #
1Sam. 21:12
Tiano petewawado anu mpenani. Montonda nanino Marapati a Ngkeu Tarabanti anu Olai. Mikitami inso ndi Daudi, tempono domerakoo to Pelisiti i Gati.
2Ipehohawa akumo, oo Ue Ala, hangano domelolanda aku mia,
hawe sumoo oleo mia mpesapoi ka mpokonsii aku!
3Iwaliku melulu aku hawe sumoo oleo,
oo, hadio mia anu saru mpompelangka-langkai sumapoi aku.
4Tempono kudoito,
kupe'ala-ala Komiu;
5ndi Ondae Ue Ala, anu pau-Do ku'unde-undeo,
ndi Ondae Ue Ala kupompe'ala-ala, nahi kudoito.
Hapake anu pinokoweweuno mia ndi ongkue?
6Hawe sumoo oleo dompoposule-suleo luwuno pauku;
mpotoo anu mosa'o ndi ongkue.
7Ondae mpedandi mpoweweu mosa'o ka mpesapoi, dompekokoongakono pelempaku,
kana mia anu momporaakono penaaku.
8Kana'umpe ka dompokotola?
Ipokompetuundu iramo tongku andio a laro tekuda-Miu, oo Ue Ala!
9Marasaiku Iburiomo,
uwoi mataku Inaao a laro ngkadu-kadu-Miu.
Kombake luwuno teburi a laro wunta-Miu?
10Ka iwaliku ta mosuka i tempono kupebooli;
kupe'ala-alao nine Ondae Ue Ala me'alaako ndi ongkue.
11Ndi Ondae Ue Ala anu pau-Do ku'unde-undeo,
ndi Ondae i Ue anu pau-Do ku'unde-undeo,
12ndi Ondae Ue Ala kupompe'ala-ala, nahi kudoito.
Hapake anu pinokoweweuno mia ndi ongkue?
13Pontangaku ndi Omiu, oo Ue Ala, tumanggo aku,
aku umihiiakono pesomba po'unde-unde.
14Hangano Ipotola akumo inso a matea,
tamoako dumagaio karuku ranta nahi tetidu;
onaemo ka imoiko kupelempa i aro-Do Ue Ala
a laro wantano tuwua.
Currently Selected:
Po'unde-unde 56: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
